ຜະລິດຕະພັນທີ່ເກີດຈາກພູມປັນຍາຊາວບ້ານ ທີ່ມີວັດທະນະທຳການກິນປາແດກມາແຕ່ດົນນານ ໃນການປະກອບໃສ່ອາຫານບາງຊະນິດ ເຖິງວ່າສັງຄົມຈະມີການພັດທະນາມາໄກແຕ່ຄົນລາວ ກໍ່ຄືຄົນລາວຢູ່ຕ່າງປະເທດ ກໍ່ຍັງນິຍົມກິນປາແດກ ສົ່ງຜົນໃຫ້ຜູ້ປະກອບມີຍອດຂາຍເພີ່ມຂຶ້ນ ຂະນະທີ່ວັດຖຸດິບ (ປາ) ຕ້ອງໄດ້ຊອກເຂົ້າມາເພີ່ມເພື່ອໃຫ້ພຽງພໍກັບຄວາມຕ້ອງການຂອງລູກຄ້າ.
ທ່ານນາງ ວິໄລສິນ ເຕີນຕານ ເຈົ້າຂອງໂຮງງານປາແດກຮຸ່ງເຮືອງສິນ ກ່າວວ່າ: ພາຍຫຼັງທີ່ໄດ້ຮັບກາໝາຍໂອດ໋ອບຈາກກະຊວງອຸດສາຫະກຳ ແລະ ການຄ້າ ກໍ່ໄດ້ມີຄວາມຫ້າວຫັນໃນການເອົາໃຈໃສ່ ດ້ວຍການເພີ່ມຜະລິດຕະພັນອັນໃໝ່ເຂົ້າມາໃຫ້ໂຮງງານ ເພື່ອໃຫ້ລູກຄ້າໄວ້ວາງໃຈ ເຊັ່ນ: ປາແດກຕ່ອນ ປາແດກຝຸ່ນ ນ້ຳແຈ່ວ ແລະ ອື່ນໆ ລວມທັງໝົດປະມານ 19 ລາຍການ ດ້ວຍຄວາມເອົາໃຈໃສ່ໃນການຂະຫຍາຍຕະຫຼາດ ດ້ວຍຜະລິດຕະພັນຄຸນະພາບເຮັດໃຫ້ໃນປີ 2015 ມີຍອດຂາຍເພີ່ມຂຶ້ນ ປະມານ 30% ເມື່ອທຽບກັບປີ 2014 ສາມາດກວມເອົາຕະຫຼາດໃນນະຄອນຫຼວງບໍ່ຕ່ຳກວ່າ 80% ເພາະມີວາງຈຳໜ່າຍເກືອບທຸກຕະຫຼາດ ສ່ວນຕ່າງແຂວງມີຈຳນວນໜຶ່ງເທົ່ານັ້ນ.
ແຕ່ປັດຈຸບັນ ຍັງພົບກັບບັນຫາວັດຖຸດິບ (ປາ) ຍັງບໍ່ພຽງພໍ ຈະອາໄສແຕ່ປາມາຈາກເຂື່ອນນ້ຳງື່ມ ນ້ຳເທີນ ແລະ ແຂວງຈຳປາສັກ ຕ້ອງໄດ້ຊອກຫາແຫຼ່ງວັດຖຸດິບເຂົ້າມາຕື່ມ ເພື່ອຜະລິດໃຫ້ໄດ້ຫຼາຍກວ່າວັນລະ 1 ໂຕນ ປາທີ່ມາເຮັດປາແດກສ່ວນຫຼາຍຈະນຳໃຊ້ປາຊະນິດນ້ອຍ ປາໃຫຍ່ຈະມີຈຳນວນໜຶ່ງເທົ່ານັ້ນ ເນື່ອງຈາກລາຄາຂອງປາໃຫຍ່ຈະມີມູນຄ່າສູງ ອາດຈະເຮັດໃຫ້ລູກຄ້າບໍ່ສາມາດຊື້ໄດ້ຢ່າງສະດວກ ເພາະລູກຄ້າຫຼັກກໍ່ແມ່ນທຸກຊັ້ນຄົນ.
ຍອມຮັບວ່າ ໃນໄລຍະຜ່ານມາ ມີນັກທຸລະກິດຂອງປະເທດເພື່ອນບ້ານ ໄດ້ສົນໃຈຕ້ອງການເຂົ້າມາຮ່ວມເຮັດທຸລະກິດນຳ ແຕ່ກໍ່ຍັງບໍ່ໄດ້ຕອບຮັບແຕ່ຢ່າງໃດ ເນື່ອງຈາກຕ້ອງໄດ້ສຸມໃສ່ຕະຫຼາດນະຄອນຫຼວງ ທີ່ຍັງມີຄວາມຕ້ອງການສ່ວນຕ່າງແຂວງອາດຈະຮູບແບບສາຂາ ຫຼື ຕົວແທນຈຳໜ່າຍຫຼາຍກວ່າ ຫາກເຖິງເວລານັ້ນ ກໍ່ຕ້ອງໄດ້ຊອກວັດຖຸດິບທີ່ຍັງເປັນບັນຫາສຳຄັນໃນການປ້ອນໂຮງງານ.
ທີ່ມາ http://www.vientianemai.net