ຂປລ. ໃນວັນທີ 23 ທັນວາ 2015 ທີ່ກະຊວງສຶກສາທິການ ແລະ ກິລາ, ທ່ານ ພັນຄໍາ ວິພາວັນ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີວ່າການກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ ຫງວຽນ ດຶກເລີ້ຍ ຜູ້ອໍານວຍການໃຫຍ່ສໍານັກຂ່າວສານຫວຽດນາມ ພ້ອມຄະນະ ໃນໂອກາດທີ່ ທ່ານ ແລະ ຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 23-26 ທັນວາ 2015.
ໂອກາດດັ່ງກ່າວ, ທ່ານ ພັນຄໍາ ວິພາວັນ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາ ຄາສູງຕໍ່ ທ່ານ ຫງວຽນ ດຶກເລີ້ຍ ແລະ ຄະນະ ທີ່ໄດ້ເດີນທາງມາຢ້ຽມຢາມສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເຂົ້າໃນການເພີ່ມທະວີສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດອ້າຍນ້ອງລາວ-ຫວຽດນາມ ໃຫ້ນັບມື້ຈະເລີນງອກງາມຍິ່ງໆຂຶ້ນ.ໂດຍສະເພາະການຮ່ວມມືແລກປ່ຽນຂໍ້ມູນຂ່າວສານ ແລະ ດ້ານວິຊາການລະ ຫວ່າງສໍານັກຂ່າວສານປະ ເທດລາວ ແລະ ສໍານັກຂ່າວສານຫວຽດນາມ ທີ່ມີມາແຕ່ສະໄໝຕໍ່ສູ້ກູ້ຊາດຈົນເຖິງປັດຈຸບັນ ໄດ້ເຕີບໃຫຍ່ຂະຫຍາຍຕົວ ແລະ ມີຜົນສໍາເລັດຢ່າງຫລວງຫລາຍ ໂດຍຜ່ານການແລກປ່ຽນທັດສະນະຮ່ວມກັນ, ເຜີຍ ແຜ່ຂໍ້ມູນຂ່າວສານ ແລະ ການເຄື່ອນໄຫວຕ່າງໆຢ່າງມີປະສິດທິຜົນ ສາມາດເຮັດໃຫ້ປະຊາຊົນສອງຊາດລາວ-ຫວຽດນາມ ມີຄວາມເຂົ້າອົກເຂົ້າໃຈ ແລະ ໄປມາຫາສູ່ກັນຢ່າງສະດວກສະບາຍ.
ໃນໂອກາດດຽວກັນນັ້ນ, ທ່ານ ຫງວຽນ ດຶກເລີ້ຍ ກໍໄດ້ສະແດງຄວາມຂອບອົກຂອບໃຈຕໍ່ ທ່ານ ພັນຄໍາ ວິພາວັນ ຮອງນາຍົກລັດຖະມົນຕີ ທີ່ໄດ້ສະຫລະເວລາໃຫ້ການຕ້ອນຮັບຢ່າງອົບອຸ່ນ, ພ້ອມທັງແຈ້ງໃຫ້ຊາບ ເຖິງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວໃນຄັ້ງນີ້.
ແຫ່ລງຂ່າວ
