ລາຄານໍ້າມັນດິບຫຼຸດລົງອີກເມື່ອວັນທີ 25 ມັງກອນຜ່ານມາ ຫຼັງປັບຕົວຂຶ້ນເມື່ອອາທິດກ່ອນ ໃນຂະນະທີ່ກຸ່ມຜູ້ຄ້ານໍ້າມັນຢ່າງໂອເປກ ອອກມາຮຽກຮ້ອງຂໍຄວາມຮ່ວມມືແກ້ບັນຫາລາຄານໍ້າມັນທີ່ກຳລັງຕົກຕໍ່າໃນຂະນະນີ້.
ລາຄານໍ້າມັນດິບເບຣນ ຈາກທະເລເໜືອທີ່ຕະຫຼາດລອນດອນຂອງສະຫະຣາຊະອານາຈັກຫຼຸດລົງ 6,3 % ມາຢູ່ທີ່30,15 ໂດລາສະຫະລັດຕໍ່ບາເຣວ ຫຼັງເພີ່ມຂຶ້ນ10% ເມື່ອທ້າຍອາທິດຜ່ານມາ ໃນຂະນະທີ່ລາຄານໍ້າມັນດິບອາເມລິກາຫຼຸດລົງມາ7,1% ມາຢູ່ທີ່ 29,90 ໂດລາຕໍ່ບາເຣວ ການຫຼຸດລົງຂອງນໍ້າມັນດິບໂລກຫຼ້າສຸດນີ້ ມີຂຶ້ນຂະນະທີ່ຜູ້ນຳໂອເປກອອກມາຮຽກຮ້ອງໃຫ້ປະເທດຜູ້ຜະລິດນໍ້າມັນທຸກປະເທດ ເຮັດວຽກຮ່ວມກັນເພື່ອແກ້ບັນຫາລາຄານໍ້າມັນຊຶ່ງ ທ່ານ ອັບດຸນເລາະ ອັນບາດຣີ ເລຂາທິການໂອເປກກ່າວວ່າ: ຜູ້ຜະລິດນໍ້າມັນທັງທີ່ເປັນສະມາຊິກໂອເປກ ແລະ ທີ່ບໍ່ແມ່ນສະມາຊິກນັ້ນ ຈຳເປັນຕ້ອງແກ້ບັນຫາອຸປະທານຫຼາຍເກິນໄປ (Oversupply) ທີ່ກຳລັງເກີດຂຶ້ນໃນຂະນະນີ້ ເພື່ອຊ່ວຍໃຫ້ລາຄານໍ້າມັນກັບມາສູງຂຶ້ນ.
ໂດຍປັດຈຸບັນໂອເປກມີສ່ວນຮັບຜິດຊອບເກືອບ 42 % ຂອງການຜະລິດນໍ້າມັນດິບໂລກໃນຂະນະທີ່ກຸ່ມຜູ້ຜະລິດນໍ້າມັນຢ່າງໂອເປກກຳລັງກັງວົນກັບລາຄາທີ່ຕົກຕໍ່າລົງ ອີກດ້ານໜຶ່ງຂອງການປັບຕົວລົງຂອງລາຄານໍ້າມັນນັ້ນກັບເປັນຜົນດີໃນບາງທຸລະກິດທີ່ຕ້ອງການຟື້ນຕົວເຊັ່ນ: ທຸລະກິດສາຍການບິນເປັນຕົ້ນ ຫຼັງຈາກການຂາດທຶນຢ່າງຕໍ່ເນື່ອງມາດົນນານຈາກລາຄານໍ້າມັນທີ່ສູງ ( ຕາມຂ່າວຕ່າງປະເທດ).
ທີ່ມາ: