ບໍລິສັດຂອງອິຕາລີກຽມສ້າງທໍ່ສົ່ງເຊື້ອເພີງໃຫ້ແກ່ອີຣານ ຊຶ່ງເປັນໜຶ່ງໃນຂໍ້ຕົກລົງການຄ້າ ແລະ ການລົງທຶນທີ່ມີການລົງນາມ ໃນໂອກາດທີ່ປະທານາທິບໍດີອີຣານຢ້ຽມຢາມນະຄອນຫຼວງໂຣມຢ່າງເປັນທາງການ.
ສຳນັກຂ່າວຕ່າງປະເທດລາຍງານຈາກນະຄອນຫຼວງໂຣມຂອງອິຕາລີໃນວັນທີ 26 ມັງກອນວ່າ ທ່ານ ດິຮັສຊັນ ໂຣຮານີ ຜູ້ນຳອີຣານ ແລະ ທ່ານ ມັດເຕໂອເຣນ ນາຍົກລັດຖະມົນຕີອິຕາລີຮ່ວມເປັນສັກຂີ່ພະຍານໃນການລົງນາມຂໍ້ຕົກລົງທາງການຄ້າ ແລະ ການລົງທຶນຫຼາຍສະບັບລະຫວ່າງທັງສອງປະເທດໃນວັນທີ 25 ມັງກອນ ຊຶ່ງສັນຍາທັງໝົດມີມູນຄ່າລວມສູງສຸດ 17 ຕື້ເອີໂຣ ໃນຈຳນວນນີ້ລວມເຖິງຂໍ້ຕົກລົງກໍ່ສ້າງທໍ່ສົ່ງພະລັງງານມູນຄ່າ 5 ຕື້ເອີໂຣ ໂດຍບໍລິສັດໄຊເປມຂອງອິຕາລີ, ຊຶ່ງອິຕາລີຖືເປັນໜຶ່ງໃນປະເທດຄູ່ຄ້າທີ່ສຳຄັນຂອງອີຣານ ເຖິງແມ່ນວ່າມູນຄ່າການຄ້າລະຫວ່າງກັນຫຼຸດລົງຈາກ 7 ຕື້ເອີໂຣໃນໄລຍະການລົງໂທດ ລົງມາເຫຼືອພຽງ 1,5 ຕື້ເອີໂຣ ແຕ່ລັດ ຖະບານອີຣານຫວັງວ່າ ຈະສາມາດເພີ່ມມູນຄ່າການສົ່ງອອກສິນຄ້າໄປຍັງອິຕາລີໃຫ້ໄດ້ 3 ຕື້ເອີໂຣພາຍໃນປີ 2018.
ການເດີນທາງຢ້ຽມຢາມອິຕາລີໃນເທື່ອນີ້ຖືເປັນການຢ້ຽມຢາມເທື່ອທຳອິດໃນຮອບ 17 ປີ ຂອງຜູ້ນຳອີຣານ ໂດຍຫຼັງຈາກນີ້ທ່ານ ໂຣຮານີ ມີກຳນົດຢ້ຽມຢາມຝຣັ່ງ ຄາດວ່າ ຈະມີການລົງນາມຂໍ້ຕົກລົງສະບັບສຳຄັນ ລວມທັງການສັ່ງຊື້ເຮືອບິນແອບັສ ແລະ ການສ້າງຄວາມສຳພັນກັບບໍລິສັດຜະລິດລົດລາຍໃຫຍ່ຂອງຝຣັ່ງ.
ທີ່ມາ: