ສຳນັກຂ່າວຕ່າງປະເທດ ລາຍງານໃນວັນທີ 13 ມັງກອນນີ້ວ່າ ການສົ່ງອອກເຂົ້າຂອງມຽນມາ ໃນໄລຍະ 10 ເດືອນຜ່ານມາ ຂອງສົກງົບປະມານ 2015-2016 (ເດືອນເມສາ 2015 – ເດືອນມີນາ 2016) ບັນລຸໄດ້ 830,000 ໂຕນ ສາມາດສ້າງລາຍຮັບໄດ້ ຫລາຍກ່ວາ 308 ລ້ານໂດລາ ຊຶ່ງຫລຸດລົງ 62 ລ້ານໂດລາ ຫລື ປະລິມານຫລຸດລົງ ຫລາຍກ່ວາ 150,000 ໂຕນ ເມື່ອທຽບກັບໄລຍະດຽວກັນ ຂອງສົກງົບປະມານຜ່ານມາ.
ທັງນີ້ ຍອດການສົ່ງອອກດັ່ງກ່າວຫລຸດລົງ ແມ່ນມີສາເຫດຫລັກ ເນື່ອງຈາກມຽນມາ ປະສົບກັບອຸທົກກະໄພຄັ້ງໃຫຍ່ ທີ່ເກີດຂຶ້ນເມື່ອບໍ່ດົນຜ່ານມານີ້ ອັນໄດ້ເຮັດໃຫ້ເນື້ອທີ່ປູກເຂົ້າຂອງປະເທດ ຖືກທຳລາຍຢ່າງໜັກໜ່ວງ.