ສຳນັກຂ່າວຕ່າງປະເທດ ລາຍງານໃນວັນທີ 8 ກຸມພາຜ່ານມານີ້ວ່າ ອົງການການຢາເອີຣົບ ຫລື EMA ອອກມາລະບຸ ໄດ້ສ້າງຕັ້ງກຸ່ມນັກຊ່ຽວຊານ ເພື່ອແນໃສ່ເພີ່ມທະວີວຽກງານປິ່ນປົວ, ປ້ອງກັນ ແລະ ຕ້ານໄວຣັສຊິກ້າ (virus Zika) ພວມແຜ່ລະບາດຢູ່ອາເມຣິກາລາຕີນ ແລະ ອາດສ່ຽງແຜ່ລະບາດອອກສູ່ຫລາຍປະເທດໃນໂລກ ເນື່ອງຈາກປັດຈຸບັນ ໄວຣັສຊິກ້າ ໄດ້ແຜ່ລະບາດອອກສູ່ 31 ປະເທດໃນໂລກແລ້ວ.
ເຊື້ອໄວຣັສຊິກ້າ ຊຶ່ງແຜ່ເຊື້ອໂດຍມີຍຸງລາຍເປັນພາຫະນະ ໄດ້ມີການແຜ່ລະບາດຢ່າງວ່ອງໄວ ແລະ ອາດມີສ່ວນເຮັດໃຫ້ ຜູ້ຕິດເຊື້ອທີ່ເປັນແມ່ຍິງຖືພາ ເກີດລູກມາມີຮ່າງກາຍຜິດປົກກະຕິ ຄືກາຍເປັນເດັກທີ່ມີຫົວນ້ອຍ ຊຶ່ງມີລາຍງານກ່ຽວກັບກໍລະນີດັ່ງກ່າວແລ້ວ ຫລາຍກໍລະນີໃນພື້ນທີ່ແຜ່ລະບາດ.
ທັງນີ້ ໄວຣັສຊິກາ ຖືກຄົ້ນພົບເທື່ອທຳອິດ ໃນປະເທດອູກັນດາ ທາງພາກຕາເວັນອອກຂອງທະວີບອາຟຣິກາ ແຕ່ປີ 1947 ໂດຍໃນເວລານັ້ນ ຍັງບໍ່ທັນຖືເປັນເຊື້ອພະຍາດລະບາດຮ້າຍແຮງ, ແຕ່ພາຍຫລັງເກີດການລະບາດຂຶ້ນ ໃນພາກພື້ນອາເມຣິກາລາຕິນ ເມື່ອປີ 2015 ເປັນຕົ້ນມາ ໄດ້ເຮັດໃຫ້ອົງການອະນາໄມໂລກ ປະກາດພາວະສຸກເສີນ ດ້ານສາທາລະນະສຸກລະຫວ່າງປະເທດ ກ່ຽວກັບການລະບາດຂອງເຊື້ອພະຍາດດັ່ງກ່າວ.