ທ່ານ ສີ ຈິ້ນຜິງ ປະທານປະເທດຂອງ ສປ ຈີນ ແລະ ທ່ານ ຮັສຊັນ ໂຣວຮານີ ປະທານາທິບໍດີຂອງອີຣານເຫັນດີພ້ອມກັນໃນເລື່ອງຂະຫຍາຍຄວາມສຳພັນທະວີພາຄີເພື່ອສ້າງຄວາມເປັນຮຸ້ນສ່ວນດ້ານຍຸດທະສາດ ໂດຍລະບຸວ່າເປັນໄລຍະໃໝ່ຂອງຄວາມສຳພັນທະວີພາຄີ.
ທ່ານ ສີ ຈິ້ນຜິງ ເປັນຜູ້ນຳຄົນທຳອິດທີ່ໄປຢ້ຽມຢາມອີຣານ ຫຼັງຈາກນານາຊາດຍົກເລີກມາດຕະການລົງໂທດອີຣານໃນວັນທີ 16 ມັງກອນທີ່ຜ່ານມາ ຕາມຂໍ້ຕົກລົງຈຳກັດໂຄງການນິວເຄລຍທີ່ອີຣານຕົກລົງກັບ 6 ປະເທດມະຫາອຳນາດໄດ້ໃນປີກ່ອນ ໜຶ່ງໃນນັ້ນມີຈີນລວມຢູ່ນຳ, ທັງສອງຝ່າຍຕົກລົງຈະເພີ່ມມູນຄ່າການຄ້າລະຫວ່າງກັນເປັນ 600 ຕື້ໂດລາສະຫະລັດ ພາຍໃນ 10 ປີ ຈະສ້າງຄວາມສຳພັນດ້ານຍຸດທະສາດຕາມທີ່ໄດ້ບັນທຶກໄວ້້ໃນເອກະສານສະບັບສົມບູນໄລຍະ 25 ປີ ແລະ ຈະຮ່ວມມືກັນຢ່າງໃກ້ຊິດໃນການແກ້ໄຂບັນຫາການກໍ່ການຮ້າຍ ແລະ ແນວຄິດຮຸນແຮງໃນອີຣັກ, ຊີຣີ, ອາຟະການິດສະຖານ ແລະ ເຢເມນ.
ສຳນັກຂ່າວຂອງອີນາຂອງອີຣານລະບຸວ່າ ທ່ານ ສີ ຈິ້ນຜິງເປັນຜູ້ນຳຈີນຄົນທຳອິດທີ່ຢ້ຽມຢາມອີຣານໃນຮອບ 14 ປີ ໂດຍຜູ້ນຳຈີນຈະເຂົ້າພົບທ່ານ ຢາຕອລ ອາລີ ຜູ້ນຳສູງສຸດຂອງອີຣານ, ດ້ານສຳນັກກຂ່າວຣອຍເຕີລາຍງານວ່າ ຈີນ ແລະ ອີຣານໄດ້ລົງນາມຂໍ້ຕົກລົງທັງໝົດ 17 ສະບັບໃນທ້າຍອາທິດທີ່ຜ່ານມາ ໜຶ່ງໃນນັ້ນມີຂໍ້ຕົກລົງຟື້ນຟູເສັ້ນທາງສາຍໄໝ ຊຶ່ງເປັນເສັ້ນທາງການຄ້າທີ່ເຊື່ອມຕໍ່ໂລກຕາເວັນອອກກັບຕາເວັນຕົກມາຕັ້ງແຕ່ບູຮານ ແລະ ຂໍ້ຕົກລົງຄວາມຮ່ວມມືດ້ານນິວເຄລຍທາງສັນຕິ.
ທີ່ມາ: