ສປປ ລາວ ກຳລັງຫ້າງຫາກະກຽມນຳໃຊ້ລະບົບຕິດຕາມການນຳເຂົ້າ ແລະ ຈຳໜ່າຍນ້ຳມັນເຊື້ອໄຟແບບເອເລັກໂຕຣນິກ ຊຶ່ງອະນຸຍາດໃຫ້ບໍລິສັດບົວທິບລາວ ຈຳກັດ ເຂົ້າສຳປະທານລົງທຶນໃສ່ການຕິດຕັ້ງ ແລະ ຄຸ້ມຄອງໃນອາຍຸ 10 ປີ ໂດຍຄາດວ່າໂຄງການນີ້ຈະຊ່ວຍຄຸ້ມຄອງການນຳເຂົ້າ ແລະ ຈຳໜ່າຍ ລວມທັງການປ້ອງກັນການລັກລອບໄດ້ຢ່າງມີປະສິດທິພາບ, ການຈັດເກັບລາຍຮັບເຂົ້າງົບກໍຈະມີຄວາມຖືກຕ້ອງ ແລະ ຮັດກຸມຂຶ້ນ.
ເພື່ອເຮັດໃຫ້ການອະນຸຍາດດັ່ງກ່າວເປັນຮູບປະທຳ ແລະ ມີຜົນສັກສິດ ເມື່ອວັນທີ 3 ເມສາຜ່ານມາ ທີ່ກົມພາສີກະຊວງການເງິນໄດ້ມີພິທີເຊັນສັນຍາສຳປະທານໂຄງການຕິດຕັ້ງ ແລະ ຄຸ້ມຄອງລະບົບຕິດຕາມການນຳເຂົ້າ ແລະ ຈຳໜ່າຍນ້ຳມັນເຊື້ອໄຟແບບເອເລັກໂຕຣນິກລະຫວ່າງທ່ານ ອາດສະພັງທອງ ສີພັນດອນ ຫົວໜ້າກົມພາສີກັບທ່ານ ນາງ ທອງທິບ ພົມມະຈັກ ຜູ້ອຳນວຍການບໍລິສັດບົວທິບລາວ ຈຳກັດ ໂດຍມີທ່ານ ສີລາ ວຽງແກ້ວ ລັດຖະມົນຕີຊ່ວຍວ່າການກະຊວງການເງິນ, ທ່ານຫົວໜ້າກົມສ່ວຍສາອາກອນ ຕະຫຼອດຮອດພະນັກງານວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ສິລິວັນ ພັນຄຳຜິວ ຮອງຫົວໜ້າພະແນກຄຸ້ມຄອງການແຈ້ງພາສີໄດ້ກ່າວວ່າ: ໂຄງການໄດ້ແບ່ງອອກເປັນ 2 ໄລຍະຄື: ໄລຍະ ທີ 1 ບໍລິສັດຜູ້ສຳປະທານຈະໃຊ້ທຶນທັງໝົດ 120 ຕື້ກີບ ຫຼື ປະມານ 15 ລ້ານໂດລາສະຫະລັດ ເຂົ້າໃນການສຳຫຼວດ ແລະ ຕິດຕັ້ງລະບົບຕິດຕາມນ້ຳມັນຈາກດ່ານນຳເຂົ້າຫາສາງນ້ຳມັນ ແລະ ການປ່ອຍອອກຈາກສາງພັກໄປຫາສາງ ພາຍໃນໃຫ້ສຳເລັດທົ່ວປະເທດໃນເວລາ 10 ເດືອນ ແລະ ໄລຍະ 2 ແມ່ນຈະຕິດຕັ້ງລະບົບຕິດຕາມຈາກພາຍໃນໄປຫາປ້ຳຈ່າຍ ແລະ ການປ່ອຍອອກຈາກປ້ຳຈ່າຍ ຊຶ່ງອາຍຸການສຳປະທານ 10 ປີ ແຕ່ສາມາດຕໍ່ໄດ້ 1 ຄັ້ງ.
ສ່ວນຄ່າບໍລິການນຳໃຊ້ລະບົບດັ່ງກ່າວແມ່ນ 22 ກີບຕໍ່ລິດ ຂອງນ້ຳມັນທີ່ປ່ອຍອອກຈາກສາງພັກນ້ຳມັນ ໂດຍຄ່າ ບໍລິການແມ່ນຈະຫັກເອົາຈາກຄ່າຄວາມສ່ຽງຂອງການສູນເສຍ (ການເຫີຍ ອາຍ) ທີ່ລັດຖະບານໄດ້ກຳນົດໄວ້ໃນໂຄງສ້າງລາຄານ້ຳມັນຄື: 50 ກີບ ໝາຍຄວາມວ່າຈະບໍ່ໄດ້ເກັບຄ່າບໍລິການເພີ່ມຈາກໂຄງສ້າງລາຄານ້ຳມັນປະຈຸບັນ ຊຶ່ງຈະບໍ່ສົ່ງຜົນກະທົບຕໍ່ລາຄາຈຳໜ່າຍພາຍໃນ ແນວໃດກໍດີ ເພື່ອຮັບປະກັນໃຫ້ອັດຕາຄ່າບໍລິການຢູ່ໃນລະດັບທີ່ເໝາະສົມໄດ້ກຳນົດໃຫ້ມີການທົບທວນຄືນ ເພື່ອດັດປັບອັດຕາຄ່າບໍລິການໃນທຸກໆ 5 ປີ ຂະນະທີ່ໂຄງການນີ້ ທ່ານ ສິລິວັນ ພັນຄຳຜິວ ຢ້ຳວ່າ: ຜູ້ສຳປະທານຈະຖືຮຸ້ນ 90% ແລະ ອີກ 10% ແມ່ນການຖືຮຸ້ນຂອງລັດຖະບານໂດຍບໍ່ຕ້ອງລົງທຶນ.
ດ້ານທ່ານ ໃຫຍ່ ພົມມະຈັກ ປະທານບໍລິສັດບົວທິບລາວ ຈຳກັດ ກ່າວວ່າ: ການພັດທະນາ ແລະ ນຳໃຊ້ລະບົບດັ່ງກ່າວແມ່ນເພື່ອນຳໃຊ້ເຕັກໂນໂລຊີທີ່ທັນສະໄໝໃຫ້ເປັນເຄື່ອງມືໜຶ່ງທີ່ສາມາດອຳນວຍຄວາມສະດວກແກ່ພະນັກງານຂອງລັດ ໂດຍສະເພາະແມ່ນພະນັກງານພາສີ ແລະ ອາກອນ ຊຶ່ງສາມາດຕິດຕາມການນຳເຂົ້າ, ຈຳໜ່າຍ ແລະ ນຳ ໃຊ້ນ້ຳມັນເຊື້ອໄຟໃຫ້ຖືກຕ້ອງ, ປ້ອງກັນການລັກລອບນຳເຂົ້າ ແລະ ການນຳໃຊ້ບໍ່ຖືກເປົ້າໝາຍ ທັງນີ້ແນໃສ່ໃຫ້ສາມາດ ເພີ່ມທະວີການຈັດເກັບລາຍຮັບພາສີອາກອນເຂົ້າງົບປະມານແຫ່ງລັດໃຫ້ໄດ້ຄົບຖ້ວນ, ທັນເວລາທີ່ສຳຄັນການກວດສອບຈະມີຄວາມຊັດເຈນ.
ທີ່ມາ http://www.sedthakid.la/khao/18407.spc