ຂປລ.ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານ ເຖິງ ທ່ານ ປີເຕີ ໂກສກຣົບ ຜູ້ສຳເລັດຣາຊະການ ແຫ່ງເຄືອຈັກກະພົບ ອົດສະຕຣາລີ ເນື່ອງໃນໂອກາດວັນຊາດ ຄົບຮອບ 228 ປີທີ່ນະຄອນຫລວງແຄນເບີຣາ.
ເນື້ອໃນສານລະບຸວ່າ: ເນື່ອງ ໃນໂອກາດວັນຊາດອົດສະຕຣາລີ ຄົບຮອບ 228 ປີ, ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ,ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ອວຍພອນໄຊອັນປະເສີດມາຍັງ ທ່ານ, ລັດຖະບານ ແລະ ປະຊາຊົນ ອົດສະຕຣາລີ ທຸກຖ້ວນໜ້າ.
ຂ້າພະເຈົ້າ ມີຄວາມປິຕິຍິນດີ ເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ດົນນານ ລະຫວ່າງ ສປປ ລາວ ແລະ ອົດສະຕຣາລີ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ. ລັດຖະບານແລະ ປະຊາຊົນລາວຕີລາຄາສູງ ແລະ ຮູ້ບຸນຄຸນຕໍ່ການຊ່ວຍເຫລືອ ແລະ ການສະໜັບສະໜູນຂອງລັດຖະບານ ແລະປະຊາຊົນອົດສະຕຣາລີ ໃຫ້ແກ່ ສປປ ລາວ ຕະຫລອດໄລຍະທີ່ຜ່ານມາ ອັນໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ–ສັງຄົມຂອງ ສປປ ລາວ. ຂ້າ ພະເຈົ້າ ເຊື່ອໝັ້ນວ່າສາຍພົວພັນ ແລະ ການຮ່ວມມືທີ່ດີດັ່ງກ່າວ ຈະສືບຕໍ່ໄດ້ຮັບການເສີມຂະຫຍາຍໃຫ້ກ້າວຂຶ້ນສູ່ລະດັບໃໝ່. ພ້ອມດຽວກັນນີ້, ຂ້າ ພະເຈົ້າກໍຫວັງຢ່າງຍິ່ງວ່າ ລັດຖະບານ ອົດສະຕຣາລີ ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ທັງໃນຂອບສອງຝ່າຍ ແລະ ຫລາຍຝ່າຍ ລວມທັງການເປັນປະທານ ອາຊຽນ ໃນປີ 2016 ໃຫ້ໄດ້ຮັບຜົນສຳເລັດອັນຈົບງາມ.
ຂ້າພະເຈົ້າຂໍຖືໂອກາດນີ້ ອວຍພອນໃຫ້ ທ່ານຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສຳເລັດ ໃນພາລະກິດອັນສູງສົ່ງຂອງທ່ານ ແລະ ຂໍໃຫ້ປະຊາຊົນອົດສະຕຣາລີ ຈົ່ງສືບຕໍ່ມີຄວາມວັດທະນາຖາວອນ.
ແຫລ່ງຂ່າວ:
