ອີງ​ຕາມ​ບົດ​ລາຍ​ງານ​ຄາດ​ການເສດ­ຖະ­ກິດ​ໂລກ​ສະ­ບັບ​ທຳ​ອິດ​ປະ­ຈຳ​ປີ 2016 ໄດ້​ລະ­ບຸ​ວ່າ ການ​ເຕີບ​ໂຕ​ຂອງ ເສດ­ຖະ­ກິດ​ໂລກ​ໃນ​ປີ​ນີ້​ມີ​ທ່າ​ອຽງ​ເພີ່ມຂຶ້ນ​ເລັກ​ໜ້ອຍ​ຢູ່​ທີ່ 2,9% ແຕ່​ຖ້າ​ທຽບ ໃສ່​ການ​ຄາດ​ຄະ­ເນ​ທ່າ​ອຽງ​ຂະ­ຫຍາຍຕົວ​ຂອງ​ເສດ­ຖະ­ກິດ​ໂລກ​ທີ່​ລະ­ບຸ​ໄວ້​ຢູ່ໃນ​ບົດ​ລາຍ​ງານ​ສະ­ບັບ​ເມື່ອ​ກາງ​ປີ (ມິຖຸ​ນາ) 2015 ກໍ​ເຫັນ​ວ່າ​ມີ​ການ​ປັບ​ຫຼຸບ​ຕົວ​ເລກ​ຄາດ​ຄະ­ເນ​ລົງ​ອີກ 0,4% ແຕ່​ກໍຖື​ວ່າ​ດີ​ກວ່າ​ອັດ­ຕາ​ການ​ຂະ­ຫຍາຍ­ຕົວ ໃນ​ປີ 2015 ຊຶ່ງ​ຢູ່​ທີ່ 2,4% ເທົ່າ​ນັ້ນ.

ຢ່າງ­ໃດ​ກໍ​ຕາມ ສະ­ພາບ​ການ​ຂະຫຍາຍ​ຕົວ​ຂອງ​ບັນ­ດາ​ປະ­ເທດ​ກຳ­ລັງພັດ­ທະ­ນາ ຊຶ່ງ​ທະ­ນາ­ຄານ​ໂລກ​ໄດ້​ຄາດ ການ​ວ່າ​ຈະ​ຂະ­ຫຍາຍ­ຕົວ​ດີ​ຂຶ້ນ​ຈາກ​ລະດັບ 4,3% ເມື່ອ​ປີ 2015 ມາ​ເປັນ 4,8% ໃນ​ປີ 2016 ນີ້ ແຕ່​ກໍ​ຍັງ​ບໍ່​ເທົ່າ ກັບ​ອັດ­ຕາ​ການ​ຂະ­ຫຍາຍ­ຕົວ​ເມື່ອ​ປີ 2013 ຊຶ່ງ​ເຕີບ​ໂຕ​ເຖິງ​ລະ­ດັບ 5,3% ແລະ​ຖ້າ​ແຍກ​ເປັນ​ຂົງ­ເຂດ​ກໍ​ຈະ​ເຫັນ ວ່າ​ເສດ­ຖະ­ກິດ​ໃນ​ຂົງ­ເຂດ​ອາ­ຊີປາຊີ​ຟິກ​ຈະ​ຂະ­ຫຍາຍ­ຕົວ​ຊ້າ​ລົງ ຊຶ່ງ​ມີ​ປັດໄຈ​ມາ​ຈາກ​ເສດ­ຖະ­ກິດ ສປ ຈີນ ທີ່​ຍັງຜະ­ເຊີນ​ກັບ​ຄວາມ​ຫຍຸ້ງ­ຍາກ ດັ່ງ­ນັ້ນ ທະ­ນາ­ຄານ​ໂລກ​ຈິ່ງ​ຄາດ​ຄະ­ເນດ​ວ່າ ເສດຖະ​ກິດ​ໃນ​ຂົງ­ເຂດ​ຈະ​ຂະ­ຫຍາຍ­ຕົວ​ຊ້າລົງ​ຈາກ 6,4% ເມື່ອ​ປີ 2015 ມາ​ເປັນ 6,3% ໃນ​ປີ 2016 ແລະ 6,2% ໃນ​ປີ 2017.

ຂະ­ນະ​ທີ່​ເສດ­ຖະ­ກິດ​ຂອງ​ຂົງ­ເຂດ​ເອີຣົບ ແລະ​ອາ­ຊີ​ຕາ­ເວັນ​ອອກ​ຈະ​ກັບ​ມາ ຂະ­ຫຍາຍ­ຕົວ​ເຖິງ​ລະ­ດັບ 3,0% ໃນ​ປີ ນີ້ ຈາກ 2,1% ເມື່ອ​ປີ 2015 ສ່ວນ​ປະ­ເທດ​ເສດ­ຖະ­ກິດ​ສຳ­ຄັນ​ຢ່າງ​ອາ​ເມ​ຣິ​ກາ ຊຶ່ງ​ທະ­ນາ­ຄານ​ໂລກ​ກໍ​ໄດ້​ປັບ​ຫຼຸບ​ການ ຂະ­ຫຍາຍ­ຕົວ​ລົງ​ຈາກ​ການ​ຄາດ​ຄະ­ເນ​ຄັ້ງ​ກ່ອນ 0,1% ມາ​ຢູ່​ທີ່ 2,7% ໃນ​ປີ​ນີ້ ເຊັ່ນ​ດຽວ​ກັບ​ສະ­ຫະ­ພາບ​ເອີ​ຣົບ​ກໍ​ປັບ​ຫຼຸດ​ລົງ 0,1% ເຊັ່ນ​ກັນ ແລະ​ມາ​ຢູ່​ທີ່ 1,7% ໃນ​ປີ 2016 ທາງ​ດ້ານ​ປະ­ເທດຍີ່­ປຸ່ນ ​ຊຶ່ງ​ທະ­ນາ­ຄານ​ໂລກ​ກໍ​ໄດ້​ປັບ​ຫຼຸດ ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ລົງເຖິງ 0,4% ຈາກ​ບົດ​ລາຍ​ງານ​ເມື່ອ​ກາງປີ​ທີ່​ຜ່ານ​ມາ ໂດຍ​ໄດ້​ຄາດ​ການ​ວ່າ​ຈະເຕີບ​ໂຕ​ໃນ​ລະ­ດັບ 1,3%.

ສ່ວນ​ການ​ຂະ­ຫຍາຍ­ຕົວ​ດ້ານ​ເສດຖະ​ກິດ​ໃນ​ບັນ­ດາ​ປະ­ເທດ​ຄູ່​ຄ້າ​ສຳ­ຄັນຂອງ ​ສປປ ລາວ ເຊັ່ນ ສປ ຈີນ ກໍ​ມີ​ທ່າ
ອຽງ​ຊ້າ​ລົງ​ດັ່ງ​ທີ່​ລະ­ບຸ​ຢູ່​ຂ້າງ​ເທິງ ເຊັ່ນດຽວ​ກັນ​ກັບ​ເສດ­ຖະ­ກິດ​ໄທ​ກໍ​ຖືກ​ຄາດ ການ​ວ່າ​ພວມ​ຢູ່​ໃນ​ຊ່ວງ​ຂາ​ລົງກົງ​ກັນ ຂ້າມ​ກັບ​ເສດ­ຖະ­ກິດ ສສ ຫວຽດ­ນາມ ໂດຍ​ທະ­ນາ­ຄານ​ໂລກ​ໄດ້​ຄາດ​ຄະ­ເນ​ວ່າ ຈະ​ຂະ­ຫຍາຍ­ຕົວ​ເພີ່ມ​ຂຶ້ນ 0,4% ຈາກ ການ​ຄາດ​ຄະ­ເນ​ຄັ້ງ​ກ່ອນ ຊຶ່ງ​ຈະ​ຂະ ຫຍາຍ​ຕົວ​ໃນ​ລະ­ດັບ 6,6% ແຕ່​ຈະມີ​ທ່າ​ອຽງ​ຊ້າ​ລົງ​ໄປ​ຢູ່​ໃນ​ລະ­ດັບ 6,3% ໃນ​ປີ 2017  ເຊັ່ນ​ດຽວ​ກັບ​ເສດ­ຖະ­ກິດ ສປປ ລາວ​ທີ່​ຈະ​ຂະ­ຫຍາຍ­ຕົວ​ໃນ​ລະ­ດັບ 7,0% ຊຶ່ງ​ເທົ່າ​ກັບ​ການ​ຄາດ​ຄະ­ເນ ເມື່ອ​ກາງ​ປີ­ຜ່ານ­ມາ ແຕ່​ກໍ​ຍັງ​ບໍ່​ເຖິງ​ລະ ດັບ​ທີ່​ເຄີຍ​ເຮັດ​ໄດ້ 8,5% ແລະ 7,5% ເມື່ອ​ປີ 2013 ແລະ2014 ພ້ອມ​ນີ້​ກໍມີ​ການ​ຄາດ​ຄະ­ເນ​ອີ​ກວ່າ ໃນ​ປີ 2017 ແລະ2018 ທ່າ​ອຽງ​ການ​ຂະ­ຫຍາຍ­ຕົວຂອງ​ເສດ­ຖະ­ກິດ​ລາວ​ຈະ​ຫຼຸດ​ລົງ​ເລັກ ໜ້ອຍ​ໄປ​ຢູ່​ໃນ​ລະ­ດັບ 6,9%.

ທີ່ມາ: