ການປູກຜັກປອດສານພິດປະຈຸບັນແມ່ນໄດ້ຮັບຄວາມົນຍົມຫຼາຍນອກຈາກຈະເປັນການຜະລິດຜັກຂາຍນຳລາຍໄດ້ມາສູ່ຄອບຄົວແລ້ວຍັງເປັນສິ່ງທີ່ປອດໄພທັງຜູ້ຜະລິດແລະຜູ້ບໍລິໂພກນຳອີກດັ່ງປະຊາຊົນໃນກຸ່ມບ້ານຕ່າງໆຢູ່ເມືອງບໍລິຄັນແຂວງບໍລິຄຳໄຊໄດ້ພ້ອມກັນຕັ້ງກຸ່ມປູກພືດລະ ດູແລ້ງຜັກປອດສານຜິດເພື່ອບໍລິໂພກແລະຂາຍນຳລາຍໄດ້ສູ່ຄອບຄົວ.
ທ່ານ ພູວຽງ ຫຼວງສຸວັນນະວົງ ຫົວໜ້າຫ້ອງການກະສິກຳ ແລະປ່າໄມ້ເມືອງບໍລິຄັນ ໄດ້ໃຫ້ສຳພາດວ່າ: ເມືອງບໍລິຄັນ ແມ່ນເມືອງໜຶ່ງຂອງແຂວງບໍລິຄຳໄຊ ຊຶ່ງເປັນເມືອງເຄິ່ງທົ່ງພຽງ ແລະເຄິ່ງພູດອຍມີເນື້ອທີ່ທັງໝົດ 3.864 ກິໂລຕາແມັດ ປະກອບມີ 6 ເຂດພັດທະນາ, ມີ 43 ບ້ານ 7.555 ຄອບຄົວ, ພົນລະເມືອງທັງໝົດ 47.472 ຄົນ ຍິງ 22.973 ປຸກລະດົມສົ່ງເສີມໃຫ້ປະຊາຊົນໄດ້ມີການປູກພືດທົດແທນບ່ອນທີ່ມີເງື່ອນໄຂ ຫຼື ບ່ອນທີ່ສາມາດຮັບນ້ຳເຂົ້າໄດ້ນັ້ນແມ່ນໄດ້ຜົນດີຫຼາຍໂດຍສະເພາະໃນປີນີ້ສະ ພາບການຜະລິດຂອງປະຊາຊົນແມ່ນມີຄວາມກະຕືລືລົ້ນຂຶ້ນພາຍຫຼັງທີ່ປະຊາຊົນໄດ້ເກັບກ່ຽວເຂົ້ານາປີສຳເລັດແລ້ວປະຊາຊົນກໍໄດ້ກະກຽມການປູກເຂົ້ານາແຊງແລະປູກພືດລະດູແລ້ງບ່ອນໃດສາມາດຮັບນ້ຳໄດ້ໜ້ອຍກໍໃຫ້ຫັນມາປູກພືດອາຍຸສັ້ນແລະພືດຜັກຕ່າງໆ.
ນອກຈາກນີ້ຍັງໄດ້ຊຸກຍູ້ສົ່ງເສີມຈັດຕັ້ງກຸ່ມປູກຜັກປອດສານພິດຢູ່ບ້ານຜາເມືອງ, ຫົວນາມີ 1 ກຸ່ມ, ມີ 6 ຄອບຄົວ ມີ 38 ເຮືອນຮົ່ມ, ໃນນັ້ນພືດທີ່ປູກແມ່ນຜັກຫອມ, ຜັກຫົມ, ຜັກກາດທຸກຊະນິດ, ໝາກຖົ່ວ ແລະອື່ນໆ ການປູກຜັກປອດສານພິດນີ້ແມ່ນມີຜູ້ບໍລິໂພກຫຼາຍຊຶ່ງສາມາດສ້າງລາຍຮັບປະມານ 2 ລ້ານກີບຕໍ່ຄອບຄົວຕໍ່ເດືອນ ແລະທຸກໆວັນສຸກໄດ້ມີການເປີດຕະຫຼາດນັດຂາຍຜະລິດຕະພັນກະສິກຳໂດຍສະເພາະແມ່ນພືດຜັກປອດສານພິດປະຈຸບັນຜັກປອດສານພິດກຳລັງເປັນທີ່ນິຍົມກັນຢ່າງກວ້າງຂວາງຈາກຜູ້ບໍລິໂພກນອກນັ້ນວິຊາການພວກເຮົາໄດ້ຊຸກຍູ້ປະຊາຊົນບ້ານວັດທາດ ມີ 3 ຄອບຄົວ, ບ້ານຫາດໂພມີ 5 ຄອບຄົວຕື່ມອີກ.
ຊຶ່ງໃນແຜນການການເຮັດນາແຊງໃນປີນີ້ວາງໄວ້ 144 ເຮັກຕາ ແຕ່ສາມາດປະຕິບັດລື່ນແຜນໄດ້ 184 ເຮັກຕາ ມີ 150 ຄອບຄົວ, ເລັງໃສ່ຊົນລະປະທານນ້ຳກາບ, ນ້ຳເຫືອງ ແລະຫ້ວຍຄຳ, ສະເພາະບ້ານບໍ່ລະບົບຊົນລະປະທານເປ່ເພສ້ອມແປງບໍ່ຖ່ວງທັນປະຊາຊົນຈິ່ງຫັນມາປູກພືດໄລຍະສັ້ນເພື່ອທົດແທນເຮັດນາແຊງນຳໃຊ້ຊົນລະປະທານນ້ຳຊາວມາຮອດປະຈຸບັນການປັກດຳເຂົ້ານາແຊງສຳເລັດແລ້ວ 100%, ສ່ວນການປູກພືດລະດູແລ້ງປີນີ້ແຜນການວາງໄວ້ 1.240 ເຮັກຕາ ປະຕິບັດໄດ້ 209 ກວ່າເຮັກຕາແລະຈະສືບຕໍ່ຊຸກຍູ້ສົ່ງເສີມປະຊາຊົນປູກພືດເພີ່ມອີກເປັນຕົ້ນແມ່ນສາລີ,ຖົ່ວດິນ,ຖົ່ວຂຽວ, ໝາກໂມ, ໝາກແຕງ ແລະອື່ນໆ ເພື່ອເຮັດໃຫ້ປະຊາຊົນໄດ້ມີພືດຜັກບໍລິໂພກ ແລະ ນຳໄປຂາຍສ້າງລາຍໄດ້ໃຫ້ແກ່ຄອບຄົວກ້າວສູ້ການພົ້ນທຸກໃນວັນຕໍ່ໜ້າຢ່າງຖາວອນ.
ທີ່ມາ: