ຈາກສະພາບເກົ່າແກ່ຂອງຄິວລົດສາຍໃຕ້ ທີ່ໃຊ້ງານມາໄດ້ຫຼາຍປີ ໄດ້ເຮັດໃຫ້ບາງສະຖານທີ່ບໍລິການມີການເພພັງ ແລະບໍ່ໄດ້ຮັບການແກ້ໄຂ ຫຼືສ້ອມແປງຄືນ ໂດຍສະເພາະແມ່ນສະພາບຫ້ອງນ້ຳ ນອກຈາກບໍ່ສະອາດແລ້ວ ຍັງບໍ່ພຽງພໍກັບຄວາມຮຽກຮ້ອງຕ້ອງການຂອງຜູ້ໃຊ້ບໍລິການ.
ຜູ້ໂດຍສານຜູ້ໜຶ່ງທີ່ກຳລັງເດິນທາງໄປຈຳປາສັກ ໄດ້ກ່າວຕໍ່ນັກຂ່າວພວກເຮົາວ່າ ຫ້ອງນ້ຳຢູ່ສະຖານີລົດໂດຍສານສາຍໃຕ້ມີບໍ່ພຽງພໍກັບການໃຊ້ບໍລິການ ສຳລັບຫ້ອງນ້ຳຊາຍນັ້ນມີພຽງ 3 ຫ້ອງ ແລະບໍ່ມີໂຖສຳລັບຖ່າຍເບົາເລີຍ ພ້ອມທັງຍັງມີຄວາມເປິເປື້ອນ ບໍ່ສົມກັບວ່າເປັນຫ້ອງນ້ຳທີ່ເກັບຄ່າບໍລິການຄັ້ງລະ 2,000 ກີບ.
ຜູ້ໂດຍສານຕ່າງປະເທດຜູ້ໜຶ່ງ ທີ່ບໍ່ປະສົງອອກນາມໄດ້ໃຫ້ສຳພາດວ່າ ຂ້ອຍທຽວມາປະເທດລາວເກືອບທຸກປີ ເພື່ອມາພົວພັນວຽກ ຂ້ອຍໃຊ້ບໍລິການລົດໂດຍສານສາຍໃຕ້ທຸກເທື່ອ ຂ້ອຍສັງເກດເຫັນວ່າຈຳນວນລົດເມໄດ້ເພິ່ມຂຶ້ນຫຼາຍ ແລະຜູ້ໂດຍສານກໍເພິ່ມຂຶ້ນຢ່າງຫຼວງຫຼາຍເຊັ່ນກັນ ມີທັງຄົນລາວແລະຕ່າງປະເທດ. ແຕ່ສິ່ງທີ່ຢາກຮຽກຮ້ອງໃຫ້ປັບປຸງອັນທຳອິດແມ່ນເລື່ອງຫ້ອງນ້ຳ ຄວນຈະຕ້ອງມີການປັບປຸງເລື່ອງຄວາມສະອາດ, ມີຫ້ອງຖ່າຍໜັກ ແລະຖ່າຍເບົາຢ່າງພຽງພໍ ແລະຫ້ອງຖ່າຍໜັກຄວນຈະເປັນຊັກໂຄກ ເພິ່ມຄວາມສະດວກແກ່ຜູ້ໃຊ້ບໍລິການໃຫ້ດີທີ່ສຸດ ເພື່ອຕອບສະໜອງກັບຜູ້ໂດຍສານທີ່ເພິ່ມຂຶ້ນ ໃນໂອກາດທີ່ບັນດາປະເທດອາຊ່ຽນໄດ້ໂຮມໂຕກັນເປັນ ປະຊາຄົມເສດຖະກິດອາຊຽນ ເລື່ອງການບໍລິການກໍຕ້ອງໄດ້ປັບປຸງໃຫ້ມີສະຖານະໃກ້ຄຽງກັນກັບບັນດາປະເທດເພື່ອນບ້ານ.
