ນາງ ຄຣິສຕິນ ລາກາດ ຜູ້ອຳນວຍການກອງທຶນການເງິນລະຫວ່າງປະເທດ ຫຼື ໄອເອັມເອຟ ຈະດຳລົງຕຳແໜ່ງເປັນສະໄໝທີສອງ ວາລະ 5 ປີ.
ທັງນີ້ ນອກຈາກລາຍຊື່ຂອງລາວແລ້ວ ບໍ່ມີລາຍຊື່ຂອງຜູ້ໃດອີກເລີຍເຂົ້າຊີງຕຳແໜ່ງ.
ນາງ ລາກາດ ໃນໄວ 60 ປີ ດຳລົງຕຳແໜ່ງນີ້ສະໄໝທຳອິດເມື່ອປີ 2011 ລາວໄດ້ຮັບການສະໜັບສະໜູນຈາກອັງກິດ, ເຢຍລະມັນ, ຈີນ ແລະ ຝຣັ່ງ ພ້ອມທັງເປັນແມ່ຍິ່ງຄົນທຳອິດທີ່ໄດ້ດຳລົງຕໍາແໜ່ງນີ້.
ອາເລັກຊີ ໂມຊິນ ຫົວໜ້າຄະນະບໍລິຫານໄອເອັມເອຟ ລະບຸວ່າ ໄລຍະເວລາໃນການນຳສະເໜີຊື່ເຂົ້າຊີງຕຳແໜ່ງຜູ້ອຳນວຍການໄອເອັມເອຟປິດລົງເມື່ອວັນທີ 10 ກຸມພາ ແລະໜຶ່ງດຽວໃນລາຍຊື່ຜູ້ຊີງຕຳແໜ່ງຄືຜູ້ອຳນວຍການຄົນປະຈຸບັນ.
ໂດຍຄະນະບໍລິຫານໄອເອັມເອຟ ອົງກອນທີ່ມີສະມາຊິກ 188 ປະເທດທົ່ວໂລກ ກ່າວວ່າ ຈະຈັດການປະຊຸມກັບລາກາດ ແລະ ຕ້ອງການສະຫຼຸບຂະບວນການຄັກເລືອກຜູ້ນຳອົງກອນໂດຍໄວທີ່ສຸດ ຄາດວ່າຄະນະກຳມະການບໍລິຫານຈະປະກາດຊື່ລາວໃຫ້ເປັນຜູ້ນຳອົງກອນຄົນຕໍ່ໄປ ຢ່າງເປັນທາງການ ປະມານຕົ້ນເດືອນມີນາ.
ຢ່າງໃດກໍຕາມ ຕຳແໜ່ງຂອງນາງ ລາກາດ ສະໄໝທຳອິດຈະໝົດວາລະລົງວັນທີ 5 ກໍລະກົດ 2016.