ພາຍຫຼັງສຳເລັດການເຄື່ອນໄຫວ ທ່ຽວຊົມແຫຼ່ງທ່ອງທ່ຽວຫຼາຍແຫ່ງ ທີ່ແຂວງຊຽງຂວາງ ຂະບວນຄາຣາວານ ຄືນສູ່ຖິ່ນກຳເນີດກອງທັບປະຊາຊົນລາວ ໂດຍມີທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ພ້ອມດ້ວຍທ່ານພົນຕີ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ໄດ້ນຳຂະບວນໄປເຖິງແຂວງຫົວພັນ ໄດ້ຢ້ຽມຊົມບັນດາຖ້ຳປະຫວັດສາດຂອງຜູ້ນຳລາວ ຢູ່ເມືອງວຽງໄຊ ໃນວັນທີ 11 ມັງກອນ 2014 ມາຮອດວັນທີ 13 ມັງກອນ 2014 ຂະບວນຄາຣາວານດັ່ງກ່າວ ໄດ້ເດີນທາງກັບເຖິງນະຄອນຫຼວງວຽງຈັນ ດ້ວຍຜົນສຳເລັດ.
ການຢ້ຽມຢາມເຂດທີ່ໝັ້ນເມືອງວຽງໄຊ ຂອງຄະນະຂະບວນຄາຣາວານຄັ້ງນີ້ ໄດ້ຢ້ຽມຊົມເຂດອະນຸສອນສະຖານ ຖ້ຳປະຫວັດສາດຂອງປະທານ ໄກສອນ ພົມວິຫານ ທ່ານ ໜູຮັກ ພູມສະຫວັນ ປະທານ ສຸພານຸວົງ ທ່ານ ພູມີ ວົງວິຈິດ ຖ້ຳໂຮງໝໍ ຖ້ຳທ່ານ ຄຳໄຕ ສີພັນດອນ ແລະ ຖ້ຳຫ້ອງການເມືອງ ກອງບັນຊາການທະຫານສູງສຸດ ກອງທັບປະຊາຊົນລາວ (ຖ້ຳຊ້າງລອດ) ພ້ອມດ້ວຍຖ້ຳຜູ້ນຳຄົນອື່ນໆ ຊຶ່ງການຢ້ຽມຊົມແຕ່ລະຖ້ຳລ້ວນແຕ່ໄດ້ເຫັນ ແລະ ໄດ້ຮັບຮູ້ເຖິງຮ່ອງຮອຍຊີວິດການເຄື່ອນໄຫວ ການປະຕິວັດ ການຕໍ່ສູ້ຕ້ານກັບພວກຈັກກະພັດລ່າເມືອງຂຶ້ນ ໃນລະຫວ່າງຊຸມປີ 1964-1975 ທີ່ສຳຄັນໄດ້ເຫັນສຳພັດຖ້ຳທີ່ມີຊື່ວ່າ “ຜາຫານ” ຂອງປະທານ ໄກສອນ ພົມວິຫານ ແລະ ຄອບຄົວອາໄສຢູ່ ໃນຖານະເປັນເລຂາທິການໃຫຍ່ ພັກປະຊາຊົນປະຕິວັດລາວ ແລະ ເປັນນາຍົກລັດຖະມົນຕີຄົນທຳອິດຂອງ ສປປ ລາວ ທີ່ປະກອບດ້ວຍຫ້ອງຄົ້ນຄວ້າສະເພາະ ຫ້ອງປະຊຸມ ກຳມະການກົມການເມືອງສູນກາງພັກ ແລະ ຫ້ອງອື່ນໆ ໃນຂະນະທີ່ຖ້ຳຊ້າງລອດ ກໍ່ມີສະຖານທີ່ກວ້າງຂວາງ (ຊ້າງລອດໄດ້ເປັນຝູງ) ຊຶ່ງເປັນທີ່ຕັ້ງຂອງກອງບັນຊາການສູງສຸດ ກອງທັບປະຊາຊົນລາວ ພາຍໃຕ້ການບັນຊາຂອງທ່ານ ຄຳໄຕ ສີພັນດອນ ເພື່ອປະຕິບັດໜ້າທີ່ປ້ອງກັນເຂດທີ່ໝັ້ນວຽງໄຊ ຈົນກ້າວໄປສູ່ການປົດປ່ອຍປະເທດຊາດສຳເລັດ ແລະ ສະຖາປະນາເປັນ ສປປ ລາວ ໃນປີ 1975 ຄະນະຂະບວນຄາຣາວານຫຼາຍຄົນ ໄດ້ມາເຫັນກັບຕາເປັນຄັ້ງທຳອິດ ທັງໄດ້ສະແດງຄວາມດີໃຈ ແລະ ຍົກຍ້ອງບັນດາທ່ານຜູ້ນຳລາວ ທີ່ມີຄວາມເສຍສະຫຼະອົດທົນ ຜ່ານຜ່າຄວາມຫຍຸ້ງຍາກຢ່າງບໍ່ຮູ້ອິດຮູ້ເມື່ອຍ ຈົນໃນທີ່ສຸດ ກໍ່ສາມາດນຳໄຊຊະນະຮອບດ້ານ ມາໃຫ້ປະຊາຊົນລາວສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດຕໍ່ໄປ ທັງນີ້ ເຫັນສົມຄວນວ່າຄົນຮຸ່ນຫຼັງຈະໄປທ່ຽວຊົມ ແລະ ສຶກສາຮ່ຳຮຽນເອົາບົດຮຽນ ທັງເປັນການຈາລຶກບຸນຄຸນ ແລະ ຄຸນງາມຄວາມດີຂອງເພິ່ນຕະຫຼອດໄປ.
ທ່ານ ພູວັນ ເພັດມີໄຊ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງຫົວພັນ ບອກວ່າ: ພາຍຫຼັງມີການພັດທະນາ ແລະ ເປີດບໍລິການໃຫ້ບັນດານັກທ່ອງທ່ຽວ ໄດ້ເຂົ້າຊົມຢ່າງທົ່ວເຖິງ ນັບແຕ່ປີ 2000 ເປັນຕົ້ນມາ ສ້າງເກດໄດ້ວ່າມີນັກທ່ອງທ່ຽວພາຍໃນ ແລະ ຕ່າງປະເທດ ສົນໃຈເຂົ້າມາທ່ຽວນັບມື້ຫຼາຍຂຶ້ນ ໂດຍສະເພາະແມ່ນໃນລະດູແລ້ງ ເນື່ອງຈາກເສັ້ນທາງຍາວໄກ ທ່ານຮອງພະແນກ ຖວທ ໃຫ້ຮູ້ອີກວ່າ: ທົ່ວແຂວງຫົວພັນ ມີແຫຼ່ງທ່ອງທ່ຽວທັງໝົດກວ່າ 100 ແຫ່ງ ໃນນີ້ ມີແຫຼ່ງທ່ອງທ່ຽວທາງປະຫວັດສາດ 53 ແຫ່ງ ທຳມະຊາດ 31 ແຫ່ງ ສຳລັບແຫຼ່ງທ່ອງທ່ຽວທີ່ໄດ້ຮັບການພັດທະນາ ແລະ ເປີດບໍລິການມີ 35 ແຫ່ງ ປີ 2013 ຜ່ານມານີ້ ມີນັກທ່ອງທ່ຽວເຂົ້າມາແຂວງຫົວພັນທັງໝົດ 31.000 ຄົນ ສ້າງລາຍຮັບກວ່າ 12 ຕື້ກີບ ທຽບໃສ່ປີ 2012 ເພີ່ມຂຶ້ນກວ່າ 1 ຕື້ກີບ ປັດຈຸບັນ ລາຍຮັບສ່ວນໃຫຍ່ແມ່ນມາຈາກແຫຼ່ງທ່ອງທ່ຽວປະຫວັດສາດ ເມືອງວຽງໄຊ ແຫຼ່ງທ່ອງທ່ຽວແບບປະຊາຊົນມີສ່ວນຮ່ວມ ປ່າສະຫງວນນ້ຳແອດ-ພູເລີຍ ແລະ ອື່ນໆ.
ໃນລະຫວ່າງການເດີນທາງຈາກແຂວງຊຽງຂວາງ ໄປແຂວງຫົວພັນ ເມື່ອວັນທີ 10 ມັງກອນ 2014 ທ່ານ ສຈ.ດຣ. ບໍ່ແສງຄຳ ວົງດາລາ ໄດ້ນຳພາຄະນະຂະບວນຄາຣາວານ “ຄືນສູ່ຖິ່ນກຳເນີດກອງທັບປະຊາຊົນລາວ” ແວ່ຊົມອະນຸສອນສະຖານຖ້ຳປິວ ທີ່ເມືອງຄຳ ແຂວງຊຽງຂວາງ ຊົມສະຖານທີ່ທ່ອງທ່ຽວນ້ຳຕົກຕາດສະເຫຼີຍ ດ້ວຍບັນຍາກາດມ່ວນຊື່ນ.
ຖ້ຳປີວເປັນສະຖານທີ່ໂສກນາດຕະກຳ ຫຼັງຈາກພວກຈັກກະພັດອາເມລິກາ ແລະ ລູກແຫຼ້ງຕີນມື ໄດ້ຮັບຄວາມປະລາໄຊຢ່າງເຈັບແສບ ໃຫ້ກຳລັງຮັກຊາດ ແລະ ປະຊາຊົນແຂວງຊຽງຂວາງ ພວກເຂົາຈຶ່ງໄດ້ເພີ່ມທະວີຝູງຍົນສູ້ຮົບ ຍິງທຳລາຍເຜົາຜານເຂດປົດປ່ອຍຢ່າງປ່ວງບ້າ ໃຊ້ຍົນຖີ້ມລະເບີດຢ່າງບໍ່ເລືອກເປົ້າໝາຍ ໂຮງຮຽນ ໂຮງໝໍ ວັດອາອາຮາມ ຕະຫຼອດເຖິງເຮືອນຊານບ້ານຊ່ອງ ນັບທັງຊີວິດ ແລະ ຊັບສິນຂອງປະຊາຊົນຈົນນັບບໍ່ຖ້ວນ ໃນນັ້ນ ມີເຫດການທີ່ທຸກຄົນບໍ່ອາດຫຼົງລືມໄດ້ ແມ່ນການຍິງລູກສອນໄຟເຂົ້າໃສ່ຖ້ຳປິວ ຂອງກຳລັງອາກາດຈັກກະພັດອາເມລິກາ ໃນວັນທີ 24 ພະຈິກ 1968 ອັນໄດ້ເຂັ່ນຂ້າປະຊາຊົນທີ່ລີ້ໄພຢູ່ໃນຖ້ຳ ເສຍຊີວິດພາບດຽວ 374 ຄົນ ດັ່ງນັ້ນ ໃນວັນທີ 24 ພະຈິກຂອງທຸກປີ ໄດ້ເປັນວັນຄຽດແຄ້ນສົງຄາມຮຸກຮານ ເປັນວັນທີ່ລະນຶກ ແລະ ໄວ້ອາໄລດວງວິນຍານຂອງພໍ່ແມ່ປະຊາຊົນຜູ້ບໍລິສຸດ ທີ່ຕົກເປັນເຫຍື່ອເຄາະຮ້າຍຂອງເຫດການຄັ້ງນັ້ນ ຊຶ່ງພວກເພິ່ນໄດ້ເສຍສະຫຼະຊີວິດເລືອດເນື້ອ ເພື່ອເອກະລາດແຫ່ງຊາດ ແລະ ເພື່ອຄວາມສົມບູນພູນສຸກຂອງຊາວແຂວງຊຽງຂວາງ ກໍ່ຄືຊາວລາວທັງຊາດ ທີ່ຍັງຄົງຈຳໄວ້ຕະຫຼອດການ ຈາກນັ້ນ ຄະນະຂະບວນຄາຣາວານ ໄດ້ແວ່ຊົມສະຖານທີ່ທ່ອງທ່ຽວນ້ຳຕົກຕາດສະເຫຼີຍ ຕັ້ງຢູ່ແຄມເສັ້ນທາງເລກ 6 ລະຫວ່າງ ບ້ານສະເຫຼີຍ-ບ້ານໂພນໄຊ ຫ່າງຈາກເທດສະບານແຂວງຫົວພັນ 36 ກິໂລແມັດ ນ້ຳຕົກຕາດແຫ່ງນີ້ ເປັນລັກສະນະເນີນບໍ່ສູງປານໃດ ມີຄວາມຍາວປະມານ 100 ກວ່າແມັດ ບ່ອນກວ້າງປະມານ 10 ແມັດ ສາມາດເຂົ້າເຖິງຕາດຢ່າງສະດວກສະບາຍ ມີຮ້ານອາຫານ ແລະ ຫ້ອງນ້ຳໄວ້ຄອຍບໍລິການ ມີຂົວຂ້າມເຂດຕີນຕາດ ແລະ ບໍລິເວນຫົວຕາດ ສາມາດຍ່າງຂ້າມໄປມາໄດ້ ໃນໄລຍະຜ່ານມາ ມີນັກທ່ອງທ່ຽວໄປທ່ຽວຊົມຈຳນວນຫຼວງຫຼາຍ.
ທີ່ມາ http://www.vientianemai.net/teen/khao/1/10971