ສຳນັກງານສະຖິຕິແຫ່ງຊາດຂອງເຢຍລະມັນເປີດເຜີຍຕົວເລກການເຕີບໂຕເສດຖະກິດໃນປີ 2015 ທີ່ຜ່ານມາດ້ວຍຕົວເລກຜະລິດຕະພັນພາຍໃນ (ຈີດີພີ) ເພີ່ມຂຶ້ນຈາກປີ 2014 ທີ່ເຕີບໂຕ 1,6% ໂດຍບໍລິໂພກພາຍໃນປະເທດຂະຫຍາຍຕົວ 1,9% ເປັນປັດໃຈຕົ້ນຕໍສະໜັບສະໜູນການເຕີບໂຕ.
ເຢຍລະມັນເປັນປະເທດເສດຖະກິດຂະໜາດໃຫຍ່ທີ່ສຸດໃນເອີໂຣໂຊນໄດ້ຮັບອານິສົງຈາກມາດຕະການກະຕຸ້ນເສດຖະກິດຂອງທະນາຄານກາງເອີຣົບ(ອີຊີບີ) ດ້ວຍອັດຕາການວ່າງວຽກທີ່ຕໍ່າສຸດເປັນປະຫວັດສາດ, ຄ່າແຮງງານທີ່ເພີ່ມຂຶ້ນ ປະກອບກັບລາຄານ້ຳມັນທີ່ຕໍ່າກວ່າປີກ່ອນກວ່າ 37% ສົ່ງຜົນເຮັດໃຫ້ການບໍລິໂພກພາຍໃນປະເທດກາຍເປັນແຮງຊຸກຍູ້ການເຕີບໂຕ ຂະນະທີ່ຜູ້ສົ່ງອອກປັບປ່ຽນກົນລະຍຸດຈາກການສົ່ງອອກໄປຍັງຕະຫຼາດເກີດໃໝ່ທີ່ເສດຖະກິດຫົດຕົວມາເປັນຕະຫຼາດປະເທດພັດທະນາແລ້ວທີ່ເສດຖະກິດກຳລັງຟື້ນຕົວ, ຊຶ່ງການບໍລິໂພກພາຍໃນປະເທດຂະຫຍາຍຕົວ 1,9% ໃນປີ 2015 ນັ້ນເປັນການຂະຫຍາຍຕົວສູງສຸດນັບຕັ້ງແຕ່ປີ 2000 ແລະ ຊ່ວຍເພີ່ມຈີດີພີ 1%ໃນປີທີ່ຜ່ານມາ ຂະນະດຽວກັນການໃຊ້ຈ່າຍພາກລັດເພີ່ມຂຶ້ນເປັນ 2,8% ຈາກ 1,7% ໃນປີ 2014 ສູງສຸດນັບຕັ້ງແຕ່ໄລຍະວິກິດເສດຖະກິດປີ 2009 ແລະ ຊ່ວຍເພີ່ມຈີດີພີໄດ້ 0,5% ສ່ວນການສົ່ງອອກເພີ່ມຂຶ້ນ 5,4% ແລະ ການນຳເຂົ້າເພີ່ມຂຶ້ນ 5,7% ໂດຍການຄ້າຊ່ວຍເພີ່ມຈີດີພີ 0,2%.
ຢ່າງໃດກໍຕາມ ທະນາຄານກາງເຢຍລະມັນ(ບຸນເດສແບງ)ຍັງເຊື່ອໝັ້ນວ່າ ເສດຖະກິດຂອງປະເທດຈະເຕີບໂຕໄດ້ເຂັ້ມແຂງຕໍ່ເນື່ອງຢູ່ທີ່ 1,8% ໃນປີ 2016 ແລະ 1,7% ໃນປີ 2018. ຂະນະດຽວກັນງົບປະມານໃນປີທີ່ຜ່ານມາເກີນດຸນສູງສຸດໃນຮອບ 15 ປີດ້ວຍອັດຕາສ່ວນ 0,5% ຂອງຈີດີພີຊ່ວຍໃຫ້ເຢຍລະມັນເຂັ້ມແຂງໃນການຮັບມືກັບຄ່າໃຊ້ຈ່າຍໃນການຊ່ວຍເຫຼືອຜູ້ອົບພະຍົບ.
