ສຳນັກຂ່າວຕ່າງປະເທດລາຍງານຈາກເມືອງ ໄມອາມີ ອາເມລິກາ ເມື່ອວັນທີ 20 ຜ່ານມາວ່າ: ດາວເຄາະຂະໜາດໃຫຍ່ທີ່ກ່ອນໜ້ານີ້ບໍ່ເຄີຍເປັນທີ່ຮູ້ຈັກ ແລະ ຖືກເອີ້ນຂານຊື່ຫຼິ້ນວ່າ ຄາວເຄາະດວງທີ9 ອາດຈະຖືກຄົ້ນພົບແລ້ວ ໂດຍໂຄຈອນຢູ່ຮອບຂອບນອກຂອງລະບົບສຸລິຍະຈັກກະວານຂອງເຮົາ ຈາກການປະກາດຂອງຄະນະນັກວິທະຍາສາດອາເມລິກາ.
ຖະແຫຼງການຂອງຄະນະນັກວິໄຈສະຖາບັນເຕັກໂນໂລຊີຄາລິຟໍເນຍ ຫຼື ແຄລເທກ (Caltech) ໃນເມືອງແພຊາດີນາ ລັດຄາລິຟໍເນຍລະບຸວ່າ: ວັດຖຸທີ່ກ່າວເຖິງ “ ມີຂະໜາດໃຫຍ່ກວ່າໂລກມະນຸດປະມານ 10 ເທົ່າ ແລະ ໃຫຍ່ກວ່າດາວພລູໂຕປະມານ 5.000 ເທົ່າ ” ມີວົງໂຄຈອນທີ່ແປກ ແລະ ຢືດຍາວ ໃນລະບົບສຸລິຍະທີ່ແສນໄກ ມັນໂຄຈອນຢູ່ຫ່າງຈາກດາວເນປຈູນອອກໄປໄກ ແບບຈຳລອງດ້ວຍຄອມພິວເຕີສະແດງໃຫ້ເຫັນວ່າດາວເຄາະລຶກລັບດວງນີ້ ຫາກມີຢູ່ແທ້ມັນຈະໂຄຈອນຫ່າງຈາກດວງຕາເວັນຫຼາຍກວ່າໂລກປະມານ 20 ເທົ່າ ແລະ ລາຍງານທີ່ຕີພິມໃນວາລະສານດາລາສາດກ່າວວ່າ: ຕາມຄວາມຈິງແລ້ວດາວເຄາະດວງໃໝ່ຈະຕ້ອງໃຊ້ເວລາລະຫວ່າງ 10.000 – 20.000 ປີ ໃນການໂຄຈອນຮອບດວງຕາເວັນພຽງ 1 ຮອບ.
ສອງນັກວິໄຈ ຄອນສແຕນຕິນ ບາຕີກິນ ແລະ ໄມ ບຣາວ ກ່າວວ່າ: ພວກເຂົາຄົ້ນພົບດາວເຄາະດວງນີ້ໂດຍຜ່ານການຈຳລອງແບບທາງຄະນິດສາດ ແລະ ແບບຈຳລອງທາງຄອມພິວເຕີ ແຕ່ຍັງບໍ່ເຄີຍສັງເກດວັດຖຸນີ້ໂດຍກົງ “ມັນຄົງຈະເປັນດາວເຄາະແທ້ໆ” ບຣາວ ສາສະດາຈານດ້ານລາດາສາດດາວເຄາະກ່າວ ແລະ ມັນເປັນວັດຖຸມີຕົວຂະໜາດໃຫຍ່ຫຼາຍຂອງລະບົບສຸລິຍະຈັກກະວານທີ່ຍັງລອຍຢູ່ນັ້ນ ເພື່ອລໍຖ້າການຄົ້ນພົບ ຊຶ່ງເປັນທີ່ຕື່ນເຕັ້ນຫຼາຍທີ່ສຸດ.
ທີ່ມາ: