ການດຳເນີນນະໂຍບາຍຕ່າງປະເທດໃນດ້ານການຄ້າຂອງລັດຖະບານສສ ຫວຽດນາມເຮັດໃຫ້ກາຍເປັນປະເທດທີ່ໜ້າສົນໃຈສຳລັບບໍລິສັດໃນອາຊຽນເຊັ່ນ: ບໍລິສັດສິງກະໂປ, ມາເລເຊຍ, ໄທ ແລະສ ເກົາຫຼີ, ຍີ່ປຸ່ນເຂົ້າໄປລົງທຶນໃນຕະຫຼາດຫວຽດນາມບໍ່ຂາດ.
ໜັງສືພິມຫວຽດນາມນິວລາຍງານໂດຍອ້າງຂໍ້ມູນສຳນັກງານລົງທຶນຈາກຕ່າງປະເທດຂອງລັດຖະບານວ່າ ກະແສການເຂົ້າມາລົງທຶນໃນຫວຽດນາມຄຶກຄັກຕໍ່ເນື່ອງມາຈາກປີທີ່ຜ່ານມາ ໂດຍຄາດວ່າປີນີ້ ບໍລິສັດຈາກສປ ຈີນຕ້ອງເຂົ້າມາລົງທຶນເພື່ອຫວັງຂາຍຕະຫຼາດອາເມລິກາ. ຊຶ່ງບໍລິສັດຫຼ້າສຸດທີ່ເຂົ້າໄປລົງທຶນຢູ່ຫວຽດນາມທີ່ມີການປະ ກາດຄື ສາຍການບິນອອລນິປປອນແອເວຂອງຍີ່ປຸ່ນທີ່ເຂົ້າໄປຊື້ຮຸ້ນບໍລິສັດຫວຽດນາມແອລາຍຈຳນວນ 8,8%, ກ່ອນໜ້ານັ້ນບໍລິສັດເມເປິລຂອງສິງກະໂປໄດ້ອະນຸມັດສ້າງໂຮງງານເສື້ອຜ້າສຳເລັດຮູບມູນຄ່າ 110 ລ້ານໂດລາສະຫະລັດທີ່ນິຄົມອຸດສາຫະກຳຫວຽດນາມ-ສິງກະໂປໂດຍມີກຳລັງການຜະລິດ 22 ລ້ານຜື່ນຕໍ່ປີ ໂຮງງານຈະເປີດດຳເນີນການໃນປີ 2018, ດ້ານມາເລເຊຍມີບໍລິສັດ ຢູໄນເຕັດມໍໄດ້ຮັບອະນຸມັດລົງທຶນ 21 ລ້ານໂດລາໃນການເຮັດຂອບ ແລະ ແຜ່ນພະລາສະຕິກຂອບໜ້າຈໍໂທລະພາບ ແລະຄ້າຍບໍລິສັດເບຍສິງຂອງໄທລົງທຶນກວ່າ 1 ຕື້ໂດລາໃນຫວຽດນາມ, ຊຶ່ງການລົງທຶນຂອງນັກລົງທຶນຕ່າງປະເທດໃນຫວຽດນາມຄຶກຄັກໃນເດືອນມັງກອນປີນີ້ເປັນຜົນມາຈາກການລົງທຶນຂອງບໍລິສັດຊຳຊຸງ ແລະແອລຈີຈາກສ ເກົາຫຼີທີ່ຍ້າຍສະຖານທີ່ການຜະລິດມາຍັງຫວຽດນາມ.
ຕົວເລກຂອງທາງການຫວຽດນາມລະບຸວ່າ ຂະນະນີ້ເສດຖະກິດຫວຽດນາມພົວພັນກັບເສດຖະກິດ 55 ປະເທດລະດັບໂລກເຮັດໃຫ້ມີການຫຼຸດພາສີຊຶ່ງກັນ ແລະ ກັນເຫຼືອ 0% ໃນປະລິມານ 90%ຂອງຈຳນວນສິນຄ້າທັງໝົດ ໃນປີທີ່ຜ່ານມາມີການລົງທຶນຈາກຕ່າງປະເທດລວມ 23 ຕື້ໂດລາ ແລະຄາດຄະເນວ່າປີນີ້ການລົງທຶນອາດຈະເພີ່ມຂຶ້ນ.
ທີ່ມາ: