ສຳນັກຂ່າວຕ່າງປະເທດ ລາຍງານໃນວັນທີ 20 ມັງກອນຜ່ານມານີ້ວ່າ ໃນວັນອັງຄານທີ 19 ມັງກອນ 2016 ປູ່ເຕົ່າ ຊຶ່ງເປັນເຕົ່າຂະໜາດໃຫຍ່ ມີອາຍຸລະຫວ່າງ 80-100 ປີ ແລະ ມີນ້ຳໜັກປະມານ 200 ກິໂລກຣາມ ທີ່ອາໄສຢູ່ພາຍໃນບຶງຮວ່ຽນກ໋ຽມ ບຶງນ້ຳຂະໜາດໃຫຍ່ ໃຈກາງເຂດເມືອງເກົ່າ ຂອງນະຄອນຫລວງຮ່າໂນ້ຍ ແລະ ຖືເປັນສັດສັກສິດໃນຕຳນານ ທີ່ຊາວຫວຽດນາມ ກໍຄືຊາວຮ່າໂນ້ຍ ໃຫ້ຄວາມເຄົາລົບນັບຖື ໄດ້ເສຍຊີວິດລົງແລ້ວ ໂດຍປັດຈຸບັນ ຮ່າງຂອງເຕົ່າດັ່ງກ່າວນີ້ ໄດ້ຖືກເກັບຮັກສາໄວ້ ໃນວັດເທິງດອນກາງບຶງຮວ່ຽນກ໋ຽມ ເພື່ອລໍຖ້າການຕັດສິນໃຈຈາກທາງການ.

ທັງນີ້ ພາຍຫລັງຂ່າວກ່ຽວກັບການຕາຍ ຂອງປູ່ເຕົ່າໂຕດັ່ງກ່າວ ໄດ້ຖືກເຜີຍແຜ່ອອກສູ່ມວນຊົນ ໄດ້ສ້າງຄວາມເສົ້າສະຫລົດໃຈ ໄຫ້ແກ່ຊາວຫວຽດນາມ ໂດຍສະເພາະຊາວນະຄອນຫລວງຮ່າໂນ້ຍ ຢ່າງກວ້າງຂວາງ. ນັກວິທະຍາສາດບາງສ່ວນໄດ້ລະບຸວ່າ ປູ່ເຕົ່າ ໂຕດັ່ງກ່າວນີ້ ອາດແມ່ນປາຝາຍັກແຢງຊີ ໂຕໜຶ່ງ ໃນຈຳນວນທີ່ຍັງເຫລືອໃນໂລກນີ້ ພຽງ 4 ໂຕເທົ່ານັ້ນ ໂດຍອີກ 2 ໂຕ ອາໄສຢູ່ໃນປະເທດຈີນ ແລະ ຍັງເຫລືອອີກ 1 ໂຕ ອາໄສຢູ່ໃນບຶງແຫ່ງໜຶ່ງຂອງຫວຽດນາມ.