ກອງປະຊຸມເຝີກອົບຮົມພະນັກງານຫຼັກແຫຼ່ງທົ່ວປະເທດ ເພື່ອກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ VIII ແລະ ສະພາປະຊາຊົນຂັ້ນແຂວງ ຈັດຂຶ້ນລະຫວ່າງວັນທີ 10-11 ກຸມພາ 2016 ທີ່ຫໍປະຊຸມແຫ່ງຊາດ ໂດຍເປັນປະທານຂອງທ່ານ ສຈ.ປອ. ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ ຄະນະກຳມະການເລືອກຕັ້ງລະດັບຊາດ ຫົວໜ້າອະນຸກຳມະການຊີວິດການເມືອງ ມີບັນດາທ່ານເລຂາຄະນະພັກກະຊວງ ອົງການທຽບເທົ່າກະຊວງ ແຂວງ ແລະ ນະຄອນຫຼວງ ເຂົ້າຮ່ວມ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ພ້ອມກັນເຊື່ອມຊຶມກຳແໜ້ນບາງບັນຫາເນື້ອໃນ ສຳຄັນຄື: ມະຕິຕົກລົງຂອງກົມການເມືອງສູນກາງພັກ ສະບັບເລກທີ 29/ກມສພ ວ່າດ້ວຍການເພີ່ມທະວີການຊີ້ນຳຂອງພັກ ຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກສະພາປະຊາຊົນຂັ້ນແຂວງ ເອກະສານກ່ຽວກັບຜົນງານ 40 ປີ ແຫ່ງການປົກປັກຮັກສາ ແລະ ສ້າງສາພັດທະນາ ສປປ ລາວ ການເສີມຂະຫຍາຍສິດເປັນເຈົ້າປະເທດຂອງປະຊາຊົນລາວບັນດາເຜົ່າ ແລະ ກົດໝາຍວ່າດ້ວຍສະພາແຫ່ງຊາດ ວ່າດ້ວຍສະພາປະຊາຊົນຂັ້ນແຂວງ ລວມທັງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສານປະຊາຊົນຂັ້ນແຂວງ.
ທັງນີ້ກໍ່ເພື່ອຮັບປະກັນໃຫ້ແກ່ການກະກຽມ ແລະ ດຳເນີນການເລືອກຕັ້ງໄປຕາມເນື້ອໃນຈິດໃຈຊີ້ນຳ ຂອງມະຕິຕົກລົງກົມການເມືອງສູນກາງພັກ ຖືກຕ້ອງສອດຄ່ອງກັບລັດຖະທຳມະນູນ ແລະ ກົດໝາຍ ຮັບປະກັນໃຫ້ຜູ້ມີສິດເລືອກຕັ້ງມີຄວາມຕື່ນຕົວ ແລະ ສະໝັກໃຈໄປໃຊ້ສິດໃນວັນເລືອກຕັ້ງຢ່າງຄົບຖ້ວນ ລົງຄະແນນສຽງໃຫ້ຖືກຕ້ອງຕາມກົດໝາຍ ແລະ ລະບຽບການ ພ້ອມທັງຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະພາປະຊາຊົນຂັ້ນແຂວງ ມີປະສິດທິຜົນ ແລະ ສຳເລັດຕາມຄາດໝາຍ.
ແຫລ່ງຂ່າວ:
