ພູຄຳ ອົ້ວນວນສາ ນັກທຸລະກິດແຂວງຊຽງຂວາງຕົວແທນລັດໃຫ້ເປັນຜູ້ພັດທະນາເຂດທົ່ງໄຫຫີນກາຍເປັນແຫຼ່ງເສດຖະກິດດຶງດູດນັກລົງທຶນສ້າງລາຍຮັບແກ່ປະຊາຊົນກໍຄືປະເທດຊາດ ປະຈຸບັນລົງມືສ້າງແລ້ວພະເຈົ້າໃຫຍ່ອົງຫຼວງ, ສ່ວນແຜນງານອື່ນໆຈະດຳເນີນໄປຕາມຂັ້ນຕອນເປັນລຳດັບ.
ທ່ານ ພູຄຳ ອົ້ວນວນສາ ປະທານກຸ່ມວິສາຫະກິດສວນພູຄຳ ຄະນະກຳມະການຮັບຜິດຊອບສ້າງວັດພະເຈົ້າໃຫຍ່ອົງຫຼວງໃຫ້ ສຳພາດຕໍ່ສື່ມວນຊົນພວກເຮົາບໍ່ດົນມານີ້ວ່າ: ເພື່ອຫັນທິດປ່ຽນແປງໃໝ່ຮອບດ້ານອຳນາດການປົກຄອງ ແຂວງຊຽງຂວາງໄດ້ວາງເປົ້າໝາຍການພັດນາ ແລະຍຸດທະສາດການພັດທະນາ ແລະກຳລັງເລັ່ງກຳນົດເຂດທົ່ງໄຫຫີນໃຫ້ເປັນເຂດເສດຖະກິດສະເພາະການທ່ອງທ່ຽວເພື່ອຫັນໃຫ້ເປັນທ່າແຮງດ້ານລາຍຮັບ, ສະນັ້ນ ໃນນາມກຸ່ມວິ ສາຫະກິດສວນພູຄຳກໍໄດ້ຮັບກຽດຈາກພາກລັດມີສ່ວນຮ່ວມໃນການພັດທະນາເຂດດັ່ງກ່າວ ໂດຍເປັນຕົວແທນໃຫ້ແກ່ພາກລັດປຸກລະດົມການລົງທຶນຂອງນັກທຸລະກິດຕ່າງໆບໍ່ວ່າຈະເປັນສະໜາມກ໊ອຟ, ເຮືອນພັກຜູ້ສູງອາຍຸ, ໂຮງແຮມ ລີສອດ, ສວນວັດທະນະທຳບັນດາເຜົ່າ, ສູນຂໍ້ມູນການທ່ອງທ່ຽວ, ການລົງທຶນ, ການພົບປະຕ່າງໆຂອງນັກທຸລະກິດ ແລະອື່ນໆ ເພື່ອດຶງດູດການທ່ອງທ່ຽວດຶງລາຍຮັບຈາກການທ່ອງທ່ຽວ.
ມາຮອດປະຈຸບັນ ອຳນາດການປົກຄອງເມືອງແປກກຳລັງຂຸ້ນຂ້ຽວກຳນົດຂອບເຂດ ຊຶ່ງຄາດວ່າກາງປີ 2016 ນີ້ຈະສຳເລັດການແຕ້ມແຜນວາດການພັດທະນາທັງໝົດ ແລະ ການສ້າງວັດພະເຈົ້າໃຫຍ່ອົງຫຼວງທົ່ງໄຫຫີນກໍເປັນກິດຈະກຳໜຶ່ງຕິດພັນກັບການທ່ອງທ່ຽວ ຊຶ່ງການສ້າງວັດນີ້ ແມ່ນລົງມືກໍ່ສ້າງແລ້ວມາຮອດປະຈຸບັນສຳເລັດ 30% ແລະສາມາດລະດົມທຶນໄດ້ແລ້ວ 1 ລ້ານກວ່າໂດລາສະຫະລັດ ໃນນີ້ ລວມການຊ່ວຍເຫຼືອຂອງປະເທດຫວຽດນາມ ແລະອອກຕົນຍາດໂຍມກໍຄືຊາວພຸດທະສາສະໜາໄດ້ອຸໂປໂມທະນາສ້າງ.
ສະເພາະກຸ່ມວິສາຫະກິດສວນພູຄຳ ກໍໄດ້ທຸ່ມເທທຶນຮອນ ແລະເຫື່ອແຮງຫຼາຍແສນໂດລາພັດທະນາເສັ້ນທາງ, ຕັດຈອມພູສ້າງວັດ ແລະອື່ນໆ ເພື່ອເຮັດໃຫ້ເກີດເປັນຮູບປະທຳຕາມເນື້ອໃນຈິດໃຈຂອງການພັດທະນາແຂວງຊຽງຂວາງ ນອກຈາກນີ້ ໃນເຂດເສດຖະກິດສະເພາະນີ້ແມ່ນຈະໃຫ້ປະຊາຊົນມີສ່ວນຮ່ວມຕິດພັນທາງດ້ານລາຍຮັບຂອງເຂົາເຈົ້າ ຊຶ່ງໂຄງການທັງໝົດຜົນປະໂຫຍດຈະໄດ້ຄືປະຊາຊົນ ແລະລັດຈະໄດ້ຮັບຫຼາຍກວ່າ.
ທີ່ມາ: