ທ່ານ ຄູນສະໄໝ ວຽງພະຈັນ ຮອງຫົວໜ້າຫ້ອງການກະສິກຳ ແລະປ່າໄມ້ເມືອງສະໜາມໄຊ ແຂວງອັດຕະປື ລາຍງານເມື່ອວັນທີ 8 ມັງກອນຜ່ານມານີ້ວ່າ: ພາຍຫຼັງທີ່ຊາວກະສິກອນທົ່ວເມືອງສະໜາມໄຊ ໄດ້ສຳເລັດການເກັບກ່ຽວຜົນຜະລິດເຂົ້ານາປີແລ້ວ ຄະນະພັກອຳນາດການປົກຄອງ ເມືອງເວົ້າສະເພາະກໍຄືຫ້ອງການກະສິກຳ ແລະປ່າໄມ້ເມືອງສະໜາມໄຊ ໄດ້ຫັນເອົາພະນັກງານວິຊາການລົງປະສານສົມທົບກັບອຳນາດການປົກຄອງບ້ານ ແລະປະຊາຊົນໃນເຂດທີ່ມີເງື່ອນໄຂທຳການຜະລິດເພື່ອເກັບກຳຂໍ້ມູນໃນ ການຜະລິດລະດູແລ້ງ ແລະປູກ ເຂົ້ານາແຊງໃນສົກປີນີ້ ຊຶ່ງຕາມແຜນການໃນສົກປີນີ້ ເມືອງສະໜາມໄຊຈະຜະລິດພືດລະດູແລ້ງ ໃຫ້ໄດ້ໃນເນື້ອທີ່ 780 ເຮັກຕາ, ໃນນັ້ນ ເນື້ອທີ່ປູກເຂົ້ານາແຊງມີ 581 ເຮັກຕາ ລື່ນກັນເລັກໜ້ອຍ ເມື່ອທຽບໃສ່ປີຜ່ານມາ ມາຮອດ ປະຈຸບັນ ການຕົກກ້າແມ່ນສຳເລັດ 85% ຄາດວ່າການປັກດຳແມ່ນ ຈະເລີ່ມໃນທ້າຍເດືອນມັງກອນນີ້ ສ່ວນແນວພັນແມ່ນໄດ້ນຳໃຊ້ແນວ ພັນເຂົ້າປັບປຸງເພື່ອຍົກສະມັດຖະພາບຜົນຜະລິດໃຫ້ໄດ້ຕາມຄາດໝາຍ ແນວພັນປັບປຸງທີ່ນຳໃຊ້ມີ ແນວພັນໂພນງາມ, ທ່າດອກຄຳ ແລະເຂົ້າຈ້າວແຂງເພື່ອສົ່ງປ້ອນ ໂຮງງານເບຍ, ທົ່ວເມືອງມີຊົນລະ ປະທານ 6 ແຫ່ງ ແບບຈັກສູບນ້ຳ 1 ແຫ່ງ ແລະເປັນຟາມລົ້ນ 4 ແຫ່ງ ສາມາດຫົດເນື້ອທີ່ທຳການຜະລິດ ລະດູແລ້ງໄດ້ເຖິງ 861 ເຮັກຕາ, ນອກຈາກປູກເຂົ້ານາແຊງແລ້ວ ຊາວກະສິກອນພາຍໃນເມືອງສະໜາມໄຊຍັງໄດ້ສຸມໃສ່ປູກພືດຜັກ ຕ່າງໆເພື່ອປ້ອນສົ່ງຂາຍຕະຫຼາດ ເຊັ່ນ: ໝາກໂມ, ໝາກແຕງ, ພືດຕະກຸນຖົ່ວ ແລະພືດຜັກອື່ນໆອີກ ໃນເນື້ອທີ່ 199 ເຮັກຕາ.