ຊາຍໜຸ່ມຂັບລົດຈັກດ້ວຍຄວາມໄວສູງ ເສຍຫລັກເລີຍໂຄ້ງຕຳກັບຂອບທາງ ຟົ້ງໄປກ້ອງທໍ່ນ້ຳເສຍຂ້າງທາງ ເສຍຊີວິດຄາທີ່.
ເຈົ້າໜ້າທີ່ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ທ່ຽງຄືນຂອງວັນທີ 25 ມັງກອນນີ້, ຢູ່ຖະໜົນເລກທີ 11, ເຂດບ້ານຈຳປາ ເມືອງສີໂຄດຕະບອງ ນະຄອນຫລວງວຽງຈັນ ໄດ້ເກີດອຸປະຕິບັດລົດຈັກໂນວາ ບໍ່ມີໝາຍເລກທະບຽນ ຂັບຂີ່ມາແຕ່ທາງບ້ານວຽງຄຳ ມຸ່ງໜ້າໄປທາງບ້ານໃໝ່ ເມືອງສີໂຄດຕະບອງ, ດ້ວຍຄວາມໄວສູງ ແລ້ວເກີດເຫດເສຍຫລັກ ເລີຍໂຄ້ງໄປຕຳເອົາຂອບທາງ ເຮັດໃຫ້ຕີນໜ້າຂອງລົດຈັກເປ່ເພໜັກ, ສ່ວນຄົນຂັບນອນເສຍຊີວິດ ຢູ່ໃນທໍ່ນ້ຳເສຍກ້ອງເສັ້ນທາງ.
ເຈົ້າໜ້າທີ່ ຍັງໃຫ້ຮູ້ວ່າ: ປັດຈຸບັນຢູ່ປະເທດເຮົາ ໄດ້ພົບກັບສະພາບອາກາດໜາວແຮງຜິດປົກກະຕິ ເຮັດໃຫ້ບາງພື້ນທີ່ມີນ້ຳໝອກກ້າມ ແລະ ຖະໜົນມື່ນ ອາດພາໃຫ້ເກີດອຸປະຕິເຫດໄດ້ງ່າຍ, ດັ່ງນັ້ນ ຈຶ່ງຮຽກຮ້ອງໃຫ້ຜູ້ຂັບຂີ່ທຸກຄົນ ຈົ່ງມີສະຕິໃນການຂັບຂີ່ ແລະ ຄວນຫລີກເວັ້ນ ການຂັບຂີ່ໃນຍາມຄ່ຳຄືນ ແມ່ນຈະເປັນການດີທີ່ສຸດ.
ແຫລ່ງຂ່າວ:
