ເພື່ອເປັນການຢັ້ງຢືນເຖິງຜົນສຳເລັດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳປີຂອງເມືອງນາຊາຍທອງ, ທັງເປັນການກະຕຸກຊຸກຍູ້ ແລະ ສົ່ງເສີມການຜະລິດດ້ານກະສິກຳ, ອຸດສາຫະກຳ ແລະຫັດຖະກຳຢູ່ພາຍໃນເມືອງ ແລະ ຕ່າງເມືອງໄດ້ນຳເອົາຜະລິດຕະພັນຂອງຕົນມາວາງສະແດງ ແລະ ຂາຍອອກສູ່ສັງຄົມ, ທີ່ບ້ານແຈ້ງສະຫວ່າງ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດງານວາງສະແດງສິນຄ້າຂຶ້ນເປັນເວລາ 7 ວັນເລີ່ມແຕ່ວັນທີ 9-15 ກຸມພາ 2016 ໂດຍງານດັ່ງກ່າວແມ່ນຈັດຂຶ້ນເປັນປີທີ 21 ຕິດຕໍ່ກັນ ຊຶ່ງປີນີ້ມີຮ້ານເຂົ້າຮ່ວມວາງສະແດງແລະຂາຍສິນຄ້າທັງໝົດ 322 ຮ້ານ, ມູນຄ່າລວມຂອງສິນຄ້າ 4,76 ຕື້ກວ່າກີບ.
ພິທີເປີດງານວາງສະແດງສິນຄ້າຄັ້ງນີ້ຈັດຂຶ້ນໃນຕອນແລງວັນທີ 9 ກຸມພາ 2016 ໂດຍໃຫ້ກຽດເຂົ້າຮ່ວມຂອງ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນທ່ານ ຮສຈ ຄຳພາດ ສຸລິນພູມີ ລັດຖະ ມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ພ້ອມດ້ວຍເຈົ້າເມືອງນາຊາຍທອງ,ຫົວໜ້າກົມສົ່ງເສີມການຜະລິດເປັນສິນຄ້າ, ຫົວໜ້າພະແນກອຸດສາຫະກຳ ແລະການຄ້າຕະຫຼອດຮອດບັນດາຫ້າງຮ້ານພາກສ່ວນທີ່ກ່ຽວຂ້ອງອີກຈຳນວນໜຶ່ງ.
ໂອກາດນີ້ ຄະນະຈັດງານດັ່ງກ່າວ ໄດ້ລາຍງານໃຫ້ຮູ້ວ່າ: ການຈັດງານ ຕະຫຼາດນັດຄັ້ງນີ້ເປັນການສະຫຼຸບຄືນການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ປະຈຳປີຂອງເມືອງນາ ຊາຍທອງໃນ 1 ປີຜ່ານມາ ແລະເປັນການສ້າງເງື່ອນໄຂໃຫ້ຊາວກະສິກອນ, ຊາວຊ່າງຫັດຖະກຳ, ຄອບຄົວຕົວແບບ, ຫົວໜ່ວຍທຸລະກິດດ້ານຕ່າງໆພາຍໃນ ເມືອງ ແລະຕ່າງເມືອງໄດ້ນຳເອົາຜະລິດ ຕະພັນຂອງຕົນມາວາງສະແດງ ແລະ ຂາຍອອກສູ່ສັງຄົມ ຊຶ່ງການຈັດງານຕະ ຫຼາດນັດຄັ້ງນີ້ຖືເປັນຄັ້ງທີ 21 ໃນທ່າມກາງທີ່ນະຄອນຫຼວງວຽງຈັນ ເວົ້າສະເພາະກໍຄືເມືອງນາຊາຍທອງພວມໄດ້ຮັບ ການພັດທະນາຂຶ້ນຫຼາຍດ້ານ ແລະໃນໂອກາດທີ່ ສປປ ລາວ ໄດ້ເຂົ້າເປັນສະ ມາຊິກປະຊາຄົມເສດຖະກິດອາຊຽນ (AEC) ຢ່າງເປັນທາງການແລ້ວໃນ ທ້າຍປີ 2015 ຜ່ານມາ.
ຄະນະຈັດງານຍັງໃຫ້ຮູ້ຕື່ມວ່າ: ສຳ ລັບງານນີ້ໄດ້ມີຮ້ານເຂົ້າຮ່ວມວາງສະແດງ ແລະຂາຍສິນຄ້າຈຳນວນ 322 ຮ້ານເປັນຕົ້ນ: ກົມກອງລວມໝູ່ ແລະຫ້ອງການອ້ອມຂ້າງເມືອງ, ຜະລິດຕະ ພັນສິນຄ້າໂອດັອບພາຍໃນເມືອງ, ຄອບຄົວຕົວແບບຜະລິດເປັນສິນຄ້າດ້ານ ຕ່າງໆ, ຜົນຜະລິດຂອງປະຊາຊົນພາຍ ໃນເມືອງ, ໂຮງຈັກໂຮງງານ, ໂຮງຊ່າງ ຫັດຖະກຳ ແລະອື່ນໆອີກຫຼວງຫຼາຍ ເມື່ອທຽບໃສ່ປີ 2015 ເຫັນວ່າຮ້ານວາງສະແດງສິນຄ້າປະເພດຕ່າງໆແມ່ນເພີ່ມຂຶ້ນ 5%, ນອກຈາກການວາງສະແດງຂາຍສິນຄ້າຕາມເປົ້າໝາຍ ແລະທົ່ວໄປແລ້ວ ຍັງມີລາຍການຄົບງັນມ່ວນຊື່ນຕ່າງໆເຊັ່ນ: ລຳວົງສາມັກຄີ, ຊິງຊ້າມ້າໝຸນ ແລະອື່ນໆຕະຫຼອດງານ.
ຢ່າງໃດກໍຕາມຕະຫຼາດນັດປີນີ້ ຄະນະຈັດງານຄາດວ່າລາຍຮັບຈາກການຂາຍ ສິນຄ້າຈະມີມູນຄ່າເພີ່ມຂຶ້ນ ແລະຈະເປັນກຳລັງແຮງຕໍ່ການພັດທະນາເສດຖະ ກິດ-ສັງຄົມໃນທາງກົງ ແລະທາງອ້ອມຂອງເມືອງ ຊຶ່ງເຮົາສາມາດສັງເກດເຫັນວ່າຕົວເລກການຂະຫຍາຍຕົວທາງດ້ານເສດຖະກິດຂອງເມືອງຢູ່ໃນລະດັບ 9,2% ຕໍ່ປີ ແລະຜົນຜະລິດທາງດ້ານກະສິກຳກໍເຫັນວ່າມີສ່ວນເຫຼືອກິນສາມາດແຮໄວ້ ແລະຂາຍເປັນສິນຄ້າພາຍ ໃນ ແລະສົ່ງອອກຕ່າງປະເທດ.
ທີ່ມາ: