ຖິ້ວບິນວີເອສ 025 ຂອງເວີຈິນ ແອັດແລນຕິກທີ່ກຳລັງເດີນທາງໄປນະຄອນຫຼວງນິວຢອກ ຕ້ອງລົງຈອດສຸກເສີນ ຫຼັງມີຄົນຍິງແສງເລເຊີມາທີ່ຫ້ອງນັກບິນ.
ສຳນັກງານຕຳຫຼວດໃນນະຄອນຫຼວງລອນດອນລາຍງານເມື່ອຄືນວັນອາທິດທີ່ຜ່ານມາວ່າ ຖ້ຽວບິນວີເອສ 025 ຂອງສາຍການບິນເວີຈິນແອັດແລນຕິກທີ່ຢູ່ລະຫວ່າງເດີນທາງຈາກສະໜາມບິນນານາຊາດຮິດໂທຣ ນະຄອນຫຼວງລອນດອນ ໄປຍັງສະໜາມບິນນານາຊາດ ຈອນ ເອຟ ເຄເນດີ ໃນນະຄອນຫຼວງນິວຢອກ ຈຳເປັນຕ້ອງກັບມາຂໍລົງຈອດສຸກເສີນທີ່ສະໜາມບິນຕົ້ນທາງ ຫຼັງອອກເດີນທາງໄດ້ບໍ່ດົນ ເນື່ອງຈາກມີລຳແສງເລເຊີຊຶ່ງຍັງບໍ່ຮູ້ທີ່ມາແນ່ນອນສາຍແສງມາໃສ່ຫ້ອງນັກບິນ ຊຶ່ງເຈົ້າໜ້າທີ່ກຳລັງເລັ່ງສືບສວນຫາຕົວຜູ້ກະທຳຜິດ.
ຂໍ້ມູນເບື້ອງຕົ້ນຈາກຫໍບັງຄັບການບິນລະບຸວ່າ ຖ້ຽວບິນດັ່ງກ່າວເດີນທາງຢູ່ເໜືອນ່ານຟ້າຂອງໄອແລນ ກ່ອນທີ່ນັກບິນຈະຕິດຕໍ່ຂໍນຳເຄື່ອງກັບມາລົງຈອດສຸກເສີນທີ່ສະໜາມບິນຮິດໂທຣ ເນື່ອງຈາກນັກບິນຄົນໜຶ່ງມີອາການບໍ່ສະບາຍກະທັນຫັນ ທີ່ຄາດວ່າອາດເປັນຜົນຈາກແສງເລເຊີປິດສະໜາ ສ່ວນນັກບິນອີກຄົນໜຶ່ງຍັງປະຕິບັດໜ້າທີ່ໄດ້ ດ້ານຜູ້ໂດຍສານ 252 ຄົນປອດໄພດີ ຂະນະທີ່ ສາຍການບິນເວີຈິນ ແອັດແລນຕິກ ອອກຖະແຫຼງການຂໍອະໄພຕໍ່ເຫດການທີ່ເກີດຂຶ້ນ ໂດຍຢືນຢັນວ່າການນຳເຮືອບິນລົງຈອດສຸກເສີນເປັນໄປຕາມນະໂຍບາຍຂອງບໍລິສັດທີ່ໃຫ້ຄວາມສຳຄັນກັບຄວາມປອດໄພຂອງຜູ້ໂດຍສານທຸກຄົນເປັນອັນດັບທຳອິດ ແລະຈະມີການຈັດຫາເຮືອບິນລຳໃໝ່ເພື່ອນຳຜູ້ໂດຍສານໄປສົ່ງຍັງປາຍທາງໃຫ້ໄວທີ່ສຸດ.
ລາຍງານຂອງສຳນັກການບິນພົນລະເຮືອນແຫ່ງສະຫະລາຊະອານາຈັກລະບຸວ່າ ມີເຫດການລຳແສງເລເຊີຍິງມາໃສ່ຫ້ອງນັກບິນ 414 ຄັ້ງ ລະຫວ່າງເດືອນມີນາ-ມິຖຸນາປີທີ່ຜ່ານມາ ໃນຈຳນວນນີ້ 48 ຄັ້ງ ເປັນເຫດການທີ່ເກີດຂຶ້ນກັບຖ້ຽວບິນທີ່ອອກເດີນທາງຈາກສະໜາມບິນຮິດໂທຣ.