ວັນທີ 4 ກຸມພາ 2016 ທີ່ກອງບັນຊາການ ປກສ ເມືອງບໍລິຄັນ ແຂວງບໍລິຄຳໄຊ ໄດ້ສຶກສາອົບຮົມຊາວໜຸ່ມໄວໜຸ່ມກຸ່ມແກ້ງທີ່ມົ້ວສຸມຄ້າ-ຂາຍ ແລະເສບຢາເສບຕິດຫຼີ້ນກິນຟຸ່ມເຟືອຍ, ທ່ຽວເດິກເກີນໂມງເວລາ ແລະດັດແປງສະພາບລົດຈັກໃຊ້ສຽງດັງລົບກວນຄົນອື່ນ ຈຳນວນ 18 ຄົນ, ຍິງ 1 ຄົນ, ໂດຍເປັນປະທານຂອງທ່ານ ພັນໂທ ເຄນວອນ ລໍວັນໄຊ ຫົວໜ້າກອງບັນຊາການ ປກສ ເມືອງບໍລິຄັນ,ໃຫ້ກຽດເຂົ້າຮ່ວມ ໂດຍທ່ານ ບຸນສວນ ຂຸນໄຊລິດາ ຮອງເຈົ້າເມືອງບໍລິຄັນ, ມີຄະນະກອງບັນຊາການ ປກສ ເມືອງ, ມີອຳນາດການປົກຄອງບ້ານທີ່ກ່ຽວຂ້ອງ,ພໍ່ແມ່ຜູ້ປົກຄອງ ແລະກຸ່ມເປົ້າໝາຍເຂົ້າຮ່ວມຮັບຟັງ.
ທ່ານ ພັນຕີ ໄຂ່ຄຳ ປັນຍານຸວົງ ຮອງ ກອງບັນຊາການ ປກສ ເມືອງ ບໍລິຄັນຊີ້ນຳວຽກງານຕຳຫຼວດ ໄດ້ໃຫ້ຮູ້ວ່າ: ໃນວັນທີ 1-3 ກຸມພາ 2016 ໂດຍເຄື່ອນໄຫວ ສົມທົບກັບ ປກສ ກຸ່ມເຂດເທດສະບານ ພ້ອມທັງອຳນາດການປົກຄອງບ້ານໄດ້ ລົງກວດກາເປົ້າໝາຍພົບເຫັນກຸ່ມໄວໜຸ່ມ ຈຳນວນໜຶ່ງ ຊຶ່ງພວກກ່ຽວແມ່ນຢູ່ໃນ ເປົ້າໝາຍຄ້າ-ຂາຍ, ເສບຢາເສບຕິດທາງ ເຈົ້າໜ້າທີ່ຈິ່ງໄດ້ກວດຄົ້ນພ້ອມກັກຕົວ ພວກກຽ່ວໄດ້ຈຳນວນ 18 ຄົນ, ຍິງ 1 ຄົນ ພົບເຫັນຢາບ້າ ຈຳນວນ 75 ເມັດ, ກັກລົດຈັກ ຈຳນວນ 9 ຄັນ, ໃນນັ້ນ ຄ້າ-ຂາຍຢາເສບຕິດ ມີ 3 ຄົນ.
ຜ່ານການສືບສວນ-ສອບສວນ ພວກ ກ່ຽວຮັບສາລະພາບວ່າ ຜ່ານມາໄດ້ມົ້ວ ສຸມເສບຢາເສບຕິດເປັນອາຈິນ ແລະຄ້າ- ຂາຍຢາເສບຕິດໃຫ້ກັບໄວໜຸ່ມຂອບເຂດ ເທສະບານ, ທ່ຽວຫຼິ້ນເດີກຢູ່ຕາມຮ້ານ ບັນເທີງ ແລະຂັບຂີ້ລົດຈັກທີມີການດັດ ແປງສະພາບໃຊ້ສຽງດັງລົບກວນໃນ ຍາມເດິກດື່ນ.
ທ່ານ ພັນຕີ ໄຂ່ຄຳ ປັນຍານຸວົງ ຍັງ ໄດ້ໃຫ້ຮູ້ຕື່ມອີກວ່າ: ຕໍ່ກັບກຸ່ມເປົ້າໝາຍດັ່ງກ່າວເຫັນວ່າມີການພົວພັນມົ້ວສຸມ ຄ້າ-ຂາຍ ແລະເສບຢາເສບຕິດແທ້ຈິງທາງ ເຈົ້າໜ້າທີ່ ປກສ ເມືອງບໍລິຄັນ ພວກເຮົາຈະໄດ້ດຳເນີນການສືບສວນ-ສອບສວນຕໍ່ພວກກ່ຽວຕາມຂັ້ນຕອນຂອງກົດໝາຍເພື່ອຂະຫຍາຍຜົນຫາພັກພວກທີ່ຮ່ວມ ຂະບວນການມາດຳເນີນຄະດີຕາມລະ ບຽບກົດໝາຍສ່ວນຮ້ານບັນເທິງຕ່າງໆ ທີ່ໄດ້ເປີດບໍລິການເກີນເວລາທີ່ກຳນົດ ໄວ້ຈະໄດ້ສຶກສາອົບຮົມກ່າວເຕືອນຕາມລະບຽບລະບຽບການທີ່ໄດ້ກຳນົດໄວ້.
ຫຼັງຈາກນັ້ນທ່ານ ບຸນສວນ ຂຸນໄຊລິດາ ກໍໄດ້ໂອ້ລົມຕໍ່ກຸ່ມມົ້ວສຸມຄ້າ-ຂາຍ ແລະເສບຢາເສບຕິດ ຊຶ່ງທ່ານໄດ້ຍົກໃຫ້ເຫັນຜົນຮ້າຍໄພອັນຕະລາຍຂອງຢາເສບ ຕິດພ້ອມຮຽກຮ້ອງໃຫ້ຜູ້ເສບຢາເສບຕິດທຸກຄົນຈົ່ງພ້ອມກັນຕື່ນຕົວສະໝັກໃຈໄປ ບຳບັດດັດສ້າງ ແລະຢຸດເຊົາບໍ່ໄປມົ້ວສຸມ ເສບຢາເສບຕິດອີກ, ກັບຕົວກັບໃຈມາເປັນ ລູກທີ່ດີຂອງພໍ່ແມ່ ແລະຄອບຄົວ, ເປັນພົນລະເມືອງດີຂອງສັງຄົມ, ປະກອບອາ ຊີບຖືກຕ້ອງຕາມລະບຽບກົດໝາຍ ແລະ ໃຫ້ອຳນາດການປົກຄອງທຸກຂັ້ນພ້ອມ ດ້ວຍຄອບຄົວພໍ່ແມ່ຜູ້ປົກຄອງທຸກຄົນຈົ່ງພ້ອມກັນເອົາໃຈໃສ່ສຶກສາ-ອົບຮົມ ລູກຫຼານຂອງຕົນບໍ່ໃຫ້ໄປຫຍຸ້ງກ່ຽວພົວພັນຄ້າ-ຂາຍ, ເສບຢາເສບຕິດ ແລະຕິດ ຕາມການເຄື່ອນໄຫວການປະພຶດຂອງ ເຂົາເຈົ້າຢ່າງໃກ້ຊິດ ທັງໝົດນີ້ກໍເພື່ອເຮັດ ໃຫ້ຄອບຄົວ, ສັງຄົມ ແລະປະເທດຊາດມີ ຄວາມສະຫງົບປອດໄພ, ສັງຄົມມີຄວາມ ເປັນລະບຽບຮຽບຮ້ອຍ ແລະເພື່ອເປັນການສະກັດກັ້ນແກ້ໄຂບັນຫາຢາເສບຕິດໃຫ້ໝົດໄປຈາກສັງຄົມເທື່ອລະກ້າວ.
ທີ່ມາ: