ທ່ານ ແວງ ຊອງ ຄອລເລີໂບ ສະຖາປະນິກຊາວແບນຊິກເຊື່ອວ່າທີ່ຢູ່ອາໄສໃນອະນາຄົດຂອງມະນຸດບໍ່ຈຳເປັນຕ້ອງໄປໄກເຖິງອະວະກາດ ແຕ່ເຮົາສາມາດໃຊ້ພື້ນທີ່ໃຕ້ນ້ຳເພື່ອສ້າງໂລກໃໝ່ໃຫ້ກັບມະນຸດຊຶ່ງເອີ້ນວ່າ“ຕຶກໃຕ້ນ້ຳ”ທີ່ລວມກັນເພື່ອເປັນໝູ່ບ້ານໃຕ້ນ້ຳ ພ້ອມທັງລະບົບນິເວດສຳລັບການໃຊ້ຊີວິດຢູ່ພາຍໃນໄດ້.
ໝູ່ບ້ານນິເວດໃຕ້ນ້ຳຂອງທ່ານ ຄອລເລີໂບຫຼືເອີ້ນວ່າ“ເອຄໍວໍເຣີຍໂປຣເຈັກ”ຈະປະກອບມີ ອາຄານໃຕ້ນ້ຳຫຼາຍຫຼັງ ແຕ່ລະຫຼັງສາມາດຮອງຮັບຜູ້ຄົນໄດ້ສູງສຸດ 20 ພັນຄົນ ຈະມີສ່ວນເຊື່ອມຕໍ່ໄປຍັງພື້ນທະເລ ເຮັດໃຫ້ຮູບລັກຊະນະພາຍນອກຄ້າຍຄືກັບແມງກະພຣຸນອີກດ້ານໜຶ່ງຈະເຊື່ອມຕໍ່ທ່າທຽບເຮືອສຳລັບເປັນທາງເຂົ້າ-ອອກຈາກໂລກໃຕ້ທະເລກັບໂລກພາຍນອກທີ່ຖືກປັບແຕ່ງໃຫ້ຢູ່ໃນສະພາບເປັນປ່າແຄມທະເລ, ນອກຈາກພື້ນທີ່ສຳລັບທີ່ຢູ່ອາໄສແລ້ວຈະມີພື້ນທີ່ອື່ນໆເຊັ່ນ: ຫ້ອງປະຕິບັດການທາງວິທະຍາສາດ, ສຳນັກງານ, ໂຮງແຮມ, ສ່ວນພື້ນທີ່ສຳລັບກິລາ ແລະ ສົນທະນາໄປຈົນເຖິງພື້ນທີ່ຟາມກະສິກຳ ຈັດສັນກັນຢູ່ຄົບຖ້ວນໃນອາຄານໃຕ້ນ້ຳລວມ 250 ຊັ້ນທີ່ຈະເລິກລົງໄປໃຕ້ນ້ຳເຖິງ 1 ພັນແມັດ. ຊຶ່ງນ້ຳທະເລຈະນຳມາຜ່ານຂະບວນການໃຫ້ເປັນນ້ຳຈືດສຳລັບອຸປະໂພກບໍລິໂພກພາຍໃນຕຶກ, ສາຫຼ່າຍຈະນຳມາໃຊ້ເປັນສ່ວນໜຶ່ງຂອງການບຳບັດສິ່ງເສດເຫຼືອ, ຂະນະທີ່ແສງສະຫວ່າງຈະໄດ້ມາຈາກແສງສະ ຫວ່າງທາງຊີວະພາບ. ຊຶ່ງຈະມີການອອກແບບໃຫ້ອາຄານໃຕ້ນ້ຳແຕ່ລະຫຼັງມີຄວາມສາມາດ ແລະ ມີຄວາມສົມດຸນສຳລັບໃນການຖ່ວງນ້ຳໜັກເພື່ອໃຊ້ສ້າງສົມດຸນໃຫ້ກັບອາຄານໃນເມື່ອຕ້ອງພົບກັບລົມແຮງຫຼືແຜ່ນດິນໄຫວ.
ຢ່າງໃດກໍຕາມ ເອຄໍວໍເຣີຍ ໂປຣເຈັກ ຍັງເປັນແນວຄິດ ຖ້າຫາກຕ້ອງການໃຫ້ກາຍເປັນຈິງຍັງຕ້ອງອາໄສການວິໄຈ ແລະ ພັດທະນາອີກຫຼາຍຂັ້ນຕອນ ແຕ່ແນວຄິດເລື່ອງການໃຊ້ຊີວິດໃຕ້ນ້ຳຂອງມະນຸດຍັງຖືໄດ້ວ່າໃກ້ຄຽງກັບຄວາມເປັນຈິງຫຼາຍກວ່າການໃຊ້ຊີວິດຢູ່ເທິງອະວະກາດ, ຊຶ່ງປະຈຸບັນເຮົາມີໂລກໃຕ້ນ້ຳຢູ່ແລ້ວຫຼາຍແຫ່ງທົ່ວໂລກເຊັ່ນ: ພັດຕະຄານໃຕ້ນ້ຳຢູ່ທີ່ມັລດິຟສ, ໂຮງແຮມໃຕ້ນ້ຳດູໄບ, ມູເຊໂອ ຊັບອະຄໍວໍຕິໂກເດ ອາເຕ ພິພິຕະພັນໃຕ້ນ້ຳແຫ່ງທຳອິດຂອງໂລກໃນແມັກຊິກ.
ທີ່ມາ: