ສະຫະປະຊາຊາດເປີດເຜີຍຕົວເລກນັກທ່ອງທ່ຽວທົ່ວໂລກໃນປີ 2015 ເພີ່ມຂຶ້ນ 4,4% ເປັນສະຖິຕິສູງສຸດ 1,18 ຕື້ຄົນ ເຖິງແມ່ນວ່າຈະມີຄວາມກັງວົນເລື່ອງການກໍ່ການຮ້າຍໃນຫລາຍປະເທດ.
ອົງການທ່ອງທ່ຽວໂລກແຫ່ງສະຫະປະຊາຊາດ (ຢູເອັນດັບເບິລຢູທີໂອ) ທີ່ມີສຳນັກງານໃຫຍ່ຕັ້ງຢູ່ແອັດສະປາຍຖະແຫລງໃນວັນທີ 18 ມັງກອນທີ່ຜ່ານມາວ່າ ຕົວເລກນັກທ່ອງທ່ຽວທົ່ວໂລກໃນປີ 2015 ທີ່ຜ່ານມາ ເພີ່ມຂຶ້ນ 4,4% ໂດຍມີນັກທ່ອງທ່ຽວທົ່ວໂລກເຖິງ 1,18 ຕື້ຄົນ, ນັກທ່ອງທ່ຽວເພີ່ມຂຶ້ນ 5,0% ໃນທະວີບເອີຣົບ, ອາຊີປາຊິຟິກ ແລະ ອາເມລິກາ ສ່ວນພາກພື້ນອາຟຣິກາເໜືອຕົວເລກນັກທ່ອງທ່ຽວຫລຸດລົງ 8,0% ເນື່ອງຈາກຕຸຍນີຊີໄດ້ຮັບຜົນກະທົບຈາການກໍ່ການຮ້າຍ. ກ່ອນໜ້ານີ້ຢູເອັນດັບເບິລຢູທີໂອຄາດຄະເນຕົວເລກນັກທ່ອງທ່ຽວທົ່ວໂລກໃນປີ 2015 ຈະເພີ່ມຂຶ້ນຢູ່ທີ່ 3,04,0% ເນື່ອງຈາກນັກທ່ອງທ່ຽວປີ 2014 ເພີ່ມຂຶ້ນ 4,7%, ຄາດວ່າປີ 2020 ຈະເພີ່ມເປັນ 1,4 ຕື້ຄົນ.
ຕົວເລກນັກທ່ອງທ່ຽວທົ່ວໂລກໄດ້ຮັບຜົນກະທົບຢ່າງໜັກເມື່ອເກີດວິກິດການທາງການເງິນທົ່ວໂລກເຮັດໃຫ້ປະຊາຊົນຕ້ອງໄດ້ຫັດສາຍແອວ ແລະ ເລືອກທີ່ຈະຢູ່ໃນເຮືອນຫລາຍກວ່າ ລວມທັງການແພ່ລະບາດຂອງພະຍາດທີ່ຮ້າຍແຮງຕ່າງໆເຊັ່ນ: ການແພ່ລະບາດຂອງໄຂ້ຫວັດໝູໃນປີ 2009 ສົ່ງຜົນເຮັດໃຫ້ນັກທ່ອງທ່ຽວທົ່ວໂລກຫລຸດລົງໄປ 4% (ຕາມຂ່າວຕ່າງປະເທດ).