ໃນວັນທີ 15 ກຸມພາ 2016 ນັກສຶກສາລາວຈຳນວນ 19 ຄົນ ພ້ອມດ້ວຍຜູ້ນໍາພາ 1 ທ່ານ ໄດ້ອອກເດີນທາງຈາກສະໜາມບິນສາກົນວັດໄຕ ນະຄອນຫຼວງວຽງຈັນ ໄປຍັງປະເທດຍີ່ປຸ່ນ ເພື່ອເຂົ້າຮ່ວມທັດສະນະສຶກສາພາຍໃຕ້ໂຄງການ JENESYS 2015 ເຊິ່ງນັກສຶກສາກຸ່ມດັ່ງກ່າວ ຈະໄດ້ເຄື່ອນໄຫວຢູ່ປະເທດຍີ່ປຸ່ນ ແຕ່ວັນທີ 16-23 ກຸມພາ 2016 ແລະ ເຂົ້າຮ່ວມກິດຈະກຳໃນຫົວຂໍ້ ໂຄງການການແລກປ່ຽນຄວາມຮູ້ດ້ານຄວາມຍຸຕິທຳ-ກົດໝາຍ ເຊິ່ງໂຄງການທັດສະນະສຶກສານີ້ ແມ່ນເນັ້ນໃສ່ເພື່ອສົ່ງເສີມຄວາມເຂົ້າໃຈຕໍ່ລະບົບກົດໝາຍຂອງປະເທດຍີ່ປຸ່ນ ຂອງຊາວໜຸ່ມລາວ ແລະ ເພື່ອເຮັດໃຫ້ເກີດຄວາມເຂົ້າໃຈສອງຝ່າຍລະຫວ່າງປະຊາຊົນສອງຊາດລາວ-ຍີ່ປຸ່ນ ສໍາລັບນັກສຶກສາລາວ 19 ຄົນ ແມ່ນຖືກຄັດເລືອກຈາກນັກສຶກສາດີເດັ່ນສາຂາວິຊາວິທະຍາສາດການເມືອງ ແລະ ກົດໝາຍ ໂດຍຜ່ານການຄັດເລືອກຈາກຄະນະກຳມະການທີ່ປະກອບດ້ວຍຜູ້ຕາງໜ້າຈາກກະຊວງສຶກສາທິການ ແລະກີລາ ແລະ ສະຖານທູດຍີ່ປຸ່ນ ປະຈຳ ສປປ.ລາວ.
ນັກສຶກສາເຫຼົ່ານີ້ ຈະເດີນທາງຢ້ຽມຢາມນະຄອນຫຼວງໂຕກຽວ ແລະ ແຂວງມິຍາກິ ເຊິ່ງຕັ້ງຢູ່ເຂດທິດຕາເວັນອອກສະຫຼຽງເໜືອ ທາງພາກເໜືອຂອງເກາະຮົນຊູ ເກາະທີ່ໃຫຽ່ທີ່ສຸດຂອງຍີ່ປຸ່ນ ພວກເຂົາຈະໄດ້ຢ້ຽມຢາມອົງການສົ່ງເສີມກົດໝາຍ ແລະ ຈະໄດ້ໄປເບິ່ງຫ້ອງພິຈາລະນາຄະດີໃນສານ ນອກນັ້ນ ຍັງຈະໄດ້ໄປພັກເຊົານຳຄອບຄົວຍີ່ປຸ່ນ ແລະ ແລກປ່ຽນຢູ່ຕາມໂຮງຮຽນຕ່າງໆ ເພື່ອສ້າງຄວາມເຂົ້າໃຈຕໍ່ກັບວັດທະນະທຳ ແລະ ສັງຄົມຍີ່ປຸ່ນ ໃຫ້ເລິກເຊິ່ງຕື່ມອີກ.
ຂໍ້ມູນຈາກ http://www.vtetoday.la/