ສຳນັກຂ່າວຕ່າງປະເທດ ລາຍງານໃນວັນທີ 1 ກຸມຜາຜ່ານມານີ້ວ່າ ກຳປູເຈຍສົ່ງອອກເສື້ອຜ້າສຳເລັດຮູບ ແລະ ຜະລິດຕະພັນເກີບ ສ້າງລາຍຮັບເຂົ້າປະເທດໃນປີ 2015 ຜ່ານມາ ບັນລຸ 7.1 ຕື້ໂດລາ ຊຶ່ງເພີ່ມຂຶ້ນ 14.5% ເມື່ອທຽບກັບປີຜ່ານມາ ໂດຍຕະຫລາດຕົ້ນຕໍ ແມ່ນສົ່ງໄປປະເທດໃນທະວີບເອີຣົບ, ສະຫະລັດອາເມຣິກາ ແລະ ການາດາ.

ທ່ານ ກຽດ ຊົນ ຮອງນາຍົກລັດຖະມົນຕີກຳປູເຈຍ ໄດ້ລະບຸວ່າ ການເຕີບໂຕທາງດ້ານເສດຖະກິດຂອງກຳປູເຈຍ ແມ່ນຢູ່ໃນລະດັບປະມານ 7% ໃນປີ 2015 ແລະ ອຸດສາຫະກຳຕັດຫຍິບ ນັບວ່າເປັນຂະແໜງການທີ່ມີບົດບາດ ສົ່ງຜົນໃຫ້ແກ່ອັດຕາການເຕີບໂຕ ທາງດ້ານເສດຖະກິດດັ່ງກ່າວນີ້ ໂດຍລັດຖະບານກຳປູເຈຍ ຈະພະຍາຍາມ ຊອກຫາຕະຫລາດຕ່າງປະເທດແຫ່ງໃໝ່ ເພື່ອຮອງຮັບໃຫ້ແກ່ ຜະລິດຕະພັນຕັດຫຍິບຂອງກຳປູເຈຍ.

ທັງນີ້ ເນື່ອງຈາກພາກອຸດສາຫະກຳຕັດຫຍິບ ແມ່ນເປັນແຫລ່ງລາຍຮັບຈາກການສົ່ງອອກ ທີ່ຫລາຍທີ່ສຸດຂອງກຳປູເຈຍ ໂດຍມີໂຮງງານອຸດສາຫະກຳຕັດຫຍິບ ປະມານ 1,007 ແຫ່ງໃນທົ່ວປະເທດ ແລະ ມີແຮງງານໃນຂະແໜງການດັ່ງກ່າວ ຫລາຍກ່ວາ 754,000 ຄົນ ຊຶ່ງມີລາຍຮັບຂັ້ນຕ່ຳຢູ່ທີ່ 140 ໂດລາຕໍ່ເດືອນ.