ລັດຖະສະພາມຽນມາໄດ້ອະນຸມັດກົດໝາຍສະບັບໃໝ່ໃນການຖືຄອງອະສັງຫາລິມະຊັບຂອງຊາວຕ່າງປະເທດ ໂດຍອະນຸຍາດໃຫ້ຊາວຕ່າງປະເທດສາມາດຊື້ຄອນໂດໄດ້ບໍ່ເກີນ 40% ຂອງຫ້ອງຊຸດທັງໝົດໃນອາຄານ ແລະຫ້ອງຊຸດໃນຄອນໂດນັ້ນຕ້ອງຢູ່ໃນຄອນໂດມິນຽມທີ່ມີຄວາມສູງ 6 ຊັ້ນຂຶ້ນໄປ ແລະມີພື້ນທີ່ລວມກັນປມານ 20 ພັນກວ່າຕາລາງຟຸດເທົ່ານັ້ນ.
ກະຊວງການກໍ່ສ້າງມຽນມາຈະລະບຸອີກເທື່ອໜຶ່ງວ່າ ຄອນໂດມິນຽມດັ່ງກ່າວຈະຕ້ອງມີມາດຖານການສາທາລະນູປະໂພກ, ລະບົບຮັກສາຄວາມປອດໄພ ແລະພື້ນທີ່ຈອດລົດທໍ່ໃດ ຈຶ່ງຈະສອດຄ່ອງກັບຫຼັກສາກົນ ທັງນີ້ຜູ້ຖືຄອງຄອນໂດມິນຽມສາມາດຄອບຄອງອາຄານ ແລະທີ່ດິນບໍລິເວນທີ່ຕັ້ງ ພ້ອມທັງຍັງສາມາດລົງທຶນໃນທຸລະກິດຄອນໂດມິນຽມໄດ້ ແຕ່ວ່າບໍ່ສາມາດຈະມີສິດບໍລິຫານໂຄງການໄດ້.
ຈາກກົດໝາຍສະບັບດັ່ງກ່າວ ສະແດງໃຫ້ເຫັນວ່າ ມຽນມາເລີ່ມເປີດກ້ວາງຕໍ່ການຄອບຄອງຊັບສິນຫຼາຍຂຶ້ນ ໂດຍສະເພາະແມ່ນການຄອບຄອງອະສັງຫາລິມະຊັບຂອງຊາວຕ່າງປະເທດ ຫຼັງຈາກທີ່ນັກລົງທຶນຕ່າງມອງວ່າ ກົດ ໝາຍທີ່ບໍ່ເປີດກວ້າງຂອງມຽນມາເຮັດໃຫ້ການລົງທຶນນັ້ນມີຄວາມສ່ຽງສູງ ແລະບໍ່ແນ່ນອນ ໃນຂະນະທີ່ລາຄາອະສັງຫາລິມະຊັບໃນນະຄອນຢາງກຸ້ງມີລາຄາສູງຂຶ້ນທຸກປີ.
ທີ່ມາ: