ລັດຖະບານຍີ່ປຸ່ນໄດ້ອະນຸມັດເງິນຊ່ວຍເຫຼືອລ້າ ຈຳນວນ 70 ລ້ານເຢັນ ຫຼື ປະມານ 4,83 ຕື້ກີບ ໃຫ້ແກ່ ສປປ ລາວ ເພື່ອນຳໃຊ້ເຂົ້າໃນການຈັດຕັ້ງປະຕິບັດ ກ່ຽວກັບວຽກງານການອອກແບບໂຄງການລະອຽດຂອງໂຄງການກໍ່ສ້າງຂົວ ຢູ່ເສັ້ນທາງເລກ 9 (ທາງເຊື່ອມຕໍ່ມຸກດາຫານ (ໄທ)-ສະຫວັນນະເຂດ (ສປປ ລາວ)-ຫວຽດນາມ) ເພື່ອແນໃສ່ເຮັດໃຫ້ການຂົນສົ່ງທາງບົກມີ ຄວາມສະດວກຍິ່ງຂຶ້ນ.
ພິທີລົງນາມສັນຍາຮັບການຊ່ວຍເຫຼືອດັ່ງກ່າວ ໄດ້ຈັດຂຶ້ນວັນທີ 13 ມັງກອນ 2016 ຢູ່ກະຊວງແຜນການ ແລະ ການລົງທຶນ ເຊິ່ງຕາງໜ້າຝ່າຍລາວລົງນາມ ໂດຍທ່ານນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ກະຊວງ ຜທ ກັບທ່ານ Yukuke MURAKAMI ຫົວໜ້າອົງການຮ່ວມມືສາກົນຍີ່ປຸ່ນ (ໄຈກາ) ປະຈຳ ສປປ ລາວ ໂດຍມີຕາງໜ້າຈາກບັນດາກະຊວງ ກົມ ພະແນກການກ່ຽວຂ້ອງເຂົ້າຮ່ວມ.
ໂຄງການອອກແບບໂຄງການລະອຽດຂອງໂຄງການກໍ່ສ້າງຂົວ ຢູ່ເສັ້ນທາງເລກ 9 ຈະຈັດຕັ້ງປະຕິບັດພາຍໃຕ້ການຮ່ວມມືລະຫວ່າງອົງການໄຈກາ ແລະ ກົມຂົວ-ທາງ ກະຊວງໂຍທາທິການ ແລະ ຂົນສົ່ງ ໂດຍມີຈຸດປະສົງເພື່ອປັບປຸງ ແລະ ຮັບປະກັນທາງດ້ານຄຸນະພາບຂອງການຂົນສົ່ງທາງບົກ ໂດຍສະເພາະ ຕາມເສັ້ນທາງເລກ 9 ເຊິ່ງເປັນເສັ້ນທາງເຊື່ອມຕໍ່ເສດຖະກິດອະນຸພາກພື້ນຕາເວັນອອກ-ຕາເວັນ ຕົກ ຕອນລຸ່ມແມ່ນ້ຳຂອງ ສຳລັບການສ້າງຂົວຈະປະກອບມີສອງແຫ່ງ ເພື່ອປ່ຽນແທນຂົວເກົ່າ ຄື: ຂົວເຊກຸມກຳ ແລະ ຂົວເຊທ່າມວກ ເຊິ່ງການຈັດຕັ້ງປະຕິບັດຈະເລີ່ມໃນເດືອນກັນຍາ 2016 ແລະ ຈະໃຊ້ເວລາກໍ່ສ້າງ 31 ເດືອນ.
ແຫລ່ງຂ່າວ:
