ໃນໄລຍະສາມສີ່ວັນມານີ້, ປາກົດວ່າສະພາບການສັນຈອນໃນຕົວເມືອງນະຄອນຫລວງວຽງຈັນແມ່ນມີຄວາມເປັນລະບຽບຮຽບຮ້ອຍດີ, ທັງນີ້ກໍຍ້ອນເຈົ້າໜ້າທີ່ຈາລະຈອນນະຄອນຫລວງວຽງຈັນກໍຄືຕົວເມືອງໃຫຍ່ຕ່າງໆໄດ້ເອົາໃຈໃສ່ປະຕິບັດໜ້າທີ່ລະບາຍການສັນຈອນ ເພື່ອອໍານວຍຄວາມສະດວກແກ່ການສັນຈອນໄປມາຂອງມວນຊົນໃນໄລຍະດໍາເນີນກອງປະຊຸມໃຫຍ່ຄັ້ງທີ Xຂອງພັກໄດ້ເປັນຢ່າງດີ.
ເຈົ້າໜ້າທີ່ພະແນກຈາລະຈອນນະຄອນຫລວງວຽງຈັນ ໃຫ້ຮູ້ວ່າ: ເພື່ອຮັບປະກັນໃຫ້ການສັນຈອນຂອງພາຫະນະໃນຕົວເມືອງມີຄວາມຄ່ອງຕົວເປັນລະບຽບຮຽບຮ້ອຍໃນໄລຍະດໍາເນີນກອງປະຊຸມໃຫຍ່ຄັ້ງທີ X ຂອງພັກນີ້, ເຈົ້າໜ້າທີ່ຈາລະຈອນນະຄອນຫລວງວຽງຈັນໄດ້ສົມທົບກັບເຈົ້າໜ້າທີ່ຈະລາຈອນ 5
ເມືອງໃນນະຄອນຫລວງຫລາຍຮ້ອຍນາຍ ເພື່ອຈັດກໍາລັງລົງປະຕິບັດໜ້າທີ່ຕາມຈຸດສາມແຍກ, ສີ່ແຍກ ແລະ ໃນເສັ້ນທາງທີ່ເຫັນວ່າມີການສັນຈອນໜາແໜ້ນ ເພື່ອລະບາຍການສັນຈອນໃຫ້ມີຄວາມເປັນລະບຽບຮຽບຮ້ອຍ ແລະ ປອດໄພດີ, ໂດຍສະເພາະໃນຊົ່ວໂມງຮີບດ່ວນກໍຄືໂມງເຂົ້າການ-ເລີກການການສັນຈອນແມ່ນມີຄວາມສະດວກໂລ່ງລຽນ, ຂະນະດຽວກັນບັນຫາການເກີດອຸປະຕິເຫດບົນທ້ອງຖະໜົນໃນຕົວເມືອງໃນໄລຍະດັ່ງກ່າວກໍມີໜ້ອຍທຽບກັບໄລຍະກ່ອນ, ແຕ່ເຖິງແນວໃດກໍດີເຈົ້າໜ້າທີ່ພວກເຮົາຍັງຈະສືບຕໍ່ເພີ່ມທະວີການປະຕິບັດໜ້າທີ່ໃຫ້ດີກວ່າເກົ່າຕາມແຈ້ງການຕ່າງໆຂອງນະຄອນຫລວງວຽງຈັນກໍານົດອອກ ເປັນຕົ້ນແມ່ນບໍ່ອະນຸຍາດໃຫ້ລົດບັນທຸກຂະໜາດໃຫຍ່ແລ່ນເຂົ້າໃນເສັ້ນທາງສາຍສໍາຄັນໃນຕົວເມືອງຄື: ຖະໜົນສຸພານຸວົງ, ເຈົ້າຟ້າງຸ່ມ, ສາມແສນໄທ, ເສດຖາທິລາດ, ລ້ານຊ້າງ, ທ່າເດື່ອແຕ່ສາມແຍກຈີ່ນາຍໂມ້ຫາໄຟແດງທາດຂາວ, ຖະໜົນໄກສອນ ພົມວິ ຫານແຕ່ປະຕູໄຊຫາໄຟແດງ 450 ປີ,ຖະໜົນອາຊຽນແຕ່ໄຟແດງບ້ານອາກາດຫາສີ່ແຍກໄຟແດງໂພນສະອາດ, ຖະໜົນກໍາແພງເມືອງເລີ່ມແຕ່ສີ່ແຍກໄຟແດງໂພນທັນຫາສີ່ແຍກໄຟແດງຮ່ອງແຊງ ແລະ ຖະໜົນດົງປາຍນາແຕ່ສີ່ແຍກໄຟແດງໂພນທັນຫາວົງວຽນດົງປາລານ,ພ້ອມດຽວກັນກໍຈະດໍາເນີນລະບຽບເຂັ້ມງວດຕໍ່ນັກຂັບຂີ່ລະເມີດກົດລະບຽບຈະລາຈອນເຊັ່ນ: ມຶນເມົາແລ້ວຂັບຂີ່, ຂັບຂີ່ລົດໄວ, ຈອດລົດຊະຊາຍ ແລະ ລ່ວງປ້າຍຫ້າມຕ່າງໆ ເພື່ອຮັບປະກັນໃຫ້ການສັນຈອນໃນຕົວເມືອງມີຄວາມເປັນລະບຽບປອດໄພ.
ແຫ່ລງຂ່າວ
