ທະນາຄານ​ຮ່ວມ​ທຸລະ​ກິດ​ລາວ-ຫວຽດ ສືບຕໍ່​ປະກອບສ່ວນ​ເຂົ້າ​ໃນ​ການ​ຊ່ວຍເຫຼືອ​ສັງຄົມ ໂດຍ​ສະເພາະ ໃນ​ຂະແໜງການ​ສຶກ​ສາ ຊຶ່ງ​ໃນ​ມໍ່ໆ​ຜ່ານ​ມາ ໄດ້​ມອບ​ທຶນ​ການ​ສຶກ​ສາ ມູນ​ຄ່າ 5 ລ້ານ​ກີບ ໃຫ້​ກັບ​ນັກຮຽນ​ເກັ່ງ​ທົ່ວ​ປະເທດ ວິຊາ​ຄະນິດສາດ ປະຈຳ​ປີ 2013.

ພິທີ​ມອບ​ທຶນ​ການ​ສຶກ​ສາ​ດັ່ງກ່າວ ໄດ້​ຈັດ​ຂຶ້ນ​ໃນ​ກາງ​ເດືອນ​ມີນາ 2014 ຜ່ານ​ມາ ໃນ​ງານ​ຄັດ​ເລືອກ​ນັກ​ສຶກ​ສາ​ຄົນ​ງາມ ຄົນ​ເກັ່ງ ຂອງ​ນັກ​ສຶກ​ສາ​ຫວຽດນາມ ທີ່​ມະຫາວິທະຍາໄລ​ແຫ່ງ​ຊາດ ຊຶ່ງ​ນ້ອງ​ນັກຮຽນ​ທີ່​ໄດ້​ຮັບ​ທຶນ​ການ​ສຶກ​ສາ​ຄັ້ງ​ນີ້ ແມ່ນ​ທ້າວ ຕູ້​ລີ ນັກ​ສຶກ​ສາ​ປີ​ທີ 1 ສາຂາ​ວິຊາ​ຄູ​ຄະນິດສາດ ຄະນະ​ສຶກ​ສາ​ສາດ ມະຫາວິທະຍາໄລ​ແຫ່ງ​ຊາດ ແລະ ມອບ​ໂດຍ​ທ່ານ ດັ້ງ ແທງ ຫວຽດ ຮອງ​ຜູ້ອຳນວຍການ​ໃຫຍ່ ທະນາຄານ​ຮ່ວມ​ທຸລະ​ກິດ​ລາວ-ຫວຽດ.

ການ​ມອບ​ທຶນ​ຄັ້ງ​ນີ້ ແນໃສ່​ເພື່ອ​ສະໜັບສະໜູນ​ນັກຮຽນ​ດີ ຮຽນ​ເກັ່ງ​ແຕ່​ຂາດເຂີນ​ດ້ານ​ທຶນຮອນ ແນໃສ່​ສ້າງ​ເງື່ອນໄຂ​ໃຫ້​ເຂົາເຈົ້າ​ໄດ້​ສຶກ​ສາ​ຮ່ຳຮຽນ ເຝິກຝົນ​ຫຼໍ່​ຫຼອມ​ຕົນ​ເອງ ໃຫ້​ກາຍເປັນ​ບຸກ​ຄະລາ​ກອນ​ທີ່​ມີ​ຄວາມ​ຮູ້ ຄວາມ​ສາມາດ ມີ​ຄຸນສົມບັດ​ເພື່ອ​ຮັບ​ໃຊ້​ປະເທດ​ຊາດ.

ທີ່ມາ  http://www.vientianemai.net/teen/khao/1/11496