ສຳນັກຂ່າວຕ່າງປະເທດ ລາຍງານໃນວັນທີ 15 ມັງກອນນີ້ວ່າ ທ່ານ ບັນກີມູນ ເລຂາທິການອົງການສະຫະປະຊາຊາດ ຫລື UN ໄດ້ອອກມາປະນາມ ຕໍ່ເຫດການກໍ່ການຮ້າຍ ໂຈມຕີນະຄອນຫລວງຈາກາຕາ ປະເທດອິນໂດເນເຊຍ ຊຶ່ງເຮັດໃຫ້ມີຜູ້ເສຍຊີວິດ 7 ຄົນ ແລະ ບາດເຈັບອີກ 20 ກ່ວາຄົນ ເມື່ອວັນພະຫັດທີ 14 ມັງກອນ 2015 ຜ່ານມານີ້ ໂດຍທ່ານໄດ້ກ່າວວ່າ ” ຂໍປະນາມການລະເບີດ ແລະ ການໂຈມຕີດ້ວຍອາວຸດປືນ ໃນນະຄອນຫລວງຈາກາຕາ, ຂໍສະແດງຄວາມເສຍໃຈ ໄປຍັງຄອບຄົວຂອງຜູ້ເສຍຊີວິດ ແລະ ຜູ້ໄດ້ຮັບບາດເຈັບ ແລະ ຂໍສະແດງຄວາມເປັນນ້ຳໜຶ່ງໃຈດຽວ ກັບລັດຖະບານ ແລະ ປະຊາຊົນຊາວອິນໂດເນເຊຍ ແລະ ຫວັງວ່າ ຜູ້ກະທຳຜິດໃນການໂຈມຕີຄັ້ງນີ້ ຈະຖືກດຳເນີນຄະດີຢ່າງວ່ອງໄວ ເພື່ອຄວາມຍຸຕິທຳ “.