ບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ໄດ້ມອບປຶ້ມແບບຮຽນໃຫ້ໂຮງຮຽນມັດທະຍົມ 18 ແຂວງທົ່ວປະເທດ ເພື່ອເປັນການເປີດໂອກາດທາງການສຶກສາ ເຮັດໃຫ້ນ້ອງໆເຍົາວະຊົນ ໄດ້ສຶກສາຄົ້ນຄວ້າ ແລະ ຮູ້ຮຽນໃນວິຊາຕ່າງໆ ແນໃສ່ພັດທະນາຄວາມຮູ້ຄວາມສາມາດໃຫ້ນັບມື້ນັບສູງຂຶ້ນເທື່ອລະກ້າວ.
ເມື່ອວັນທີ 28 ມັງກອນ ຜ່ານມາ ທີ່ກະຊວງສຶກສາທິການ ແລະ ກິລາ ໄດ້ມີພິທີມອບ-ຮັບ ປຶ້ມແບບຮຽນໃຫ້ໂຮງຮຽນມັດທະຍົມ 18 ແຂວງທົ່ວປະເທດ,ໃຫ້ກຽດມອບໂດຍທ່ານ ກໍາພົນ ເອກເມທີພັນ ຮອງປະທານຝ່າຍປະຕິບັດການສາຍງານຍ່ອຍພາກພື້ນແມ່ນໍ້າຂອງ ບໍລິສັດ ໂຕໂຢຕ້າ ມໍເຕີ ປະເທດໄທ ຈໍາກັດ ແລະ ຮັບໂດຍທ່ານ ກອງສີ ແສງມະນີ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ, ມີຫົວໜ້າກົມມັດທະຍົມສຶກສາ, ຫົວໜ້າຫ້ອງການ-ຮອງຫົວໜ້າຫ້ອງການ, ຕາງໜ້າຈາກກົມ, ສູນ, ສະຖາບັນການສຶກສາ ແລະ ພະນັກງານທຸກພາກສ່ວນທີ່ກ່ຽວຂ້ອງ ພ້ອມດ້ວຍສື່ມວນຊົນທຸກຂະແໜງການເຂົ້າຮ່ວມເປັນສັກຂີພິຍານ.
ການມອບປຶ້ມໃນຄັ້ງນີ້ ປະກອບມີ ປຶ້ມແບບຮຽນສໍາລັບຊັ້ນມັດທະຍົມສຶກສາ ຈໍານວນ 156.000 ຫົວ ລວມມູນຄ່າທັງໝົດ 200 ລ້ານກວ່າກີບ, ເຊິ່ງການມອບປຶ້ມແບບຮຽນດັ່ງກ່າວ ໃຫ້ໂຮງຮຽນມັດທະຍົມ 18 ແຂວງທົ່ວປະເທດ ໂດຍຜ່ານການປະສານງານກັບກະຊວງສຶກສາທິການ ແລະ ກິລາ ໄປຫາພະແນກສຶກສາທິການ ແລະກິລາຂອງແຕ່ລະແຂວງ ເພື່ອສົ່ງຕໍ່ໃຫ້ທຸກໂຮງຮຽນຢ່າງທົ່ວເຖິງ ແນໃສ່ໃຫ້ນ້ອງໆເຍົາວະຊົນໄດ້ສຶກສາຄົ້ນຄວ້າ ແລະ ຮູ້ຮຽນໃນວິຊາຕ່າງໆ ເພື່ອພັດທະນາຄວາມຮູ້ຄວາມສາມາດໃຫ້ນັບມື້ນັບສູງຂຶ້ນ,ເຊິ່ງເປັນໂຄງການທີ່ທາງບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ຕັ້ງໃຈທີ່ຈະຕອບແທນສັງຄົມ. ທັງເປັນການໃຫ້ໂອກາດທາງການສຶກສາໃຫ້ເຍົາວະຊົນລາວໄດ້ມີຄວາມຮູ້ຄວາມສາມາດ ແລະ ສາມາດພັດທະນາປະເທດຊາດຕໍ່ໄປໄດ້ໃນອະນາຄົດ ແລະ ບໍລິສັດໂຕໂຢຕ້າ ໃຫ້ຄໍາໝັ້ນສັນຍາຈະຈັດກິດຈະກໍາເພື່ອສັງຄົມ ທັງໃນດ້ານສຶກສາ ແລະ ກິລາ ແລະ ວັດທະນະທໍາເພື່ອພັດທະນາສັງຕະຫຼອດໄປ.
ສະເພາະປີນີ້ ບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ແລະ ຕົວແທນຈໍາໜ່າຍໂຕໂຢຕ້າຢ່າງເປັນທາງການໃນ ສປປ ລາວ ໄດ້ປະສານຕໍ່ຈັດກິດຈະກໍາເພື່ອສັງຄົມລາວອີກຄັ້ງໜຶ່ງ ພາຍໃຕ້ໂຄງການ “ໂຕໂຢຕ້າ ໃຈດີໃຫ້ນ້ອງ”, ເຊິ່ງເປັນກິດຈະກໍາທີ່ທາງໂຕໂຢຕ້າ ໄດ້ດໍາເນີນການຢ່າງຕໍ່ເນື່ອງເປັນປີທີ 5.
ສະເພາະແຜນການມອບປຶ້ມແບບຮຽນຂອງບໍລິສັດ ໂຕໂຢຕ້າ ມໍເຕີ ປະເທດໄທ ຈໍາກັດ ໃນໂຄງການດັ່ງກ່າວນີ້ ແມ່ນໃນວັນທີ 2 ກຸມພາ 2016 ຈະໄປມອບໃຫ້ພະແນກສຶກສາ ແລະ ກິລາ ແຂວງສະຫວັນນະເຂດ, ວັນທີ 3 ກຸມພາ 2016 ຈະໄປມອບໃຫ້ພະແນກສຶກສາ ແລະ ກິລາ ແຂວງຈໍາປາສັກ ແລະ ໃນວັນທີ 19 ກຸມພາ 2016 ຈະໄປມອບໃຫ້ພະແນກສຶກສາ ແລະ ກິລາ ແຂວງຫຼວງພະບາງ.
ທີ່ມາ: ກະຊວງສຶກສາທິການ ແລະ ກິລາ