ຕາມການໃຫ້ສຳພາດຂອງທ້າວໂກ້ ປະຊາຊົນບ້ານນາກະສັງ ເມືອງໂຂງ ແຂວງຈຳປາສັກ ຜູ້ທີ່ພົບເຫັນເທວະຮູບທອງເຫຼືອງ ແລະ ໄດ້ມາໃນຂະນະທີ່ຜູ້ກ່ຽວລົງທ່າໄປຕຶກແຫຫາປາຕາມປົກກະຕິຜູ້ກ່ຽວເລົ່າສູ່ນັກຂ່າວພວກເຮົາຟັງວ່າ : ໃນເວລາກາງຄືນໄດ້ນອນຝັນເຫັນຜູ້ຊາຍຮູບຮ່າງໃຫຍ່, ດຳ ມາຖາມວ່າ ມຶງຢາກໄດ້ຂອງບໍກູຊິໃຫ້ ຜູ້ກ່ຽວກໍ່ຕອບໃນຄວາມຝັນວ່າ ຢາກໄດ້ ແລະ ກໍ່ຮູ້ເມື່ອ. ຮຸ່ງເຊົ້າປະມານ 10 ໂມງ ຂອງວັນທີ 11 ມັງກອນ 2016 ກໍ່ໄດ້ລົງທ່າຕຶກແຫຫາປາຢູ່ນ້ຳຂອງ ແລະ ກໍ່ໄດ້ພົບເທວະຮູບດັ່ງກ່າວໃນເວລາ 15 ໂມງ ຂອງວັນດຽວກັນ ຈຶ່ງໄດ້ນຳເອົາມາໄວ້ຢູ່ເຮືອນ.
ພາຍຫຼັງທີ່ການຈັດຕັ້ງຮູ້ຈິ່ງໄດ້ແຕ່ງຕັ້ງອະນຸກຳມະການລົງມາເບິ່ງ ເຫັນໄດ້ວ່າເປັນຄວາມຈິງ ເປັນປະເພດເທວະຮູບທອງເຫຼືອງ ຂະໜາດສູງ 35 cm ຕັ້ງເທິງແທ່ນ 4 ລ່ຽມ. ມົນທົນຂະໜາດ 10×10 cm ລັກສະນະທ່າຢືນກຳດາບ. ສະນັ້ນ, ມາໃນເວລາ 11 ໂມງຂອງວັນທີ 12 ມັງກອນ 2016 ທາງອະນຸກຳມະການຂັ້ນເມືອງກໍ່ໄດ້ລົງສົມທົບກັບອຳນາດການປົກຄອງຂັ້ນບ້ານ ແລະ ຜູ້ກ່ຽວ. ຈາກນັ້ນໄດ້ນຳເອົາອົງພະເທວະຮູບຂຶ້ນເມືອໄວ້ເມືອງໂຂງເພື່ອຄວາມປອດໄພ.
ຂ່າວ-ພາບ : ຫ້ອງການ ຖວທ ເມືອງໂຂງ ແລະໜັງສືພິມ ຈຳປາໃໝ່