ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ໄດ້​ຈັດການ​ສາທິດການ​ດຳນາ​ດ້ວຍ​ກົນ​ຈັກ​ທີ່​ທັນ​ສະໄໝ ​ໃຫ້​ກັບ​ກຸ່ມ​ສະຫະກອນ​ຜະລິດ​ກະສິ​ກຳ​ຢູ່​ບ້ານ​ສິມ​ມະໂນ ເຊິ່ງ​ເປັນ​ກຸ່ມ​ຜະລິດ​ກະສິກຳ​ທີ່​ຫາ​ກໍ່ສ້າງ​ຂຶ້ນ​ໃໝ່ ແລະ ໄດ້​ຮັບ​ການ​ສະໜັບສະໜູນ​ຊີ້​ນຳ​ຕາມ​ບັນດາ​ແນວທາງ​ຂອງ​ພັກ-ລັດ ຈົນ​ສາມາດ​ສ້າງ​ເປັນ​ກຸ່ມ​ດັ່ງກ່າວ​ຂຶ້ນ​ມາ​ໄດ້ ແລະ ມີ​ສະມາຊິກ​ທັງໝົດ 19 ຄອບຄົວ ມີ​ທຶນ​ໝູນວຽນ 1 ຕື້​ກີບ ພ້ອມ​ທັງ​ອຸປະກອນ​ຮັບ​ໃຊ້ເຂົ້າ​ໃນ​ວຽກ​ງານ​ການ​ຜະລິດ​ຈຳນວນ​ໜຶ່ງ.

ພິທີ​ເປີດ​ຂະ​ບວນ​ການ​ສາທິດ ແມ່ນ​ໄດ້​ມີ​ຂຶ້ນ​ໃນ​ວັນ​ທີ 21 ມັງກອນ 2016 ຢູ່​ບ້ານ​ສິມ​ມະໂນ​ເໜືອ ໂດຍ​ການ​ເຂົ້າ​ຮ່ວມ​ຂອງ​ທ່ານ ຄຳ​ແກ່ງ ດວງ​ພະຈັນ ຮອງ​ເຈົ້າເມືອງ​ຫາດ​ຊາຍ​ຟອງ ທ່ານ ຄຳ​ສິງ ຄຸນ​ສະຫວັນ ຮອງ​ຫົວໜ້າ​ພະ​ແນກ​ກະສິກຳ-ປ່າໄມ້ ນະຄອນຫຼວງ ພ້ອມ​ດ້ວຍບັນດາ​ພະນັກງານ​ກ່ຽວຂ້ອງຊາວ​ກະສິກອນ ແລະ ບໍລິສັດ​ຜູ້​ໃຫ້ການ​ສະໜັບສະໜູນ​ເຂົ້າ​ຮ່ວມ.

ທ່ານ ຄຳ​ສິງ ຄຸນ​ສະຫວັນ ໄດ້​ກ່າວ​ວ່າ: ການ​ເປີດ​ຂະ​ບວນການ​ດັ່ງກ່າວ​ນີ້ ແມ່ນ​ເພື່ອ​ເປັນການ​ສ້າງ​ຂະ​ບວນ​ການ​ຊົມເຊີຍ ຜົນສຳເລັດ​ກອງ​ປະຊຸມ​ໃຫຍ່​ຜູ້ແທນ​ທົ່ວ​ປະເທດ ຄັ້ງ​ທີ X ຂອງພັກ​ປະຊາຊົນ​ປະຕິວັດ​ລາວ ທັງເປັນ​ການ​ສືບຕໍ່​ຈັດ​ຕັ້ງ​ຜັນ​ຂະຫຍາຍ​ມະຕິ IX ຂອງ​ພັກ ກໍ່​ຄືມະຕິ VI ຂອງ​ອົງຄະ​ນະ​ພັກ ນະຄອນຫຼວງ​ວຽງ​ຈັນ ເວົ້າ​ລວມ ເວົ້າ​ສະເພາະແມ່ນ​ ເພື່ອ​ໃຫ້​ບັນລຸ​ຕົວ​ເລກຄາດໝາຍ ຫຼຸດຜ່ອນ​ແຮງ​ງານ​ກະສິ​ກຳ​ລົງ​ໃຫ້​ໄດ້ 10% ຕໍ່​ປີ ໂດຍການ​ຫັນ​ເອົາ​ການ​ຜະລິດ​ກະສິກຳແບບ​ທຳ​ມະ​ຊາດ ເຄິ່ງ​ທຳ​ມະຊາດ​ໄປ​ສູ່​ການ​ຜະລິດ​ຕາມ​ທິດຫັນ​ເປັນ​ອຸດສາຫະກຳ ແລະ ທັນສະໄໝ ໂດຍ​ທີ່​ນະຄອນຫຼວງ​ວຽງຈັນ ​ໄດ້​ມີ​ການ​ສົ່ງເສີມ​ການ​ປູກເຂົ້າ​ດ້ວຍ​ການ​ນຳ​ໃຊ້​ກົນ​ຈັກ ແລະ ປັບ​ນາ​ນ້ອຍ​ເປັນ​ນາ​ໄຮ່​ໃຫຍ່ ຕາມ​ເງື່ອນໄຂ​ຕົວ​ຈິງ​ໃນ​ແຕ່​ລະທ້ອງຖິ່ນ ໂດຍ​ມີ​ເປົ້າ​ໝາຍແຜນການ ນັບ​ແຕ່​ປີ 2016-2020 ຈະສູ້​ຊົນ​ສ້າງ​ຕາ​ໜ່າງ​ບໍລິການ​ລົດໄຖ​ນາ​ປັບ​ເນື້ອທີ່ສ້າງ​ສູນ​ບໍ​ລິການ ຕົກກ້າ ລົດ​ດຳນາ ລົດ​ກ່ຽວເຂົ້າ ແລະ ໂຮງ​ອົບ​ເຂົ້າ​ຕິດ​ພັນກັບ​ໂຄງການ​ຜະລິດ​ເຂົ້າ​ເປັນ​ສິນຄ້າ ແລະ ຄອບຄົວ​ຕົວ​ແບບ ຢູ່​ໃນເມືອງ​ເປົ້າ​ໝາຍ​ຄື: ນາ​ຊາຍ​ທອງໄຊ​ທານີ ເມືອງ​ປາກ​ງື່ມ ແລະ ພິເສດ​ແມ່ນ​ເມືອງ​ຫາດ​ຊາຍ​ຟອງ ໂດຍ​ສະເພາະແມ່ນ​ບໍລິສັດ ​ພັນເພັດ​ພັດທະນາ​ກະສິກຳ ຈຳກັດ.