ພະ​ແນກ​ຕຳຫຼວດ​ຈະລາຈອນ ນະຄອນຫຼວງ​ວຽງ​ຈັນ ໄດ້​ເອົາ​ຈິງເອົາ​ຈັງ​ຕໍ່​ຜູ້​ຂັບ​ຂີ່​ທີ່​ລະເມີດ​ກົດ​ລະບຽບ​ຈະລາຈອນ ໂດຍ​ສະເພາະແມ່ນ​ການ​ຈອດ​ລົດ​ຊະຊາຍ ຈອດລົດ​ຢູ່​ເຂດ​ຕ້ອງ​ຫ້າມ (ມີ​ປ້າຍຫ້າມ) ເຊິ່ງ​ຜູ້​ທີ່​ລະເມີດ​ແມ່ນ​ຈະຖືກ​ປັບ​ໃໝ​ສິບ​ເທົ່າ​ຕົວ​ຂອງ​ມູນຄ່າ​ການ​ປັບ​ ໃໝ ​ຕາມ​ມາດຕາ 14 ຄື: ລົດຈັກ 30.000 ກີບ ຄູນ 10 ເທົ່າ​ກັບ 300.000 ກີບ ລົດ​ສາມລໍ້​ຕິດ​ເຄື່ອງ​ຈັກ 50.000 ກີບ ຄູນ 10 ເທົ່າ​ກັບ 500.000 ກີບ ລົດເບົາ ລົດ​ເກງ ກະບະ ຈິບ ແລະ ລົດ​ຕູ້ 70.000 ກີບ ຄູນ 10 ເທົ່າກັບ 700.000 ກີບ ລົດ​ໂດຍສານ 4 ລໍ້ 100.000 ກີບ ຄູນ 10 ເທົ່າກັບ 1.000.000 ກີບ ລົດ​ບັນທຸກ 6 ລໍ້ 150.000 ກີບ ຄູນ 10 ເທົ່າກັບ 1.500.000 ກີບ ແລະ ລົດບັນທຸກ 10 ລໍ້​ຂຶ້ນ​ໄປ 200.000 ກີບ ຄູນ 10 ເທົ່າ​ກັບ 2.000.000 ກີບ.

ການ​ລົງ​ປະຕິບັດ​ກົດ​ລະບຽບຈະລາຈອນ​ຂອງ​ເຈົ້າ​ໜ້າທີ່ ກໍ່ເພື່ອ​ປະຕິບັດ​ຕາມ​ມະຕິ​ຕົກລົງຂອງ​ອົງການ​ປົກຄອງ​ນະຄອນຫຼວງ​ວຽງ​ຈັນ ກ່ຽວ​ກັບ​ແຜນ​ວຽກງານ ແລະ ມາດ​ຕະ​ການຈັດຕັ້ງປະຕິບັດ​ໂຄງການ​ວຽງ​ຈັນ​ສະອາດ​ໄລຍະ​ສະເພາະ​ໜ້າ ແລະ ຮອດ​ປີ 2020 ທັງ​ນີ້​ກໍ່​ເພື່ອ​ເຮັດໃຫ້ການ​ສັນຈອນ​ໄປ​ມາ​ຕາມ​ເສັ້ນທາງ​ຕ່າງໆ ເວົ້າ​ລວມ ເວົ້າ​ສະເພາະແມ່ນ​ເສັ້ນທາງ​ຢູ່ 4 ເມືອງ ໃນ​ມີ​ຄວາມ​ຄ່ອງ​ຕົວ​ໄລຍະ​ເວລາໂມງ​ເຂົ້າ​ການ-ເລີກ​ການ ແລະ ຫຼີກ​ຫຼ່ຽງ​ຈາກ​ບັນຫາ​ການ​ເກີດ​ອຸບັດ​ຕິ​ເຫດ ສະນັ້ນ ມັນ​ຈຶ່ງ​ຮຽກຮ້ອງທຸກ​ຄົນ​ທົ່ວ​ສັງຄົມ​ຈົ່ງ​ມີ​ສະຕິ ແລະ ເປັນ​ເຈົ້າ​ການ​ນຳ​ກັນ ​ໃນການ​ປະຕິບັດ​ກົດ​ລະບຽບ​ຈະລາຈອນ​ທີ່​ເຈົ້າ​ໜ້າທີ່​ກຳນົດ​ໄວ້​ຢ່າງເຄັ່ງ​ ຂັດ ເພື່ອ​ເປັນ​ການ​ຫຼຸດຜ່ອນບັນຫາ​ຕ່າງໆ​ທີ່​ຈະ​ເກີດ​ຂຶ້ນ​ຢູ່​ຕາມຖະໜົນ.