ງານເທສະການບຸນກອງເຂົ້າໃຫຍ່ເມືອງພຽງໄດ້ຈັດຂຶ້ນຢ່າງເປັນທາງການໃນວັນທີ 21 ມັງກອນຜ່ານມາທີ່ບ້ານ ສົມສະຫວັນ ແຂວງໄຊຍະບູລີ ໂດຍໃຫ້ກຽດເຂົ້າຮ່ວມມີທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ, ມີກຳມະການພັກແຂວງ, ກຳມະການປະຈຳພັກເມືອງ, ຫົວໜ້າ, ຮອງຫົວໜ້າພະແນກການ, ກົມກອງຂອງແຂວງ, ຂອງເມືອງ, ນັກສຶກສາ, ຊາວໜຸ່ມເຍົາວະຊົນ,ນັກທຸລະກິດພ້ອມດ້ວຍພໍ່ແມ່ປະຊາຊົນ ຊັ້ນຄົນບັນດາເຜົ່າໃນທົ່ວເມືອງພຽງເຂົ້າຮ່ວມຢ່າງຫຼວງຫຼາຍ.
ໃນພິທີທ່ານ ສົມບູນ ກຸມບາສິດ ໄດ້ຂຶ້ນກ່າວໄຂງານເທສະການບຸນກອງເຂົ້າໃຫ່ຍຄັ້ງທີ VI ປະຈຳປີ 2016 ຊຶ່ງທ່ານໄດ້ກ່າວວ່າ ເມືອງພຽງ ເປັນເມືອງໜຶ່ງ ໃນ 11 ເມືອງຂອງແຂວງ, ເປັນເມືອງທີ່ອຸດົມສົມບູນໄປດ້ວຍຊັບພະຍາກອນທຳມະຊາດ, ມີແມ່ນ້ຳຫຼາຍສາຍທີ່ເໝາະສົມໃຫ້ແກ່ການຜະລິດສະບຽງອາຫານ ແລະ ເປັນສິນຄ້າ, ການທ່ອງທ່ຽວທຳມະຊາດ ແລະວັດທະນະທຳ, ມີຂະນົບທຳນຽມ, ຮີດຄອງປະເພນີອັນດີງາມທີ່ເປັນເອກະລັກຂອງຊາດ, ຂອງທ້ອງຖິ່ນ ຊຶ່ງໄດ້ຮັບການປົກປັກຮັກສາ ແລະພັດທະນາດີຂຶ້ນ ຢ່າງຕໍ່ເນື່ອງ, ທົ່ວເມືອງປະກອບມີ 51 ບ້ານ, ມີ 4 ກຸ້ມບ້ານ, 1 ເທສະບານ, 2 ບ້ານໃຫຍ່ ແລະ6 ບ້ານຈຸດສຸມພັດທະນາ, ມີ 8 ເຜົ່າຢູ່ຮ່ວມກັນດ້ວຍຄວາມປອງດອງ, ການຈັດງານເທດສະການບຸນກອງເຂົ້າໃຫ່ຍຄັ້ງນີ້ເປັນຄັ້ງທີ 6 ຊຶ່ງຄັ້ງ ທຳອິດແມ່ນໄດ້ຈັດຂຶ້ນໃນປີ 2011 ແລະ ໄດ້ຈັດຂຶ້ນໃນທຸກປີໃນເດືອນຍີ່ກໍຄືເດືອນມັງກອນ, ຢູ່ໃນງານນອກຈາກມີພິທີທາງການແລ້ວ, ຍັງມີພິທີທາງສາສະໜາ, ມີການແຮ່ເຂົ້າເປືອກເຂົ້າສານເຂົ້າວັດ, ມີ ການຕັກບາດຖວາຍສັງຄະທານ, ພິເສດ ແມ່ນມີກອງເຂົ້າໃຫຍ່ທີ່ເປັນເອກະລັກ ຂອງງານບຸນ, ມີກ້ອນກຳລັງແຮ່ຜະລິດຕະພັນທີ່ເປັນເອກະລັກ ແລະວັດທະນະທຳທີ່ເປັນສີສັນຂອງແຕ່ລະບ້ານມີການເປີດຕະຫຼາດນັດຜະລິດຕະພັນດ້ານກະສິກຳ, ອຸດສາຫະກຳຂອງແຕ່ລະບ້ານ, ປະກວດນາງສາວງາມກອງເຂົ້າໃຫຍ່, ປະກວດອາຫານພື້ນບ້ານ, ການແຂ່ງຂັນ ກີລາມວນຊົນ, ເຂົ້າຊົມວິຖີຊີວິດຂອງເຜົ່າຕອງເຫຼືອງ ຫຼື ຄົນປ່າ ເປັນເຜົ່າທີ່ມີໜ້ອຍ ແລະຊອກເຫັນຍາກ, ໃນ ສປປ ລາວ ພ້ອມ ມີຫຼາຍກິດຈະກຳທີ່ໄດ້ໃຫ້ບັນດາທ່ານທີ່ມາຮ່ວມງານໄດ້ເບິ່ງ ແລະສຳຜັດ.
ຂະນະທີ່ເມືອງພຽງຍັງມີແຫຼ່ງທ່ອງທ່ຽວຫຼາຍແຫ່ງທີ່ໜ້າທ່ຽວຊົມເຊັ່ນ: ກົກຂາມເຕ້ຍ, ດົງຄຳຮຽວ, ຕາດນ້ຳປັ່ງ, ຝາຍນ້ຳຕານ, ວັດປ່າພູສະຫວັນ, ໄມ່ແຕ້ ຄ່າໃຫຍ່ພັນປີ, ຖ້ຳຜາຫວາຍ ແລະບໍ່ນ້ຳປຸ້ນ.
ຈາກນັ້ນທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ ໄດ້ຮ່ວມກັບການນຳນັກທຸລະກິດພ້ອມກັນລັ່ນຄອງ 9 ບາດ ເພື່ອເປັນສັນຍະລັກເປີດງານເທສະການບຸນກອງເຂົ້າໃຫຍ່ເມືອງພຽງຢ່າງເປັນທາງການ.
ທີ່ມາ: