ເມື່ອຕອນຄ່ຳວັນທີ 16 ມັງກອນ 2015 ທີ່ຜ່ານມາ ຢູ່ທີ່ຮ້ານ ນວນຕາ ປິ້ງເອັນ 500 ບ້ານນາທົ່ມ ເມືອງໄຊທານີ ນະຄອນຫຼວງວຽງຈັນ. ວົງແຈັກເກັດ ໄດ້ຈັດມິນິຄອນເສີດ ເປີດໂຕຢ່າງຍິ່ງໃຫຍ່ ມີແຟນໆ ເຂົ້າຮ່ວມຢ່າງໜາແໜ້ນ. ນອກຈາກນັ້ນແລ້ວ ໃນໂອກາດນີ້ຍັງຖືໂອກາດສະຫຼອງວັນເກີດ ໜຸ່ມໂຊນ່ານ ນັກຮ້ອງນ້ຳຂອງວົງນຳອີກ.
ໜຸ່ມໂຊນ່ານ ໄດ້ໃຫ້ສຳພາດສັ້ນໆ ຕໍ່ນັກຂ່າວພວກເຮົາວ່າ ແຈັກເກັດມີນຳກັນທັງໝົດ 5 ຄົນ ໄດ້ແກ່: ໂຊນ່ານ ຮ້ອງນຳ, ວິ ມືກີຕ້າໂຊໂລ້, ແຂັກ ມືກີຕ້າຄອດ, ໂຈອີ້ ມືເບສ ແລະ ຈອນນີ້ ມືກອງ. ຍ້ອນໂຄງການ M-150 ເສຍສະຫຼະ Cover Contest ທີ່ເຮັດໃຫ້ພວກເຮົາໄດ້ມາຮວມຕົວກັນ. ເຊິ່ງທາງນັກຮ້ອງນຳ ໂຊນ່ານເອງ ໄດ້ົສົ່ງວີດີໂອໂຄເວີເພງດັ່ງກ່າວອັບລົງໃນເພດຂອງ M-150 ວິ ມືກີ້ຕ້າໂຊໂລ້ມາເຫັນ ແລະ ໄດ້ຟັງກໍເລີຍໄດ້ຊວນມາຢູ່ວົງນໍາ. ໃນເມື່ອກ່ອນຊື່ວົງແມ່ນ OLO Rock ເມື່ອໂຊນ່ານເຂົ້າໄປຮ່ວມວົງນຳເລີຍໄດ້ປ່ຽນຊື່ວົງ ຈາກ OLO Rock ເປັນ ວົງ Jacket ຍ້ອນແຕ່ລະຄົນມີຄວາມມັກສະຕາຍການໃສ່ເສື້ອແຈັກເກັດເລີຍ ມີວົງພວກເຮົາໃນປັດຈຸບັນ.
ໃນໄລຍະທີ່ຜ່ານມາ ວົງແຈັກເກັດ ໄດ້ມີໂອກາດຜ່ານຫຼາຍເວທີ ແລະຮ້ອງເພງຕາມສະຖານບັນເທີງມາແລ້ວ ແລະທີ່ສຳຄັນທີ່ສຸດແມ່ນໄດ້ມີ ເພງຂອງວົງອອກມາແລ້ວ 2 ເພງ ຄືເພງ ທົນເພື່ອຫຍັງ ແລະ ບໍ່ຮັກຄືບໍ່ບອກ (ເພງ ບໍ່ຮັກຄືບໍ່ບອກກຳລັງຕັດຕໍ່ວິດີໂອຢູ່).
