ໃນວັນທີ 14 ມັງກອນນີ້, ທະນາຄານລາວ-ຝຣັ່ງ ໄດ້ຈັດພິທີສະເຫລີມສະຫລອງວັນສ້າງຕັ້ງທະນາຄານຂອງຕົນຄົບຮອບ 5 ປີ (26/11/2010-26/11/2015), ຂຶ້ນທີ່ສະຖານທູດຝຣັ່ງ ປະຈຳລາວ, ໂດຍການເຂົ້າຮ່ວມຂອງທ່ານນາງ ໂຄຣດິນ ເລີດູ ເອກອັກຄະລັດຖະທູດຝຣັ່ງ ປະຈຳລາວ, ທ່ານ ໂອລີເວຍ ຄລາຍ ຜູ້ອຳນວຍການໃຫຍ່ທະນາຄານເບຣດ, ມີຜູ້ຕາງໜ້າລັດຖະບານ ແລະທະນາຄານແຫ່ງ ສປປ ລາວ, ເຂົ້າຮ່ວມນຳດ້ວຍ.
ໃນໂອກາດນີ້ ທ່ານທູດໄດ້ກ່າວສະແດງຄວາມຍິນດີຕໍ່ຜົນສຳເລັດການເຮັດວຽກງານບໍລິການຂອງທະນາຄານລາວ-ຝຣັ່ງ ຕະຫລອດໄລຍະ 5 ປີຜ່ານມາ, ຊຶ່ງໄດ້ມີການເຄື່ອນໄຫວຈັດກິດຈະກໍາ
ສະໜັບສະໜູນຄວາມຕ້ອງການແຫລ່ງທຶນໃຫ້ນັກລົງທຶນຕ່າງປະເທດ, ບໍລິສັດ ແລະ ປະຊາຊົນຊາວລາວໄດ້ເປັນຢ່າງດີ, ເຊິ່ງເຮັດໃຫ້ທະນາຄານລາວ-ຝຣັ່ງ, ປະສົບຜົນສຳເລັດເປັນຢ່າງດີໃນໄລຍະ 5 ປີຜ່ານມາ, ພ້ອມນີ້ ທ່ານທູດຍັງໄດ້ຮຽກຮ້ອງໃຫ້ທະນາຄານລາວ-ຝຣັ່ງ ຈົ່ງສືບຕໍ່ອຳນວຍຄວາມສະດວກ ແລະ ໃຫ້ການຊ່ວຍເຫລືອສະໜັບສະໜູນບັນດາທຸລະກິດຕ່າງໆໄດ້ພຽງພໍຕາມຄວາມຕ້ອງການຂອງເຂົາເຈົ້າ.
ຜູ້ອຳນວຍການທະນາຄານໃຫຍ່ທະນາຄານເບຣດ, ເຊິ່ງເປັນທະນາຄານແມ່ທີ່ຕັ້ງຢູ່ປະເທດຝຮັ່ງ ໄດ້ກ່າວໃນພິທີວ່າ: ທະນາຄານລາວ-ຝຣັ່ງ ໄດ້ເປີດໃຫ້ບໍລິການຢ່າງເປັນທາງຢູ່ສປປ ລາວ ມາແຕ່ວັນທີ 26 ພະຈິກ 2010, ແລະເປັນທະນາຄານຂອງທະວີບເອີຣົບແຫ່ງທຳອິດ ແລະ ແຫ່ງດຽວທີ່ໄດ້ສ້າງຕັ້ງຂຶ້ນໃນສປປ ລາວ, ສ່ວນໃຫຍ່ພະນັກງານພາຍໃນທະນາຄານຈະເປັນຄົນລາວ, ເຊິ່ງມີໜ່ວຍບໍລິການທົ່ວປະເທດ 22 ແຫ່ງ, ໂດຍຈະເນັ້ນໃສ່ສົ່ງເສີມ ແລະ ພັດທະນາທາງດ້ານເສດຖະກິດ-ການຄ້າ, ການລົງທຶນເປັນຕົ້ນຕໍ ຕາມຫລັກການ ແລະ ລະບຽບການຂອງທະນາຄານ ແລະ ການເງິນ ເພື່ອໃຫ້ສອດຄ່ອງກັບຄວາມຕ້ອງການຂອງລັດຢ່າງເຂັ້ມງວດ, ພ້ອມນີ້ ຍັງໄດ້ກ່າວຂອບໃຈມາຍັງລູກຄ້າທີ່ໃຫ້ຄວາມໄວ້ວາງໃຈ ເຂົ້າມາໃຊ້ບໍລິການນຳທະນາຄານລາວ-ຝຣັ່ງ ຈຶ່ງເຮັດໃຫ້ທະນາຄານມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ.
ແຫ່ລງຂ່າວ
