ທ່ານ ໂຈໂກ ວິໂດໂດ ປະທານາທິບໍດີຂອງອິນໂດເນເຊຍ ເປັນປະທານເປີດກອງປະຊຸມວາງແຜນຄອບຄົວນານາຊາດໃນວັນທີ 25 ມັງກອນທີ່ຜ່ານມາ ເພື່ອຮັບມືກັບຫຼາຍບັນຫາການອະນາໄມຈະເລີນພັນ ແລະ ການເຂົ້າເຖິງການຄຸມກຳເນີດ.
ໃນອະດີດອັດຕາການເກີດຂອງປະຊາກອນອິນໂດເນເຊຍທີ່ປັບຕົວຫຼຸດລົງສົ່ງຜົນເຮັດໃຫ້ເສດຖະກິດຂອງປະເທດຂະຫຍາຍຕົວຫຼຸດລົງ ອັດຕາການເກີດຂອງອິນໂດເນເຊຍຫຼຸດລົງຈາກ 5,6 ຄົນຕໍ່ແມ່ຍິງ 1 ຄົນເຫຼືອ 2,6 ຄົນຕໍ່ແມ່ຍິງ 1 ຄົນໃນປີ 2002 ສ່ວນອັດຕາການເພີ່ມຂຶ້ນຂອງປະຊາກອນຫຼຸດລົງຈາກປະມານ 2,3% ເຫຼືອ 1,4% ແຕ່ໃນໄລຍະ 10 ປີທຳອິດຂອງປີ 2000 ໂຄງການວາງແຜນຄອບຄົວຂອງອິນໂດເນເຊຍກັບບໍ່ກ້າວໜ້າ.
ທ່ານ ນາງ ເມລາເນີຍ ໄຮດາຍັດ ເຈົ້າໜ້າທີ່ປະຈຳສຳນັກງານກອງທຶນປະຊາກອນຂອງສະຫະປະຊາຊາດໃນນະຄອນຫຼວງຈາກາຕາກ່າວວ່າ ອິນໂດເນເຊຍພະຍາຍາມຟື້ນຟູໂຄງການວາງແຜນຄອບຄົວເມື່ອຫຼາຍປີກ່ອນ ແຕ່ຄືບໜ້າໜ້ອຍຫຼາຍເນື່ອງຈາກຂາດຄວາມມຸ່ງໝັ້ນຮ່ວມກັນ ແລະ ລັດຖະບານທ້ອງຖິ່ນຜູ້ເຮັດໂຄງການຂາດແຄນງົບປະມານ ແຕ່ຂະນະນີ້ທ່ານ ວິໂດໂດ ກຳລັງຊຸກຍູ້ໃຫ້ຄະນະກຳມະການວາງແຜນຄອບຄົວເພີ່ມຄວາມມຸ່ງໝັ້ນໃຫ້ຫຼາຍຂຶ້ນ ແລະ ເດືອນນີ້ຫາກໍປະກາດໂຄງການວາງແຜນຄອບຄົວລະດັບໝູບ້ານໃນແຂວງຊວາຕາເວັນຕົກ ຊຶ່ງໄດ້ຮັບການສະໜັບສະໜູນຈາກຄົນໃນທ້ອງຖິ່ນເປັນຢ່າງດີ.
ທີ່ມາ: