ສາຍການບິນ ສສ ຫວຽດນາມ ວາງແຜນທີ່ຈະປັບໂຄງສ້າງບໍລິສັດຫວຽດນາມແອເຊີວິສ (VASCO) ທີ່ເປັນບໍລິສັດໃນເຄືອດ້ວຍການຕັ້ງສາຍການບິນໃໝ່ທີ່ໃຫ້ບໍລິການໃນເສັ້ນທາງໄລຍະສັ້ນ.
ຕາມຂ່າວຕ່າງປະເທດລາຍງານວ່າ ທ່ານ ຝ່າມ ຫງອກ ມິງ ຜູ້ອຳນວຍການໃຫຍ່ສາຍການບິນຫວຽດນາມ ທີ່ເປັນສາຍການບິນແຫ່ງຊາດລະບຸວ່າ ສາຍການບິນໄດ້ຢື່ນແຜນການດັ່ງກ່າວຕໍ່ກະຊວງຄົມມະນາຄົມ ຊຶ່ງພາຍໃຕ້ຂໍ້ສະເໜີ ສາຍການບິນຫວຽດນາມຈະຕັ້ງບໍລິສັດຮ່ວມທຶນດ້ວຍທຶນກໍ່ຕັ້ງ 300 ຕື້ດົງ(ເກືອບ 15 ລ້ານໂດລາສະຫະລັດ) ໂດຍສາຍການບິນແຫ່ງຊາດຈະຖືຄອງຮຸ້ນ 51% ແລະ ສ່ວນທີ່ເຫຼືອ 49% ຈະເປັນຂອງທະນາຄານເພື່ອເຕັກໂນໂລຊີ ແລະ ການຄ້າ (Techcombank), ຖ້າຫາກກະຊວງຄົມມະນາຄົມອະນຸມັດແຜນການຂອງສາຍບິນຫວຽດນາມ ແລະ Techcombank ບໍລິສັດໃໝ່ຈະສາມາດໃຫ້ບໍລິການໄດ້ຕັ້ງແຕ່ໄຕມາດ 2 ຂອງປີນີ້ ໃນເສັ້ນທາງເດີມຂອງ VADCO, ສາຍການບິນຫວຽດນາມຫວັງວ່າ ບໍລິສັດໃໝ່ຈະສ້າງກຳໄລໄດ້ພາຍໃນປີທຳອິດຂອງການດຳເນີນການ ແລະ ຂະຫຍາຍຕົວຂຶ້ນເລື້ອຍໆໃນປີຕໍ່ໄປ ໂດຍບໍລິສັດຄາດວ່າ ຈະສ້າງລາຍໄດ້ຢູ່ທີ່ 2 ພັນຕື້ດົງໃນປີ 2016-2018.
ສາຍການບິນຫວຽດນາມກຳລັງເສຍສ່ວນແບ່ງຕະຫຼາດພາຍໃນປະເທດໃຫ້ກັບຫວຽດເຈັດແອ ສາຍການບິນຕົ້ນທຶນຕ່ຳ ແລະ ຄາດວ່າ ສາຍການບິນຫວຽດເຈັດອາດໄດ້ສ່ວນແບ່ງຕະຫຼາດພາຍໃນປະເທດແຊງສາຍການບິນຫວຽດນາມໃນປີນີ້. ຕາມການລະບຸຂອງສະມາຄົມຂົນສົ່ງທາງອາກາດສາກົນວ່າ: ຕະຫຼາດການບິນຫວຽດນາມຄາດວ່າ ຈະເປັນ 1 ໃນ 10 ຕະຫຼາດການບິນທີ່ເຕີບໂຕໄວທີ່ສຸດໃນໂລກ ໃນອີກ 2 ທົດສະວັດຕໍ່ໜ້າ.