ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ (​ຍທຂ.ນວ) ສົມທົບ​ກັບ​ຫ້ອງການ ​ຍທຂ ເມືອງ ແລະ ເຈົ້າ​ໜ້າທີ່ໆກ່ຽວຂ້ອງ ລົງ​ກວດກາ ແລະ ຕັດ-ຖອນ​ປ້າຍ​ໂຄສະນາ​ຕ່າງໆ ທີ່ຕິດ​ຕັ້ງ​ບໍ່​ຖືກ​ລະບຽບ​ຕາມ​ແຄມທາງ​ໃນ​ນະຄອນຫຼວງ ເພື່ອ​ແນໃສ່​ສ້າງ​ຄວາມ​ສະອາດ ແລະ ເປັນ​ລະບຽບ​ຮຽບ​ຮ້ອຍ​ຄຳນັບ​ຮັບຕ້ອນ​ກອງ​ປະຊຸມ​ໃຫຍ່​ ຜູ້​ແທນ​ທົ່ວປະເທດ ຄັ້ງ​ທີ X ຂອງ​ພັກ ກອງປະຊຸມ​ສຸດ​ຍອດ​ອາ​ຊຽນທີ່ ​ສປປ ລາວ ໄດ້​ຮັບ​ກຽດ​ເປັນ​ເຈົ້າພາບ ທັງ​ເປັນ​ການ​ປູກ​ຈິດ​ສຳນຶກ​ໃຫ້​ສັງຄົມ ​ປະຕິບັດ​ຄຳ​ສັ່ງ​ແນະນຳ ກໍ່​ຄືລະບຽບ​ການ​ຕ່າງໆ​ຂອງ​ຂັ້ນ​ເທິງຢ່າງ​ເຂັ້ມ​ງວດ.

ສະເລ່ຍ​ປ້າຍ​ທີ່​ບໍ່​ຖືກ​ລະບຽບ ທັງ​ປ້າຍ​ນ້ອຍ-ປ້າຍ​ໃຫຍ່​ຢູ່​ໃນ 4 ເມືອງ​ໃນ ນວ ມີ​ປະມານ 600 ປ້າຍ ເຊິ່ງ​ພວກ​ເຮົາ​ຈະ​ຕັດ-ຖອນອອກ​ໃຫ້​ສຳເລັດ ແລະ ຂໍ​ແຈ້ງ​ມາຍັງ​ປະຊາຊົນ ຫຼື ຜູ້​ປະກອບ​ການຕ່າງໆ​ຕາມ​ແຄມ​ທາງ ຖ້າ​ຢາກໂຄສະນາ ແລະ ເຮັດ​ກິດຈະການຕ່າງໆ​ຕາມ​ແຄມ​ທາງ ຕ້ອງ​ຜ່ານ​ພະ​ແນກ ​ຍທຂ.ນວ ເສຍ​ກ່ອນ.