ຊັນດາ ພິໄຊ ຜູ້ບໍລິການກູເກິລ ເຊີດເອັນຈິນຍອດນິຍົມຂອງຄົນທົ່ວໂລກ ໄດ້ຮັບລາງວັນຈາກຜົນງານທີ່ໂດດເດັ່ນເປັນຮຸ້ນຂອງບໍລິສັດມູນຄ່າ 199 ລ້ານໂດລາສະຫະລັດ ໃນປີທີ່ຜ່ານມາ ຊຶ່ງສົ່ງຜົນໃຫ້ເຂົາກາຍເປັນຜູ້ບໍລິຫານລະດັບສູງທີ່ມີລາຍໄດ້ສູງສຸດໃນສະຫະລັດ.
ພິໄຊ ມີອາຍຸ 43 ປີ ໄດ້ຮັບແຕ່ງຕັ້ງໃຫ້ເປັນຜູ້ບໍລິຫານລະດັບສູງຂອງບໍລິສັດຫຼັງມີການຕັ້ງບໍລິສັດລູກຂອງກູເກິລຊື່ ອັລຟາເບດໂດຍເຂົາໄດ້ຮັບມອບຮຸ້ນ 273,328 ຮຸ້ນເມື່ອວັນທີ 3 ກຸມພາທີ່ຜ່ານມາ ຊຶ່ງເຮັດໃຫ້ມູນຄ່າຫຸ້ນທີ່ພິໄຊຄອບຄອງຢູ່ທັງໝົດເພີ່ມຂຶ້ນເປັນ 650 ລ້ານໂດລາສະຫະລັດ.
ພິໄຊເລີ່ມເຮັດວຽກກັບກູເກິລຕັ້ງແຕ່ປີ 2004 ແລະເປັນຜູ້ພັດທະນາເຕັກໂນໂລຊີສຳຄັນໆຂອງກູເກິລຫຼາຍຢ່າງລວມເຖິງ Google Chrome ແລະ Google OS ຊຶ່ງເຮັດໃຫ້ຜົນປະກອບການຂອງບໍລິສັດເພີ່ມຂຶ້ນຫຼາຍໃນໄລຍະທີ່ຜ່ານມາ ເຂົ້າຍັງມີສ່ວນຮັບຜິດຊອບກັບການພັດທະນາຈີເມລ ແລະກູເກິລ ແມັບ ອີກດ້ວຍ.
ອາທິດກ່ອນບໍລິສັດອາຟາເບດຫາກໍແຊງໜ້າແອບເປິລໃນຖານະບໍລິສັດທີ່ມີມູນຄ່າຫຼາຍທີ່ສຸດຫຼັງມີລາຍໄດ້ 4,9 ພັນລ້ານໂດລາ ໃນໄລຍະໄຕມາດສຸດທ້າຍຂອງປີທີ່ຜ່ານມາ ຊຶ່ງເພີ່ມຂຶ້ນກວ່າປີກ່ອນທີ່ 4,7 ພັນລ້ານໂດລາ ໂດຍລາຍໄດ້ຕະຫຼອດປີຂອງເຂົາທັງໝົດຢູ່ທີ່ 16,3 ພັນລ້ານໂດລາ ເພີ່ມຂຶ້ນເຖິງ 23,4 ພັນລ້ານໂດລາຈາກຄ່າໂຄສະນາອອນລາຍ ຂະນະທີ່ບໍລິສັດອື່ນໆໃນທຸລະກິດໃກ້ຄຽງກັນລາຍໄດ້ຜັດຫຼຸດລົງ 3,6 ພັນລ້ານໂດລາໃນໄລຍະເວລາດຽວກັນ.