ພິທີ​ປະກາດ​ເປັນ​ໂຮງຮຽນປອດ​ສິ່ງ​ເສບ​ຕິດ ຊັ້ນ​ມັດທະຍົມສຶກ​ສາ​ສົມບູນ (​ມສ) 5 ແຫ່ງ ທົ່ວ​ເມືອງ​ສັງ​ທອງ ນະຄອນຫຼວງວຽງ​ຈັນ ມີ​ຂຶ້ນ​ໃນ​ອາທິດ​ຜ່ານ​ມາ ທີ່​ໂຮງຮຽນ ​ມສ ສີ​ທອງ ມີ​ທ່ານ ຊົມ​ພູ ແກ້ວ​ປັນຍາ ຫົວໜ້າ​ພະແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ ທ່ານ​ຮອງ​ເຈົ້າເມືອງ​ສັງ​ທອງ ຄະນະ​ກວດກາຄວບ​ຄຸມ​ຢາ​ເສບ​ຕິດ​ນະຄອນຫຼວງ ຫົວໜ້າ​ຫ້ອງການ​ສຶກ​ສາ​ທິ​ການ ແລະ ກີລາ​ເມືອງ ບັນດາ​ຄູ-ອາຈານ ແລະ ນັກຮຽນ​ເຂົ້າ​ຮ່ວມ.

ໂຮງຮຽນ​ປອດ​ສິ່ງ​ເສບ​ຕິດ ຊັ້ນມັດທະຍົມ​ສຶກ​ສາ​ສົມບູນ 5 ແຫ່ງ ປະກອບ​ມີ​ໂຮງຮຽນ ​ມສ ປາກຕອນ ມີ​ນັກຮຽນ​ທັງ​ໝົດ 551 ຄົນ ຍິງ 259 ຄົນ ສາມາດ​ຕີ​ລາຄາເປົ້າ​ໝາຍ​ກຸ່ມ​ເສບ ແລະ ກຸ່ມ​ສ່ຽງ 99% ໂຮງຮຽນ ​ມສ ນ້ຳ​ສັງ ມີນັກຮຽນ​ທັງ​ໝົດ 559 ຄົນ ຍິງ 233 ຄົນ ສາມາດ​ຕີ​ລາຄາ​ເປົ້າໝາຍ​ກຸ່ມ​ເສບ ແລະ ກຸ່ມ​ສ່ຽງ 97,76% ໂຮງຮຽນ ​ມສ ສັງ​ໄຊ ມີ​ນັກຮຽນ​ທັງ​ໝົດ 345 ຄົນ ຍິງ 151 ຄົນ ສາມາດ​ຕີ​ລາຄາ​ເປົ້າໝາຍ​ກຸ່ມ​ເສບ ແລະ ກຸ່ມ​ສ່ຽງ 97,46% ໂຮງຮຽນ ​ມສ ນາທຽມ ມີ​ນັກຮຽນ​ທັງ​ໝົດ 536 ຄົນ ຍິງ 325 ຄົນ ສາມາດ​ຕີ​ລາຄາ​ເປົ້າ​ໝາຍ​ກຸ່ມ​ເສບ ແລະ ກຸ່ມສ່ຽງ 99% ແລະ ໂຮງຮຽນ ​ມສ ສີ​ທອງ ມີ​ນັກຮຽນ​ທັງ​ໝົດ 538 ຄົນ ຍິງ 266 ຄົນ ສາມາດ​ຕີ​ລາຄາ​ເປົ້າ​ໝາຍ​ກຸ່ມ​ເສບ ແລະ ກຸ່ມສ່ຽງ 97,03% ການ​ປູກ​ຈິດ​ສຳນຶກ​ໃຫ້​ນັກຮຽນ​ຮູ້ຈັກ​ຜົນ​ຮ້າຍ​ຂອງ​ສິ່ງ​ເສບ​ຕິດ ເຝິກອົບຮົມ​ການ​ນຳໃຊ້ ແລະ ຫຼີ້ນ​ເປຍ​ໂນ ສ້າງ​ເດີ່ນກີລາ​ປະເພດ​ຕ່າງໆ ສິລະ​ປະ​ໂຮງຮຽນ ຈັດ​ກິດຈະກຳ​ຖາມ-ຕອບຄຳ​ຖາມ​ວິທະຍາສາດ ແລະ ໄດ້ແຕ່ງຕັ້ງ​ທີມ ​ອພສພ ປະຈຳ​ໂຮງຮຽນ ສາຍ​ວີ​ດີ​ໂອ​ໃຫ້​ນັກຮຽນ​ຮູ້ຜົນ​ຮ້າຍ​ຂອງ​ສິ່ງ​ເສບ​ຕິດ ໃນ​ແຕ່ລະ​ເດືອນ​ໂຮງຮຽນ ​ມສ 5 ແຫ່ງ ໄດ້​ມີ​ການ​ຖອດ​ຖອນ​ບົດຮຽນ ທັງປະ​ເມີນ​ໃນ​ການຈັດຕັ້ງ​ປະຕິບັດການ​ສະກັດ​ກັ້ນ ແລະ ຕ້ານ​ສິ່ງເສບ​ຕິດ​ເຫັນ​ວ່າ​ສະພາບ​ພາຍ​ໃນ ໂຮງຮຽນ​ມີ​ຄວາມ​ສະຫງົບ​ດີ ຄູ ອາຈານ ແລະ ນັກຮຽນ​ມີ​ຄວາມສາມັກຄີ​ຊ່ວຍເຫຼືອ​ເຊິ່ງ​ກັນ ແລະ ກັນ ເຮັດ​ໃຫ້ການ​ສອນ​ດີ​ຂຶ້ນ​ເປັນເທື່ອ​ລະ​ກ້າວ ແລະ ຕໍ່​ອຳນາດການ​ປົກຄອງ​ກໍ່​ໄດ້​ປະສານ​ສົມທົບ​ກັນ​ເປັນ​ຢ່າງ​ດີ ສະນັ້ນ ຕາມການ​ປະ​ເມີນ 5 ໂຮງຮຽນ​ແມ່ນໄດ້​ຕາມ​ເປົ້າ​ໝາຍ​ທີ່​ວາງ​ອອກ.