ສຳລັບປີ 2013 ລັດຖະບານ ກໍ່ຄືທະນາຄານແຫ່ງ ສປປ ລາວ (ທຫລ) ໄດ້ເອົາໃຈໃສ່ຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດວຽກງານຂະແໜງການເງິນ ໃຫ້ມີຄວາມສົມດູນ ແລະ ໝັ້ນທ່ຽງ ໂດຍໃຊ້ກົນໄກການບໍລິຫານການເງິນທີ່ມີຄຸນນະພາບ ເຂົ້າໃນການຄຸ້ມຄອງ-ບໍລິຫານດ້ານການເງິນ-ການທະນາຄານ ໃຫ້ໄປຕາມທິດຊີ້ນຳຂອງຂັ້ນເທິງວາງໄວ້.
ທ່ານ ດຣ. ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ ກ່າວໃນກອງປະຊຸມເປີດກວ້າງ ຄັ້ງທີ 8 ສະໄໝທີ 2 ຂອງຄະນະບໍລິຫານງານພັກທະນາຄານແຫ່ງ ສປປ ລາວ ວ່າ: ນອກຈາການເອົາໃຈໃສ່ສຶກສາອົບຮົມດ້ານການເມືອງ-ແນວຄິດໃຫ້ຄະນະພັກ ຄະນະນຳ ຕະຫຼອດຮອດພະນັກງານ-ວິຊາການ ທຫລ ໄດ້ເປັນເຈົ້າການປະຕິບັດວຽກງານຂະແໜງການເງິນ ທີ່ຕົນເອງຮັບຜິດຊອບດ້ວຍຄວາມຮັບຜິດຊອບສູງ ປີຜ່ານມາ ທຫລ ສາມາດຮັກສາສະຖຽນລະພາບເງິນຕາແຫ່ງຊາດໄວ້ໄດ້ຢ່າງໝັ້ນທ່ຽງ ອັດຕາເງິນເຟີ້ຢູ່ໃນລະດັບຕ່ຳ (ສະເລ່ຍ 6,37%) ອັດຕາແລກປ່ຽນເຖິງຈະມີການເໜັງຕີງແຕ່ກໍ່ສາມາດຄວບຄຸ້ມໄດ້ ເງິນກີບແຂງຄ່າ-ອ່ອນຄ່າຢູ່ໃນເກນກຳນົດຂອງລະບົບການເງິນ ຄັງສຳຮອງ ເງິນຕາຕ່າງປະເທດ ສາມາດກຸ້ມການນຳເຂົ້າໄດ້ 4,89 ເດືອນ ຄຽງຄູ່ກັນນັ້ນ ທຫລ ຍັງໄດ້ປະຕິບັດຢ່າງຫ້າວຫັນເຂົ້າໃນວຽກງານລະດົມທຶນ ເຊິ່ງຜ່ານການປະຕິບັດຕົວຈິງສາມາດລະດົມທຶນໄດ້ເພີ່ມຂຶ້ນ 19,59% ແລະ ອັດຕາສ່ວນເປັນສະກຸນເງິນກີບກໍ່ເພີ່ມສູງຂຶ້ນ ການສະໜອງສິນເຊື່ອຜ່ານລະບົບທະນາຄານ (ບໍ່ລວມທະນາຄານນະໂຍບາຍ) ໄດ້ເພີ່ມຂຶ້ນ 35,4% ອັດຕາສ່ວນ NLP ຢູ່ໃນລະດັບກຳນົດໄວ້ 2,28% ພ້ອມນັ້ນ ການຄຸ້ມຄອງທະນາຄານ ແລະ ສະຖາບັນການເງິນຢູ່ຂອບເຂດທົ່ວປະເທດ ທີ່ມີທັງໝົດປະມານ 100 ກວ່າແຫ່ງ ທຫລ ໄດ້ຄຸ້ມຄອງ ແລະ ຫັນສູ່ລະບຽບກົດໝາຍຢ່າງເຄັ່ງຄັດຕາມສາກົນ ທັງນີ້ກໍ່ເພື່ອແນໃສ່ຮອງຮັບການເຂົ້າເປັນປະຊາຄົມ AEC ໃນອະນາຄົດມໍ່ໆນິ້.
http://www.vientianemai.net/teen/khao/1/11403