ໃນຕອນເຊົ້າວັນທີ 7 ມັງກອນຜ່ານມານີ້, ທ່ານ ຄຳໄຕ ສີພັນດອນ ອະດີດປະທານພັກ, ປະທານປະເທດແຫ່ງ ສປປ ລາວ ໄດ້ໃຫ້ກຽດພົບປະໂອ້ລົມພະນັກງານການນຳ ແລະ ຫລັກແຫລ່ງແຂວງສະຫວັນນະເຂດ, ຊຶ່ງມີຂຶ້ນທີ່ຫ້ອງວ່າການດັ່ງກ່າວ ພາຍຫລັງທ່ານ ດຣ. ສຸພັນ ແກ້ວມີໄຊ ເລຂາພັກແຂວງ, ເຈົ້າແຂວງສະຫວັນນະເຂດ ໄດ້ລາຍງານໂດຍຫຍໍ້ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ໃຫ້ທ່ານອະດີດປະທານພັກໄດ້ຮັບຊາບ, ເຊິ່ງເຫັນໄດ້ວ່າແຂວງສະຫວັນນະເຂດຍັງຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ລະດັບການພັດທະນາເສດຖະກິດ-ສັງຄົມກໍມີຄວາມກ້າວໜ້າຂຶ້ນຕາມລຳດັບ. ຈາກນັ້ນ ທ່ານອະດີປະທານພັກ ອະດີດປະທານປະເທດແຫ່ງ ສປປ ລາວ ກໍໄດ້ໂອ້ລົມ ແລະ ໃຫ້ທິດຊີ້ນຳຫລາຍບັນຫາຕໍ່ການນຳ ແລະພະນັກງານຫລັກແຫລ່ງຂອງແຂວງ. ກ່ອນອື່ນທ່ານ ໄດ້ຍົກໃຫ້ເຫັນສະພາບການ
ຂອງໂລກ ແລະ ຂອງພາກພື້ນທີ່ກຳລັງມີການປ່ຽນແປງໄປຢ່າງສັບສົນ, ໃນນີ້ ລວມມີບັນຫາຂະບວນການກໍ່ການຮ້າຍໃນເຂດຕາເວັນອອກກາງ, ບັນຫາການກໍ່ການຮ້າຍຂອງກຸ່ມມຸດສະລິມຫົວຮຸນແຮງ, ບັນຫາຄວາມຮຸນແຮງຂອງກຸ່ມໄອເອສ໌ ທີ່ມີຕໍ່ບັນດາປະເທດຕາເວັນຕົກ ທີ່ອາດນຳໄປສູ່ການກໍ່ໃຫ້ເກີດສົງ ຄາມສາສະໜາ, ບັນຫາຄວາມຂັດແຍ່ງໃນທະເລຈີນໃຕ້ ແລະ ບັນຫາອື່ນໆ ເຊິ່ງອາດຈະເກີດເປັນສົງຄາມໂລກຄັ້ງທີ III ກໍເປັນໄປໄດ້, ຈາກບັນຫາສະພາບການຂອງໂລກທີ່ກຳລັງສັບສົນໃນປັດຈຸບັນມັນຮຽກຮ້ອງໃຫ້ພວກເຮົາທຸກຄົນຕ້ອງລະມັດລະວັງຫລາຍດ້ານ ແລະ ໃນນັ້ນ ແມ່ນການວາງທັດສະ ນະທາງດ້ານການທູດກັບບັນດາປະເທດເພື່ອນມິດ ເພື່ອເຮັດແນວໃດຈະນຳເອົາຜົນປະໂຫຍດຈາກການຮ່ວມມືກັບຕ່າງປະເທດມາໃຫ້ປະເທດເຮົາໄດ້ຫລາຍທີ່ສຸດ. ທາງດ້ານການເມືອງເຫັນໄດ້ວ່າສະພາບການພາຍໃນປະເທດເຮົາ ຍາມໃດພວກສັດຕູກໍຍັງບໍ່ຫລຸດລະຄວາມພະຍາຍາມໃນການມ້າງເພລະ ບອບໃໝ່, ພະຍາຍາມສ້າງຄວາມບໍ່ສະຫງົບ ແລະ ໃສ່ຮ້າຍປ້າຍສີລະບອບໃໝ່ຂອງພວກເຮົາ. ສະນັ້ນ ບັນຫາຫລາຍໆດ້ານຈະຕ້ອງໄດ້ຮັບການແກ້ໄຂຢ່າງຮີບດ່ວນ ແລະ ບໍ່ເປີດຊ່ອງວ່າງໃຫ້ພວກສັດຕູແຊກແຊງໄດ້, ໃນນນັ້ ແມ່ນການແກ້ໄຂຄວາມທຸກຍາກຂອງປະຊາຊົນ, ແກ້ໄຂບັນຫາຢາເສບຕິດ, ບັນຫາການສ້າງຄ່ານິຍົມແບບບໍ່ຖືກຕ້ອງໃນຮູບແບບການສື່ສານດ້ວຍລະບົບອອນລາຍຕ່າງໆ ທີ່ສ້າງຄວາມແຕກແຍກ ແລະ ໂຍມຕີລະບອບການເມືອງຂອງພວກເຮົາ, ແກ້ໄຂບັນຫາການສໍ້ລາດບັງຫລວງ, ແນວຄິດອາດຍາສິດ, ການສ້າງກຸ່ມກ້ອນ ແລະ ບັນຫາການທຳລາວຊັບພະຍາກອນທຳມະຊາດ ພ້ອມນັ້ນ ທ່ານຍັງໄດ້ເວົ້າເຖິງການອະນຸລັກຮັກສາຮີດຄອງປະເພນີທີ່ດີງາມຂອງຊາດລາວ-ຄົນລາວ ແລະ ບັນຫາອື່ນໆ. ຈາກນັ້ນ ທ່ານອະດີດປະທານພັກ ກໍຍັງໄດ້ແນະນຳຕື່ມກ່ຽວກັບການພັດທະ ນາແບບຍືນຍົງ, ເຊິ່ງກ່ຽວໂຍງກັບການນຳໃຊ້ຊັບພະຍາກອນທຳມະຊາດມາເປັນພື້ນຖານໃຫ້ແກ່ການພັດທະນາເສດຖະກິດ, ການພັດທະນາແບບຍືນຍົງຕ້ອງໄດ້ຄຳນຶງເຖິງຄວາມເໝາະສົມ ແລະ ເປັນທຳໃນການແຈກຢາຍໝາກຜົນໃນການນຳໃຊ້ຊັບພະຍາກອນທາງທຳມະຊາດ.ນອກນັ້ນ ທ່ານຍັງໄດ້ເວົ້າເຖິງຍຸດທະສາດ ແລະ ວິໄສທັດໃນການພັດທະນາປະເທດຊາດແຕ່ນີ້ຫາປີ 2020 ແລະ ແຕ່ປີ2020-2030 ໂດຍນເນັ້ນໃສ່ສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງໃຫ້ເປັນຫົວໜ່ວຍພັດທະນາ. ທ່ານອະດີປະທານພັກ ຍັງໄດ້ເນັ້ນໜັກຕື່ມຕໍ່ບັນດາສະມາຊິກພັກທຸກສະຫາຍ ຕ້ອງໄດ້ເປັນເຈົ້າການໃນການປົກປັກຮັກສາລະບອບໃໝ່, ຕ້ອງກຳແໜ້ນສະພາບການໃນແຕ່ລະດ້ານ ໂດຍສະເພາະແມ່ນໃນປັດຈຸບັນນີ້ ອິດທິກຳລັງປະຕິການແມ່ນກຳລັງຈ້ອງມອງ ແລະ ໃຊ້ຊ່ອງຫວ່າງເພື່ອແຊກແຊງ ແລະ ກໍຄວາມບໍ່ສະຫງົບໃນສັງຄົມເຮົາ, ສວຍໃຊ້ຂໍ້ຂັດແຍ່ງຈາກປະເທດໃກ້ຄຽງເພື່ອແຊກແຊງ ແລະ ກໍ່ຄວາມບໍ່ສະຫງົບໃນບາງທ້ອງຖິ່ນ, ສະນັ້ນ ສະມາ ຊິກພັກ ແລະ ພະນັກງານທຸກຄົນຕ້ອງໄດ້ເປັນເຈົ້າການປະກອບສ່ວນເຮັດໃຫ້ສັງຄົມມີຄວາມສະຫງົບສຸກ ປະກອບສ່ວນເຮັດໃຫ້ຊີວິດການເປັນຢູ່ຂອງຕົນໄດ້ຮັບການພັດທະນາ ແລະ ສາມາດລຶບລ້າງຄວາມທຸກຍາກໄດ້ເທື່ອລະກ້າວ.
ແຫ່ລງຂ່າວ
