ຂປລ. ອີງຕາມຂໍ້ມູນລາຍງານ ຈາກຫ້ອງການແຜນການ ແລະ ການລົງທຶນເມືອງດາກຈຶງ ​ແຂວງ​ເຊ​ກອງ ໃຫ້ຮູ້ ວ່າ: ດາກຈຶງ ເປັນເມືອງທີ່ມີທ່າແຮງ ດຶງດູດການລົງທຶນ ເຂົ້າໃນຫລາຍຂົງເຂດເປັນຕົ້ນ ການຜະລິດກະສິກຳ, ອຸດສາຫະກຳ ແລະ ການບໍລິການ. ນັບແຕ່ປີ 2015-2019 ເມືອງ ຈະສູ້ຊົນປະຕິບັດໂຄງການ ລົງທຶນໃຫ້ໄດ້ທັງໝົດ 170 ໂຄງການລວມມູນຄ່າ 243 ຕື້ກວ່າກີບ ປະກອບມີການລົງທຶນຂອງລັດ, ເອກະຊົນ ແລະ ສິນເຊື່ອທະນາຄານ. ໂຄງການເຫລົ່ານີ້ ໄດ້ແບ່ງເປັນ ຂົງເຂດ ຄື: ຂົງເຂດເສດຖະກິດ ປະກອບມີຂະແໜງກະສິກຳ ແລະປ່າໄມ້ 26 ໂຄງການມູນຄ່າ 48 ຕື້ກວ່າກີບ; ພະລັງງານ ແລະ ບໍ່ແຮ່ 7 ໂຄງການມູນຄ່າ 38,6 ຕື້ກີບ; ໂຍທາທິການ ແລະຂົນສົ່ງ 12 ໂຄງການມູນຄ່າ 37 ຕື້ກວ່າກີບ; ອຸດສາຫະກຳ ແລະ ການຄ້າ 16 ໂຄງການມູນຄ່າ 9 ຕື້ກວ່າກີບ; ຊັບພະຍາກອນທຳມະຊາດ ແລະ ສິ່ງແວດລ້ອມ 11 ໂຄງການມູນຄ່າ 5 ຕື້ກວ່າກີບ; ວິທະຍາສາດ ແລະ ເຕັກໂນໂລຊີ 4 ໂຄງການມູນຄ່າ 236 ລ້ານກີບ ແລະ ຂະແໜງໄປສະນີ, ໂທລະຄົມ ແລະ ການສື່ ສານ 1 ໂຄງການ,ມູນຄ່າ 1 ຕື້ກີບ. ສໍາລັບຂົງເຂດ ວັດທະນະທຳ–ສັງຄົມມີ 53 ໂຄງການ, ມູນຄ່າ 40 ຕື້ກວ່າກີບ, ໃນນີ້ປະກອບ ມີຂະແໜງການສຶກສາ ແລະ ກິລາ 17 ໂຄງການມູນຄ່າ 11 ຕື້ກວ່າກີບ; ສາທາລະນະສຸກ 16 ໂຄງການມູນຄ່າ 15 ຕື້ກວ່າກີບ; ຖະແຫລງຂ່າວ, ວັດທະນະທຳ ແລະທ່ອງທ່ຽວ 20 ໂຄງການມູນຄ່າ 12 ຕື້ກວ່າກີບ, ສ່ວນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກມີ 11 ໂຄງການມູນຄ່າ 14 ຕື້ກວ່າກີບ;  ຂົງເຂດການເມືອງ 4 ໂຄງການມູນຄ່າ 1,6 ຕື້ກີບ ແລະ ອີກ 3 ໂຄງການແມ່ນຂົງເຂດຕຸລາການລວມມູນຄ່າ 3,8 ຕື້ກີບ.

ແຫລ່ງຂ່າວ: