ໃນແຕ່ລະວັນ ຈະມີລູກຄ້າເຂົ້າມາໃຊ້ຈ່າຍໃນຕະຫຼາດລາວ-ອົດຊີ ບໍ່ຕ່ຳກວ່າ 600-700 ຄົນ ເພື່ອຊື້ສິນຄ້າທີ່ມາຈາກຫຼາຍແຂວງທາງພາກເໜືອ ທີ່ເປັນພືດຜັກ ສັດປີກ ຊີ້ນ ແລະ ປາທົ່ວໄປ ເຮັດໃຫ້ບັນຍາກາດໃນແຕ່ລະມື້ມີຄວາມຄຶກຄື້ນ ປັດຈຸບັນ ຂະຫຍາຍສະຖານທີ່ຕື່ມອີກ 1 ເຮັກຕາ ເພື່ອຮອງຮັບພໍ່ຄ້າ ແມ່ຄ້າ ທີ່ມາຈາກໃນຕົວເມືອງທີ່ມີຄວາມແອອັດ.
ທ່ານ ແສງເພັດ ພົມມະສານ ຫົວໜ້າຈັດສັນຕະຫຼາດລາວ-ອົດຊີ ກ່າວວ່າ: ຕະຫຼາດດັ່ງກ່າວ ໄດ້ສ້າງຕັ້ງຂຶ້ນມາແຕ່ປີ 2009 ແລະ ໄດ້ປະຕິບັດຕາມຂັ້ນເທິງຊີ້ນຳທຸກຂັ້ນຕອນ ກໍ່ຄືພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໃນການຈັດສັນສະຖານທີ່ ສິນຄ້າມີການຕິດລາຄາ ແລະ ເອົາໃຈໃສ່ຕໍ່ການຊີ້ນຳຜູ້ຄ້າຂາຍ ໃຫ້ມີຄວາມເປັນລະບຽບເປັນຢ່າງດີ ປັດຈຸບັນແມ່ນໄດ້ຮັບຄວາມໄວ້ວາງໃຈຈາກຜູ້ມາຊື້ມີຈຳນວນເພີ່ມຂຶ້ນ ເພາະສິນຄ້າສ່ວນໃຫຍ່ທີ່ນຳມາຈຳໜ່າຍໃນຕະຫຼາດແຫ່ງນີ້ ຈະມາຈາກຫຼາຍແຫ່ງ ເຊັ່ນ: ແຂວງວຽງຈັນ ຫຼວງພະບາງ ແລະ ແຂວງຊຽງຂວາງ ນັບແຕ່ເວລາ 2 ໂມງຈົນເຖິງ 10 ໂມງໃນແຕ່ລະວັນ.
ສຳລັບລູກຄ້າທີ່ມາໃຊ້ຈ່າຍ ສ່ວນໃຫຍ່ແມ່ນບຸກຄົນໃກ້ຄຽງພາຍໃນບໍລິເວນ ແລະ ແມ່ຄ້າທີ່ມາຈາກຫຼາຍຕົວເມືອງໃນນະຄອນຫຼວງ ເພື່ອນຳໄປຈຳໜ່າຍຕໍ່ ເນື່ອງຈາກຕະຫຼາດດັ່ງກ່າວ ເປັນຕະຫຼາດຂາຍຍົກ ລາຄາສິນຄ້າສ່ວນໃຫຍ່ຈະມີລາຄາຕ່ຳກວ່າຕະຫຼາດທົ່ວໄປ ສະຖານທີ່ກໍ່ກວ້າງຂວາງ ແລະ ພິເສດ ລົດໃຫຍ່ຈະບໍ່ມີການເກັບຄ່າບໍລິການ.
ປັດຈຸບັນ ໄດ້ບຸກເບີກເທເບຕົງໃນເນື້ອທີ່ 1 ເຮັກຕາ ໃນສະຖານທີ່ໃກ້ຄຽງ ເພື່ອຮອງຮັບຜູ້ຄ້າ ແລະ ຜູ້ຂາຍທີ່ຈະເພີ່ມຂຶ້ນໃນຕະຫຼາດ ສ່ວນໃຫຍ່ໃນຕົວເມືອງກໍ່ໄດ້ມີການຫຍັບຍ້າຍ ເພື່ອຫຼຸດຜ່ອນຄວາມແອອັດ ທັງນີ້ ເຈົ້າຂອງຕະຫຼາດຍັງມີເນື້ອທີ່ເຫຼືອໄວ້ອີກປະມານ 6-7 ເຮັກຕາ ໄວ້ຮອງ.
ແຫລ່ງຂ່າວ:
